ភ្នំពេញ ៖ លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានជំរុញ ក៏ដូចជាណែនាំដល់សមាជិក សមាជិកា គ្រប់ផ្នែកទាំងអស់ ឲ្យខិតខំយកអស់កម្លាំងកាយចិត្ត អនុវត្តឱ្យបានល្អតាមតួនាទី និងភារកិច្ចដូចបានកំណត់ក្នុងច្បាប់ បទបញ្ជានីតិវិធី និងបទបញ្ជាផ្ទៃក្នុង នៅក្នុងការគ្រប់គ្រង ចាត់ចែង និងរៀបចំការបោះឆ្នោតនាពេលខាងមុខ ហើយក៏ត្រូវមានសាមគ្គីភាពផ្ទៃក្នុងល្អផងដែរ ដើម្បីឲ្យការងារនេះទទួលបានជោគជ័យ។
ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក ស៊ិក ប៊ុនហុក ណែនាំបែបនេះ នៅក្នុងពិធីបិទបញ្ចប់វគ្គបណ្តុះបណ្តាល ស្តីពីការឃោសនាបោះឆ្នោត សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ កាលពីរសៀលថ្ងៃទី៣១ ខែឧសភា ឆ្នាំ២១០៨ ដែលការបណ្តុះបណ្តាលនេះ មានរយៈពេល២ថ្ងៃ គឺចាប់ពីថ្ងៃទី៣០ ដល់ថ្ងៃទី៣១ ខែឧសភា ឆ្នាំ២០១៨។
នៅក្នុងពិធីបិទបញ្ចប់វគ្គបណ្តុះបណ្តាលនោះ គ្រូឧទ្ទេសជំនាញរបស់ គ.ជ.ប បានធ្វើបទបង្ហាញលើប្រធានបទ “ច្បាប់ស្តីពីការបោះឆ្នោតជ្រើសតាំងតំណាងរាស្ត្រ បទបញ្ជា និងនីតិវិធី សម្រាប់ការឃោសនាបោះឆ្នោត ក្រមសីលធម៌ និងនីតិវិធីនៃការដាក់ការទទួល និងការដោះស្រាយបណ្តឹង” ដើម្បីធានាឱ្យការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ប្រព្រឹត្តទៅប្រកបដោយសេរី ត្រឹមត្រូវ និងយុត្តិធម៌។
ថ្លែងទៅកាន់អ្នកចូលរួម លោក ស៊ិក ប៊ុនហុក បានណែនាំឲ្យដល់សមាជិក សមាជិកា គ្រប់ផ្នែកទាំងអស់ខិតខំយកអស់កម្លាំងកាយចិត្ត អនុវត្តឱ្យបានល្អតាមតួនាទី ភារកិច្ចដូចបានកំណត់ក្នុងច្បាប់ បទបញ្ជានីតិវិធី និងបទបញ្ជាផ្ទៃក្នុង ក្នុងការគ្រប់គ្រង ចាត់ចែង និងរៀបចំការបោះឆ្នោត នៅតាមរាជធានី ខេត្តរបស់ខ្លួន និងត្រូវមានសាមគ្គីភាពផ្ទៃក្នុងល្អក្នុងរាជធានី ខេត្តនីមួយៗ ព្រោះកត្តាផ្ទៃក្នុងនេះហើយជា កត្តាកំណត់ជ័យជំនះ ឬបរាជ័យ។ ត្រូវចេះរួបរួមគ្នាធ្វើការ ដើម្បីឱ្យការងាររបស់យើងសម្រេចបាន ជោគជ័យ ហើយត្រូវបង្កលក្ខណៈងាយស្រួលដល់គណបក្សនយោបាយ ដែលបានចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោត ក្នុងការធ្វើសកម្មភាពឃោសនាបោះឆ្នោត ឱ្យបានស្មើៗគ្នា និងស្របតាមច្បាប់ បទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ។
ជាមួយគ្នានោះ ត្រូវមានកិច្ចសហការល្អជាមួយអាជ្ញាធរដែនដី និងភាគីពាក់ព័ន្ធនានា នៅក្នុងរាជធានី ខេត្តរៀងៗខ្លួន ដោយរៀបចំឱ្យមានកិច្ចប្រជុំយ៉ាងទៀងទាត់ ដើម្បីផ្លាស់ប្តូរព័ត៌មានពីគ្នាទៅវិញទៅមក ហើយខិតខំដោះស្រាយរាល់បាតុភាព ដែលកើតមាន ហើយគ្រប់ គធ.ខប ទាំងអស់ត្រូវយកចិត្តទុកដាក់រៀបចំវគ្គបណ្តុះបណ្តាលស្តីពី ការឃោសនាបោះឆ្នោតដល់មន្ត្រី គធ.ខប ដល់គណៈកម្មការ ឃុំ សង្កាត់រៀបចំការបោះឆ្នោត (គឃ.សប) ឱ្យស្របតាម នីតិវិធីដែលបានកំណត់ និងត្រូវអញ្ជើញ តំណាងគណបក្សនយោបាយ អង្គការមិនមែនរដ្ឋាភិបាល ដែលមានទីស្នាក់ការក្នុងរាជធានី ខេត្ត នៅតាមក្រុង ស្រុក ខណ្ឌ និងនៅតាមឃុំ សង្កាត់ចូលរួមឱ្យបានច្រើនកុះករ។
