ក្រុមមន្ត្រីបាននិយាយថា មនុស្សយ៉ាងតិច៧នាក់ ដោយក្នុងនោះមានទាំងកុមារ៣នាក់ផងដែរគឺត្រូវបានសម្លាប់ និងជិត៣០០នាក់ បានរងរបួសកាលពីថ្ងៃអាទិត្យនៅក្នុងការផ្ទុះដ៏ហិង្សាបំផុត នៃភ្នំភ្លើង Fuego របស់ប្រទេសហ្គាតេម៉ាឡាក្នុងរយៈពេលជាង៤ទសវត្សរ៍ចុងក្រោយនេះ។
ភ្នំភ្លើង Fuego បានព្រួសកម្អែទៅចម្ងាយ៨គីឡូម៉ែត្រហើយបានបញ្ចេញផ្សែងខ្មៅនិងផេះដ៏ក្រាស់ដែលបានបាចសាចចូលទៅក្នុងរដ្ឋធានីនិងតំបន់ដទៃទៀត។
លោក Sergio Cabanas អគ្គលេខាធិការនៃទីភ្នាក់ងារគ្រប់គ្រងគ្រោះមហន្តរាយជាតិ CONRED របស់ប្រទេសហ្គាតេម៉ាឡាបាននិយាយក្នុងវិទ្យុថា “វាគឺជាទន្លេនៃកម្អែហើយវាបានប៉ះពាល់ដល់ភូមិ El Rodeo។ មានអ្នករបួស អ្នកស្លាប់និងអ្នកដែលត្រូវដុតឆេះខ្លួន”។
ចំណែកលោក Mario Cruz អ្នកនាំពាក្យអង្គភាពពន្លត់អគ្គិភ័យស្ម័គ្រចិត្តបាននិយាយថា “យើងសូមបញ្ជាក់ពីអ្នកស្លាប់ថាមានចំនួន៧នាក់ដោយក្នុងនោះមានមនុស្សពេញវ័យ៤នាក់និងកុមារ ៣នាក់ដែលត្រូវបានបញ្ជូនទៅកន្លែងដាក់សពរួចទៅហើយ”។
លោក Cabanas បាននិយាយថា ម្នាក់ក្នុងចំណោមអ្នកដែលត្រូវបានសម្លាប់គឺជាបុគ្គលិករបស់ CONRED ។ លោកបានបន្ថែមថា រហូតមកដល់ពេលនេះ មានមនុស្សចំនួន៣,១០០នាក់ត្រូវបានជម្លៀសចេញពីតំបន់នោះ។
លោកប្រធានាធិបតី Jimmy Morales បាននិយាយថា គាត់បានកោះប្រជុំរដ្ឋមន្ត្រីរបស់គាត់ហើយកំពុងពិចារណាប្រកាសដាក់ច្បាប់រដ្ឋក្នុងគ្រាអាសន្ននៅក្នុងនាយកដ្ឋាននៃតំបន់ Chimaltenango, Escuintla និង Sacatepequez។
អាជ្ញាធរអាកាសចរណ៍ស៊ីវិលរបស់ប្រទេសហ្គាតេម៉ាឡាបាននិយាយនៅក្នុងសេចក្តីថ្លែងការណ៍មួយថា ការផ្ទុះនេះបានបង្ខំឲ្យអាកាសយានដ្ឋានអន្តរជាតិ La Aurora របស់ទីក្រុងហ្គាតេម៉ាឡាត្រូវបិទផ្លូវរត់តែមួយគត់របស់ខ្លួនដោយសារផេះភ្នំភ្លើងនិងដើម្បីធានាសុវត្ថិភាពដល់អ្នកដំណើរនិងយន្តហោះ។
គួរបញ្ជាក់ថា ភ្នំភ្លើងនេះមានទីតាំងស្ថិតនៅចម្ងាយប្រហែល៤០គីឡូម៉ែត្រភាគនិរតីនៃទីក្រុងហ្គាតេម៉ាឡា៕ REUTERS
Source: Kampuchea Thmey Daily
0 Comments