បាត់ដំបង ៖ ចាប់ពីថ្ងៃទី ១ ដល់ថ្ងៃទី ២ ខែមិថុនា ឆ្នាំ ២០១៨ នេះ កិច្ចប្រតិបត្តិការ របស់កម្លាំងចម្រុះក្រសួង បានធ្វើការត្រួតពិនិត្យទៅលើទីតាំងធ្វើអាជីវកម្មរ៉ែមាស សរុបចំនួន ៧ កន្លែង ដែលក្នុងនោះ មានតែ ២ ទីតាំងប៉ុណ្ណោះដែលមានអាជ្ញាប័ណ្ណត្រឹមត្រូវចំណែក ៥ ទីតាំងទៀត គឺជាកន្លែងធ្វើអាជីវកម្មតាមបែបអនាធិបតេយ្យ គ្មានការអនុញ្ញាតពីស្ថាប័នជំនាញ ឬក៏អាចនិយាយបានថា គឺធ្វើឡើងតាមបែបត្រូវដងត្រូវផ្លែគ្នា។
នៅក្នុងរយៈពេល ២ ថ្ងៃ នេះ កម្លាំងចម្រុះដែលមាន ក្រសួងបរិស្ថាន ក្រសួងរ៉ែ និងថាមពល កងរាជអាវុធហត្ថលើផ្ទៃប្រទេស ប៉េអឹម ខេត្ត ស្រុក និងកម្លាំងជំនាញ នៃស្នងការដ្ឋាន នគរបាលខេត្ត បាត់ដំបង បានចេញប្រតិបត្តិការយ៉ាងសម្ងាត់ ព្រមទាំងមានការរារាំង មិនអនុញ្ញាតអោយអ្នកសារព័ត៌មានចូលផ្តិតយករូបភាពនោះឡើយ នៅក្នុងតំបន់ភ្នំត្រងោលនេះ គឺស្ថិតក្នុងភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង។
នៅក្នុងកិច្ចប្រតិបត្តិការ ដែលយើងទទួលបានពីប្រភពរបស់សមត្ថកិច្ច បានអោយដឹងថា ទីតាំងដែលជាអាជីវកម្មរ៉ែមាសស្របច្បាប់ និងមានអាជ្ញាប័ណ្ណត្រឹមត្រូវនោះ គឺមានទីតាំងរបស់សហគមន៍សិប្បករធនធានរ៉ែមាស ១ កន្លែង និង ១ កន្លែងទៀត ជារបស់ក្រុមហ៊ុនភូយ៉ាង (ក្រុមហ៊ុនចិន ) ដោយឡែក ៥ ទីតាំងដែលគ្មានច្បាប់អនុញ្ញាត ត្រូវបានគេស្គាល់ថា ជារបស់អ្នកដែលមានខ្សែគ្រាក់ៗ ផងដែរ ហើយនៅក្នុងចំណោម៥ទីតាំងនេះ គឺមាន២ទីតាំង ត្រូវបានកម្លាំងដាក់គ្រឿងចក្រអោយធ្វើការកម្ទេច និងបំផ្លាញចោល។
រីឯសម្ភារៈដែលកម្លាំងចម្រុះ បានធ្វើការដកហូតពាក់ព័ន្ធនឹងបទល្មើសរួមមាន ៖ ១-ធុងអាស៊ីតចំនួន ២០៩ ធុង ២-ស្យានីតចំនួន ២៥ ធុង ៣-Drychlorine ចំនួន ១៥ ធុង ៤-ម្សៅរ៉ែពាក់កណ្តាលសម្រេច ៣០ថង់តូច ៥-បន្ទះស័ង្កសី ៤០ គីឡូក្រាម ៦-ម៉ាស៊ីនអុកចំនួន៣គ្រឿង ៧-ម៉ាស៊ីនកិនរ៉ែចំនួន២៤ គ្រឿង ៨-ម៉ាស៊ីនស្វានថ្មរ៉ែចំនួន៦គ្រឿង ៩-ម៉ាស៊ីនបូមទឹកចំនួន៩គ្រឿង១០-មូទ័រចំនួន២គ្រឿង ១១-អាម៉ូញ៉ូម នីត្រាត ចំនួន ៦២,៥ បាវ ១២-កំបោរចំនួន ៨៨បាវ ១៣-Soda ASH/LIGHI ចំនួន ២១,៥បាវ ១៤-ម្សៅសចំនួន ៤ ធុង ១៥-ម៉ាស៊ីនភ្លើងចំនួន១២គ្រឿង ១៦-ធុងSODIOUM NITATE ចំនួន ១១ ធុង និងសំបក១ ធុង ១៧- ក្បាលផ្សារសម្រាប់ដេញមាសចំនួន ៣ ធុង ១៨-ធុងហ្គាស៍ចំនួន ២ ធុង ១៩-ធុងជ័រចំនួន ១៩ ធុង ២០-ចានដែកចំនួន ១០ ចាន ២១-ចានដែកជ័រចំនួន ៩ ចាន ២២-អាងត្រាំក្បាលរ៉ែចំនួន ១៣ កន្លែង ២៣-គីបខ្យល់ ចំនួន ១០៧០ គីប ២៤-គីបភ្លើងចំនួន ២០៤០ គីប ២៥-ក្បាលកិនថ្មរ៉ែចំនួន៤គ្រឿង ២៦-កញ្ច្រែងញាក់ចំនួន១ ឈុត ២៧-ធុងត្រាំស័ង្កសីចំនួន ១ ធុង ២៨-ប៉ូតាស្យូម ចំនួន២ បាវ ២៩-ម៉ាស៊ីនបូមខ្យល់ ១ គ្រឿង ៣០-ជើងទប់ម៉ូទ័រខួងថ្ម ចំនួន១ គ្រឿង និង ៣១-ត្រើយចំនួន ២ គ្រឿង ដោយសម្ភារៈមួយចំនួនដែលបម្រើអោយអាជីវកម្មរ៉ែមាស ត្រូវបានកម្ទេចចោលនៅនឹងកន្លែង ឯសារធាតុគីមីប្រគល់ជូនក្រសួងរ៉ែ និងថាមពល រក្សាទុក ហើយរំសេវ គីប ប្រគល់អោយកងរាជអាវុធហត្ថខេត្តរក្សាទុក។
គួររំលឹកដែរថា កន្លងមកលោកប្រធានមន្ទីរ រ៉ែ និង ថាមពល អ៊ាន មាឃ ធ្លាប់បាននិយាយថា ការធ្វើអាជីវកម្មនៅទីនេះ សុទ្ធតែមានច្បាប់អនុញ្ញាតទាំងអស់ លុះមានបញ្ហាកើតឡើងនៅឯខេត្តក្រចេះ ទើបមានកម្លាំងចម្រុះចេញប្រតិបត្តិការ ហើយទើបធ្លាយរឿងអាស្រូវដែលពាក់ព័ន្ធនឹងការធ្វើអាជីវកម្មតាមបែបអនាធិបតេយ្យ គ្មានអាជ្ញាប័ណ្ណ ដែលបញ្ហានេះគេសង្ស័យថា អាចមានការត្រូវដងត្រូវផ្លែគ្នា ពីសំណាក់ក្រុមអាជីវករ ជាមួយនឹងអាជ្ញាធរក៏ដូចជាសមត្ថកិច្ចជំនាញ ទើបការងារនេះអាចរលូនទៅមុខបាន។
ប្រភពជាច្រើនបានចោទជាសំណួរថា ទីតាំងចំនួន ៥ កន្លែងដែលគ្មានច្បាប់អនុញ្ញាតដូចគ្នា ហេតុអ្វីបានជាកម្លាំងចម្រុះធ្វើការកម្ទេចតែ២កន្លែង រីឯ៣កន្លែងទៀតរួចខ្លួន ?បញ្ហានេះយើងពិបាកក្នុងការសាកសួរដោយសារតែកិច្ចប្រតិបត្តិការនេះ ត្រូវបានគេលាក់លៀមនៅឡើយ៕
Source: Kampuchea Thmey Daily
0 Comments