តាមលោក ស៊ិក ប៊ុនហុក នាពេលខាងមុខនេះ គ.ជ.ប និងក្រសួងមហាផ្ទៃ នឹងចេញសេចក្តីណែនាំរួមមួយ ស្តីពីកិច្ចសហប្រតិបត្តិការរវាងអាជ្ញាធររដ្ឋបាលថ្នាក់ក្រោមជាតិ និង គ.ជ.ប គ្រប់លំដាប់ថ្នាក់ ក្នុងកិច្ចដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ដែលខ្លឹមសារសំខាន់ក្នុងសេចក្តីណែនាំរួមនោះមានដូចជា តម្រូវឲ្យរដ្ឋបាលរាជធានី ខេត្ត ត្រូវធ្វើការណែនាំដល់អាជ្ញាធរឃុំ សង្កាត់ ឱ្យសម្របសម្រួល និងបង្កលក្ខណៈងាយស្រួលដល់គណបក្សនយោបាយក្នុងការធ្វើសកម្មភាពនានា ស្របតាមច្បាប់ និងបទបញ្ជានិងនីតិវិធី ហើយសប្តាហ៍ទី១ ខែមិថុនា អភិបាលខេត្ត ត្រូវចាត់ឱ្យមានកិច្ចប្រជុំមួយ ដោយមានការចូលរួមពីថ្នាក់ដឹកនាំខេត្ត មន្ទីរជុំវិញខេត្ត អភិបាលក្រុង ស្រុក ខណ្ឌ រចនាសម្ព័ន្ធសន្តិសុខ ខេត្ត គណបក្សនយោបាយ សមាគម អង្គការមិនមែនរដ្ឋាភិបាលជាតិ អន្តរជាតិ ដើម្បីផ្សព្វផ្សាយអំពីដំណើរការរៀបចំការបោះឆ្នោត។
ជាមួយគ្នានោះ អភិបាលខេត្ត អាជ្ញាធរគ្រប់លំដាប់ថ្នាក់ ត្រូវផ្តល់កិច្ចសហការដល់គណៈកម្មការ គ.ជ.ប គ្រប់លំដាប់ថ្នាក់ ដើម្បីពិភាក្សា និងឯកភាពគ្នាកំណត់ទីតាំង រៀបចំកាលវិភាគប្រចាំសប្តាហ៍ ការប្រើប្រាស់ទីតាំងលំដាប់មុនក្រោយ សហការសម្របសម្រួល និងរៀបចំជាមួយគណបក្សនយោបាយ ចាត់វិធានការទប់ស្កាត់ និងដោះស្រាយចំពោះការឃោសនាដែលផ្ទុយពីច្បាប់ សហការរក្សាសន្តិសុខ សណ្តាប់ធ្នាប់ របៀបរៀបរយឱ្យបានល្អ។ អាជ្ញាធររដ្ឋបាលថ្នាក់ក្រោមជាតិ និងកងកម្លាំងមានសមត្ថកិច្ច ត្រូវផ្តល់កិច្ចសហការ ដល់គណៈកម្មការ គ.ជ.ប គ្រប់លំដាប់ថ្នាក់ ដើម្បីរក្សាសុវត្ថិភាព សន្តិសុខ សណ្តាប់ធ្នាប់សាធារណៈ ក្នុងសម័យបោះឆ្នោត ជាអាទិ៍ ការឃោសនាបោះឆ្នោត ការដឹកជញ្ជូនសម្ភារបរិក្ខារ ការដឹកជញ្ជូនត្រឡប់មកវិញ ការបោះឆ្នោត ការរាប់សន្លឹកឆ្នោត និងការប្រកាសលទ្ធផលបោះឆ្នោត។
សេចក្តីណែនាំ ក៏នឹងតម្រូវឱ្យមន្ត្រីរាជការស៊ីវិលគ្រប់លំដាប់ថ្នាក់ ត្រូវមានអព្យាក្រឹតភាពក្នុងសកម្មភាពការងារ និងត្រូវប្រកាន់ជំហរអព្យាក្រឹតឥតលម្អៀងក្នុងការងារបោះឆ្នោត។ ក្នុងនោះក្រុមប្រឹក្សាឃុំ សង្កាត់ មេភូមិ អនុប្រធានភូមិ និងសមាជិកភូមិ ដែលមិនស្ថិតក្នុងក្របខ័ណ្ឌមុខងារសាធារណៈ ក៏ត្រូវប្រកាន់ជំហរអព្យាក្រឹតឥតលម្អៀងក្នុងការអនុវត្តមុខងាររបស់ខ្លួនក្នុងដំណើរការបោះឆ្នោតផងដែរ។
សូមបញ្ជាក់ថា យុទ្ធនាការឃោសនាបោះឆ្នោត នឹងប្រព្រឹត្តទៅពីថ្ងៃទី៧ ដល់ថ្ងៃទី២៧ ខែកក្កដា ឆ្នាំ២០១៨៕
Source: Kampuchea Thmey Daily
0 Comments