ភ្នំពេញ ៖ មន្ត្រីជាន់ខ្ពស់ក្រសួងសុខាភិបាល បានជំរុញឲ្យមានការវិនិយោគបន្ថែមទៀតទៅលើវិស័យសុខាភិបាលនៅប្រទេសកម្ពុជាដើម្បីចូលរួមលើកកម្ពស់សុខភាព និងធ្វើឲ្យជីវិតរស់នៅរបស់ប្រជាជនកាន់តែមានសុខដុមនីយកម្ម។
ថ្លែងនៅក្នុងពិធីពិព័រណ៍និងសន្និសីទអន្តរជាតិ នៅកម្ពុជាលើកទី3ស្តីពី គ្រឿងសំអាង កែសម្ពស្ស សក់ & ស្ប៉ាកាលពីថ្ងៃទី5កញ្ញានៅកោះពេជ្រ លោក សាស្ត្រាចារ្យ ស៊ា ហួង អនុរដ្ឋលេខាធិការក្រសួងសុខាភិបាលបានមានប្រសាសន៍ថា ការចូលរួមវិនិយោគពីផ្នែកពាក់ព័ន្ធពិតជាមានសារៈសំខាន់ណាស់ក្នុងការជួយពង្រឹងប្រព័ន្ធសុខាភិបាលពិសេសផ្នែកឧស្សាហកម្មឱសថនិងបរិក្ខារពេទ្យ។
លោកសាស្ត្រាចារ្យបានបន្តថា ជាក់ស្តែងការតាំងពិព័រណ៍និងសន្និសីទអន្តរជាតិ នៅកម្ពុជាលើកទី3ស្តីពី គ្រឿងសំអាង កែសម្ពស្ស សក់ & ស្ប៉ានេះក៏ជាចំណែកមួយយ៉ាងសំខាន់ផងដែរក្នុងការលើកស្ទួយវិស័យសុខាភិបាលឲ្យកាន់តែរីកចម្រើនថែមទៀតតាមរយៈការបង្ហាញនូវឧបករណ៍វេជ្ជសាស្ត្របច្ចេកទេសទំនើបៗ ផលិតផលឱសថ អាហារបំប៉នសុខភាពនិងគ្រឿងឧបករណ៍បរិក្ខារពេទ្យនិងថ្នាំរក្សាសម្រស់ គ្រឿងសំអាងផ្សេងៗដែលនាំចូលមកពីបណ្តាប្រទេសជឿនលឿននៅលើពិភពលោក។
លោកសាស្ត្រាចារ្យបានបញ្ជាក់ថា តាមរយៈការតាំងពិព័រណ៍នេះក៏ដើម្បីផ្តល់ឱកាសកាន់តែច្រើនថែមទៀតដល់កិច្ចសហប្រតិបត្តិការអាជីវកម្ម អភិវឌ្ឍន៍ផលិតកម្មកែលំអសេវានិងបន្តជួយអភិវឌ្ឍន៍ឧស្សាហកម្មថែទាំសុខភាព។
លោកសាស្ត្រាចារ្យបានឲ្យដឹងថា ក្រសួងគាំទ្រការដាក់តាំងពីព័រណ៍នេះព្រោះបានជួយបង្កើតឲ្យមានបណ្តាញមុខជំនួយនិងកិច្ចសហការប្រតិបត្តិការអាជីវកម្មឲ្យកាន់តែរីកចម្រើនដើម្បីឲ្យអ្នកជំនាញផ្នែកសុខភាពមានឱកាសប្រើប្រាស់សេវាថែទាំឧបករណ៍ថ្មីៗក្នុងការជួយសង្គ្រោះ និងថែទាំអ្នកជំងឺឲ្យកាន់តែប្រសើរនិងប្រសិទ្ធភាពខ្ពស់។
លោក លីម សុបញ្ញា តំណាងក្រុមហ៊ុន វីអេសប្រចាំនៅប្រទេសកម្ពុជាដែលជាអ្នករៀបចំការតាំងពិព័រ ណ៍បានមានប្រសាសន៍ថាការតាំងពិព័រណ៍ អន្តរជាតិកម្ពុជាលើកទី3ស្តីអំពីគ្រឿងសម្អាង ការកែសម្ផស្ស និងថែរក្សាសម្រស់កម្ពុជានៅឆ្នាំ2018 នឹងប្រព្រឹត្តទៅចាប់ពីថ្ងៃទី 05 ដល់ថ្ងៃ 07 ខែកញ្ញា ឆ្នាំ2018 នៅមជ្ឈមណ្ឌលសន្និបាត និងតាំងពិព័រណ៍កោះពេជ្រដោយមានក្រុមហ៊ុនចូលរួមជាង 60 មកពី 15 ប្រទេសមកពីប្រទេសចិន អាល្លឺម៉ង់ ជប៉ុន ម៉ាឡេស៊ី សិង្ហបុរី កូរ៉េខាងត្បូង តៃវ៉ាន់ ថៃ ឥណ្ឌា បង់ក្លាដេស កម្ពុជា វៀតណាមបានបង្ហាញផលិតផលភេសជ្ជៈគ្រឿងសំអាង និងផលិតផលអនាម័យផ្ទាល់ខ្លួនផលិតផលសុខភាពធម្មជាតិអាហារសុខភាពនិងភេសជ្ជៈអាហារបំប៉នផលិតផលថែរក្សាវិជ្ជាជីវៈឧបករណ៍គ្រោះថ្នាក់និងគ្រឿងសម្ភារៈគ្រឿងសង្ហារិម និងបរិក្ខារមន្ទីរពេទ្យសម្ភារៈឱសថគ្រឿងសំអាងឱសថគ្រឿងសំអាងការព្យាបាល៕
Source: Kampuchea Thmey Daily
0 Comments