ភ្នំពេញ ៖ រាជរដ្ឋាភិបាលកម្ពុជាតែងតែយកចិត្តទុកដាក់គិតគូរអំពីបញ្ហា និងសិទ្ធិរបស់កុមារ ដើម្បីឱ្យស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា ក៏ដូចជាអនុសញ្ញា ស្តីពីសិទ្ធិកុមាររបស់អង្គការសហប្រជាជាតិ និងអនុសញ្ញាលេខ១៨២ របស់អង្គការពលកម្មអន្តរជាតិ ស្តីពីការហាមប្រាម និងសកម្មភាពបន្ទាន់សម្រាប់លុបបំបាត់ទម្រង់ធ្ងន់ធ្ងរបំផុត នៃពលកម្មកុមារ និងបទដ្ឋានជាតិ អន្តរជាតិស្តីពីសិទ្ធិកុមារ។
នេះជាការបញ្ជាក់របស់លោក ទេព ងន អនុប្រធានទី២ព្រឹទ្ធសភា តំណាងឱ្យសម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅក្នុងពិធីអបអរសាទរខួបលើកទី៦៩ នៃទិវាកុមារអន្តរ ជាតិ ០១ មិថុនា ស្តីពី “ ការលើកកម្ពស់សិទ្ធិកុមារ ”ស្ថិតនៅមជ្ឈមណ្ឌលបុរីកុមារមិត្តភាព បារាំង-ហុងហ្គ្រី ឃុំគោកត្រប់ ស្រុកកណ្តាលស្ទឹង ខេត្តកណ្តាល នាថ្ងៃទី០១ ខែមិថុនា ឆ្នាំ២០១៨នេះ។
ក្នុងពិធីនោះដែរលោកអនុប្រធានទី២ព្រឹទ្ធសភា បានរំលឹកថា ថ្ងៃនេះជាថ្ងៃអបអរសាទរខួបលើកទី៦៩ នៃទិវាកុមារអន្តរជាតិ ០១មិថុនា ដែលពិភពលោកប្រារព្ធឡើងដើម្បីរំលឹកដល់ការឈឺចាប់របស់មនុស្សជាតិលើសកលលោក ទៅលើឧក្រិដ្ឋកម្មដ៏ព្រៃផ្សៃយង់ឃ្នងរបស់ពួកហ្វាស៊ីសអ៊ីត្លែរ ដែលបានសម្លាប់ស្ត្រី និងកុមារ នៅក្នុងភូមិ លីឌីស៊ែ នៃសាធារណរដ្ឋសហព័ន្ធឆែក និងនៅភូមិអូរ៉ាឌូប្រទេសបារាំង ក្នុងអំឡុងឆ្នាំ១៩៤២-១៩៤៤ នៃសង្គ្រាមលោកលើកទី២។ លោកអនុប្រធានទី២ព្រឹទ្ធសភាបន្តថា ពិភពលោកទាំងមូល បានកំណត់ថា ថ្ងៃទី០១ មិថុនា ជាទិវាចងកំហឹងឈឺចាប់ពុះពោរ ហើយក៏ជាទិវាមួយ ដែលបំផុសស្មារតីដល់មនុស្សជាតិទាំងមូល អោយយកចិត្តទុកដាក់ដល់សុខុមាលភាពរបស់កុមារទាំងឡាយ និងជាទិវាសាមគ្គីអន្តរជាតិរបស់កុមារលើពិភពលោក។ លោកអនុប្រធានទី២ព្រឹទ្ធសភាបានបញ្ជាក់ថា ទាក់ទងនឹងសិទ្ធិរបស់កុមារនេះរាជរដ្ឋាភិបាលកម្ពុជាតែងតែយកចិត្តទុកដាក់គិតគូរ អំពីបញ្ហា និងសិទ្ធិរបស់កុមារ ដើម្បីឱ្យស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា ក៏ដូចជាអនុសញ្ញា ស្តីពីសិទ្ធិកុមាររបស់អង្គការសហប្រជាជាតិ និងអនុសញ្ញាលេខ១៨២ របស់អង្គការពលកម្មអន្តរជាតិ ស្តីពីការហាមប្រាម និងសកម្មភាពបន្ទាន់សម្រាប់លុបបំបាត់ទម្រង់ធ្ងន់ធ្ងរបំផុតនៃពលកម្មកុមារ និងបទដ្ឋានជាតិ អន្តរជាតិ ស្តីពីសិទ្ធិកុមារផ្សេងៗទៀត។ ជារៀងរាល់ឆ្នាំរាជរដ្ឋាភិបាលកម្ពុជា បានប្រារព្ធទិវាកុមារអន្តរជាតិ និងទិវាកុមារកម្ពុជា ០១មិថុនា ដើម្បីសម្តែងនូវការគាំពារដល់សិទ្ធិកុមារ។ ក្រៅពីនេះក៏មានគោលនយោបាយ ជាច្រើនរបស់រាជរដ្ឋាភិបាលក្នុងការលើកស្ទួយសិទ្ធិកុមារ ជាពិសេសគោលនយោបាយជាតិ ស្ដីពីការគាំពារ និងអភិវឌ្ឍន៍កុមារតូច គឺតាមរយៈការបង្កើនមណ្ឌលសុខភាព