ភ្នំពេញ ៖ ក្រុមហ៊ុន អេចជីប៊ី គ្រុបបានបង្ហាញរថយន្ត Bentley Bentayga V8 ថ្មីម៉ូដែលថ្មីបំផុតនៅលើទីផ្សារកម្ពុជាដើម្បីចូលរួមប្រកួតប្រជែងទីផ្សាររថយន្តប្រណិតៗនៅកម្ពុជា។
ក្រុមហ៊ុន អេចជីប៊ី គ្រុប (HGB Group)បានឲ្យដឹងថា រថយន្ត Bentley Bentayga V8 ថ្មីនេះប្រើទែរបូភ្លោះ ចំណុះ 4 លីត្រ មានកម្លាំងខ្លាំង និងសន្សំសំចៃប្រេង បំពាក់នូវសំឡេងម៉ាស៊ីន 8 បំពង់ស៊ីម៉ាងភ្លោះដ៏ស្រស់ស្អាត និងប្រើហ្វ្រាំងកាបូនសេរ៉ាម៉ិចបែបស្ព័រនៃរថយន្ត SUV ដ៏ប្រណីតនិងប្រើប្រព័ន្ធឌីណាមិកជួយបង្កើនកម្លាំងម៉ាស៊ីនឲ្យខ្លាំងទៀតផង។
ថ្លែងនៅក្នុងពិធីសម្ពោធសាលតាំងលក់ថ្មីរបស់ក្រុមហ៊ុនរថយន្ត Bentley ភ្នំពេញស្ថិតនៅអគារលេខ 37 មហាវិថីព្រះមុន្នីរ៉េត សង្កាត់វាលវង់ ខ័ណ្ឌ 7 មករា រាជធានីភ្នំពេញកាលពីថ្ងៃទី 31ឧសភាលោក ហ៊ឺហ្វ្រីដ ហាសេនហ៊ល នាយកប្រតិបត្តិនៃក្រុមហ៊ុន អេចជីប៊ី គ្រុប បានមានប្រសាសន៍ថាការសម្រេចចិត្តនាំចូលរថយន្ត Bentleyជាម៉ាកយី ហោរថយន្តប្រណិតរបស់អង់គ្លេសមកកាន់ទីផ្សារប្រទេសកម្ពុជានាពេលនេះគឺដោយមើលឃើញថាប្រទេសកម្ពុជាមានកំណើនសេដ្ឋកិច្ចប្រកបដោយចីរភាព និងនិរន្តរភាព មានស្ថិរភាពនយោបាយល្អពិសេសពលរដ្ឋកម្ពុជានិយមចូលចិត្តប្រើប្រាស់រថយន្តថ្មីៗទំនើបទាន់សម័យពិសេសប្រជាពលរដ្ឋលំដាប់ខ្ពស់ៗ។
ក្រៅពីលក់រថយន្ត Bentayga ហើយលោកបានបន្តទៀតថា ក្រុមហ៊ុនក៏មានមានលក់រថយន្តគ្រប់ម៉ូដែលទាំងអស់ដល់អតិថិជនផងដែរ រួមមានម៉ូដែល Mulsanne, , Flying Spur និងរថយន្ត Continental GT ស៊េរីថ្មី។
ពាក់ព័ន្ធនឹងការសម្ពោធហាងលក់ថ្មីនេះដែរលោក ដេវីដ ជេកសុន (David Jackson) នាយកគ្រប់គ្រងប្រចាំតំបន់អាស៊ីប៉ាស៊ីហ្វិកនៃ ក្រុមហ៊ុនរថយន្ត Bentley Motors បានមានប្រសាសន៍ថា សាលតាំងលក់ថ្មីនេះ ត្រូវបានរចនាឡើង ដើម្បីជួយឲ្យអតិថិជនរបស់យើងមានចក្ខុវិស័យរឹងមាំ ភ្លឺថ្លា និងទាន់សម័យ បានយល់ពីម៉ាកយីហោរថយន្ត Bentley ហើយសាលនេះត្រូវបានតុបតែងនូវភាពប្រណីតក្នុងកម្រិតស្មើគ្នា នឹងភាពប្រណីតដ៏ល្បីល្បាញរបស់រថយន្តផងដែរ។
លោកបានបន្តថាការសម្ពោធសាលតាំងលក់រថយន្ត Bentley ប្រចាំទីក្រុងភ្នំពេញ នៃព្រះរាជាណាចក្រកម្ពុជា គឺជាការចាប់ផ្ដើមនូវទំព័រប្រវត្តិសាស្ត្រថ្មី និងសបញ្ជាក់ឲ្យឃើញពីការកើនឡើងនូវវត្តមានដ៏រឹងមាំរបស់រថយន្ត Bentley នៅក្នុងតំបន់អាស៊ីអាគ្នេយ៍។
លោក ហ៊ឺហ្វ្រីដ ហាសេនហ៊ល នាយកប្រតិបត្តិនៃក្រុមហ៊ុន អេចជីប៊ី គ្រុប បានឲ្យដឹងថា«យើងមានសេចក្តីរីករាយ ដែលក្រុមហ៊ុន HGB Group ត្រូវបានតែងតាំងដើម្បីធ្វើជាតំណាងឲ្យម៉ាកយីហោរថយន្ត Bentley ដែលជាម៉ាកយីហោរថយន្តពិសេស និងទទួលបានការគោរពកោតសរសើរយ៉ាងខ្លាំង»។
គួរបញ្ជាក់ថាក្រុមហ៊ុន អេចជីប៊ី គ្រុបបានបង្កើតឡើងនៅក្នុងឆ្នាំ២០១២ដែលមានការិយាល័យនៅរាជធានីភ្នំពេញនិងនៅប្រទេសសិង្ហបុរីដោយធ្វើប្រតិបត្តិការអាជីវកម្មលើវិស័យយានយន្ត ម្ហូបអាហារ និងភេសជ្ជៈ និងឧស្សាហកម្មពាណិជ្ជកម្មនៅកម្ពុជា និងឡាវផងដែរ៕
Source: Kampuchea Thmey Daily
0 Comments