មានឈ្មោះល្បីនៅលើសង្គមសិល្បៈអ្នកនាង សួន ភក្តី ហៅវីជេ អាណូ បន្ទាប់ពីស្ងប់ស្ងាត់ពីសិល្បៈមានរយៈពេលយូរឆ្នាំ ពេលនេះក៏ស្រាប់តែផ្ទុះនូវរឿងអាស្រូវដ៏រសើប និងគួរឲ្យអាម៉ាស់បំផុត ខណៈដែលតារាស្រីអ្នកនាង សឿ សុធារ៉ា ចេញមុខទម្លាយរឿងឆបោក និងចេញសែកស្អុយ។
បើតាមការកត់សម្គាល់រឿងអាស្រូវដ៏អាម៉ាស់របស់តារាស្រីវីជេ អាណូ ដែលត្រូវបានបែកធ្លាយក្រោយពេលអ្នកនាង សឿ សុធារ៉ា ប្រកាសបើកចំហនៅលើបណ្តាញសង្គមហ្វេសប៊ុកនោះដែរភ្លាមៗនេះក៏ត្រូវបានអ្នកនិយមលេងបណ្តាញសង្គមនាំគ្នាបន្តស៊ែរចែករំលែកយ៉ាងព្រោងព្រាតជាមួយនឹងការសរសេរចេញផ្សាយនៅលើបណ្តាញសារព័ត៌មានជាច្រើនទៀត។
ផ្អែកលើការសម្រង់សម្តីរបស់អ្នកនាងសឿ សុធារ៉ាបានទម្លាយពីចរិតស្មោគគ្រោករបស់វីជេអាណូ ថាសូមបង សួន ភក្តីហៅ វីជា អាណូ (DJ ANO) មេត្តាចូលខ្លួនមកដោះស្រាយ រឿងចេញសែកស្អុយមកឲ្យប្អូននាងខ្ញុំចំនួន៦សែកសរុបទឹកប្រាក់ចំនួន៥ម៉ឺនដុល្លារ(ប្រាំម៉ឺនដុល្លារអាមេរិកគត់)ពីបទឆបោកSoun Pheakdey។
ដោយឡែកបើតាមប្រភពផ្សេងទៀតក៏បានបង្ហើបថា ករណីនេះពុំមែនទើបតែកើតឡើងចំពោះប្អូនតារាស្រីអ្នកនាង សឿ សុធារ៉ា ម្នាក់នោះទេ កន្លងមកធ្លាប់មានអ្នកសិល្បៈរួមអាជីព២ឬ៣នាក់មកហើយ ដែលត្រូវចាញ់បោកវីជេ អាណូ តាមរយៈការចេញសែកស្អុយ។ ប៉ុន្តែគ្រាកន្លងមកព័ត៌មាននេះត្រូវបានលាក់បាំងពុំឲ្យមានការបែកធ្លាយនោះឡើយ។
បើតាមប្រភពព័ត៌មានបានបញ្ជាក់ថា រឿងរ៉ាវដែលវីជេ អាណូ ជំពាក់លុយ និងចេញសែកស្អុយឲ្យប្អូនអ្នកនាង សឿ សុធារ៉ា ខាងលើនេះគឺផ្តើមចេញពីករណីនៃការបងរំលស់រថយន្ត។ ប៉ុន្តែជាលទ្ធផលបែរជាត្រូវតារាសម្តែង និងអតីតពិធីការិនីវីជេ អាណូ ប្រើល្បិច៣សន្លឹកធ្វើឲ្យសាមីខ្លួន(ម្ចាស់បំណុល)ស្ទើរក្អួតឈាមទៅវិញ។
កម្ពុជាថ្មីនៅរសៀលថ្ងៃទី០១ ខែមិថុនា ឆ្នាំ២០១៨នេះ មិនទាន់អាចស្វែងរកការបំភ្លឺពីតារាស្រីវីជេ អាណូ ពាក់ព័ន្ធដំណឹងដ៏រសើបនេះបាននៅឡើយទេ៕
Source: Kampuchea Thmey Daily
0 Comments