និងសាលារៀនបន្ថែមទៀត ដល់តំបន់ដាច់ស្រយាលនៅទីជនបទ ដើម្បីឲ្យកុមារបានទទួលសេវាសុខាភិបាល និងការអប់រំ។ ការលើកកម្ពស់អត្រាចូលរៀនរបស់កុមារ ការធ្វើសមាហរណកម្មកុមារពិការ និងជំរុញការអប់រំក្រៅប្រពន្ធ័ជាដើម សុទ្ធតែជាគោលនយោបាយ ដែលរាជរដ្ឋាភិបាលបាននិងកំពុងធ្វើ និងបន្តធ្វើនៅក្នុងអាណត្តិក្រោយៗទៀត។ លោកអនុប្រធានទី២ព្រឹទ្ធសភាបានបញ្ជាក់បន្ថែមថា កន្លងមកនេះ យើងបានរួមគ្នាតាមរយៈ "ការពារកុមារពីអំពើហិង្សា និងការប្រើប្រាស់គ្រឿងញៀន" ដូចយើងបានដឹងហើយថា បញ្ហានេះបានបង្កផលប៉ះពាល់យ៉ាងធ្ងន់ធ្ងរដល់សិទ្ធិមនុស្ស, ផលប្រយោជន៍សង្គម និងសុខុមាលភាពប្រជាជន ជាពិសេសកុមារ។ លើសពីនេះទៀត បញ្ហានេះបានធ្វើឱ្យចុះខ្សោយនូវមូលដ្ឋានគ្រឹះដ៏រឹងមាំ ដែលកុមារត្រូវការ ដើម្បីរស់រានមានជីវិត ប្រកបដោយសុខុមាលភាព, ប្រាជ្ញាវៀងវៃ និងផលិតភាពខ្ពស់ និងជាការ រំលោភបំពានទៅលើសិទ្ធិជាមូលដ្ឋានទាំងបួនរបស់កុមារផងដែរ។ ជាមួយនេះ ឆ្លើយតបទៅនឹងបញ្ហាគ្រឿងញៀន កន្លងមករាជរដ្ឋាភិបាលកម្ពុជាបានបង្កើតច្បាប់ ស្តីពីការត្រួតពិនិត្យគ្រឿងញៀនឆ្នាំ២០១២ និងអនុក្រឹត្យលេខ ១៦២ ស្តីពីការបង្កើតមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀនឆ្នាំ២០១០ ហើយទន្ទឹមនោះ ឤជ្ញាធរជាតិប្រយុទ្ធប្រឆាំងគ្រឿងញៀន ក៏តែងបានធ្វើការអប់រំផ្សព្វផ្សាយ បង្ការទប់ស្កាត់ ការស្តារនីតិសម្បទា ការបណ្តុះបណ្តាលវិជ្ជាជីវៈ ការធ្វើសមាហរណកម្មចូលក្នុងសង្គមជាតិ និងបានប្រឹងប្រែងអនុវត្តច្បាប់បង្ក្រាបបទល្មើសគ្រឿងញៀនយ៉ាងខ្លាំងក្លា។ ទាក់ទងការលើកកម្ពស់សិទ្ធិកុមារតាមរយៈការរួមគ្នា "បញ្ចប់ពលកម្មកុមារក្នុងចង្វាក់ផលិតកម្ម" កន្លងមករាជរដ្ឋាភិបាលតែងបានខិតខំប្រឹងប្រែងអនុវត្តការងារ ដោយផ្អែកលើគោលការណ៍ចម្បង ៣គឺ៖ ១) ការដកហូតកុមារពីទម្រង់ធ្ងន់ធ្ងរនៃពលកម្មកុមារ ដើម្បីឱ្យកុមារទទួលបានការអប់រំបណ្តុះបណ្តាលវិជ្ជាជីវៈ និងសមាហរណកម្មកុមារទៅក្នុងសង្គម ២) កិច្ចសហការ ជាមួយសង្គមស៊ីវិល និងការប្រយុទ្ធប្រឆាំងការជួញដូរស្ត្រី និងកុមារ និង ៣) លើកកម្ពស់ការងារសមរម្យ និងសុវត្ថិភាពការងារកុមារ។ ចំពោះមុខនេះរាជរដ្ឋាភិបាលបាននឹងកំពុងរៀបចំផែនការសកម្មភាពជាតិ ស្តីពីការកាត់បន្ថយពលកម្មកុមារ និងលុបបំបាត់ទម្រង់ធ្ងន់ធ្ងរ នៃពលកម្មកុមារ (២០១៦-២០២៥) ដើម្បីលើកកម្ពស់ការយល់ដឹងឱ្យកាន់តែប្រសើរ ស្តីពីបញ្ហាពលកម្មនៅកម្ពុជា។
ជាមួយពិធីសំណេះសំណាលក្នុងឱកាសអបអរសាទរ ទិវាកុមារអន្តរជាតិនេះដែរ លោកអនុប្រធានទី២ព្រឹទ្ធសភា ក៏បាននាំយកនូវអំណោយមួយចំនួនចែកជូនដល់លោកគ្រូ អ្នកគ្រូ យាយជី តាជី ប្រជាពលរដ្ឋ កុមារ និងកងសន្តិ សុខផងដែរ៕
Source: Kampuchea Thmey Daily
0 Comments