រតនគិរី ៖ ក្រុមចោរ បានធ្វើសកម្មភាពគាស់ទ្វារសោផ្ទះប្រជាពលរដ្ឋមួយកន្លែង ត្រង់ចំណុចជើងវត្តភ្នំស្វាយ ស្ថិតនៅក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី។
លោក ភាំង នូជ ភេទប្រុស អាយុ ៤៦ឆ្នាំ ជនជាតិខ្មែរ ជាម្ចាស់ផ្ទះ បានឲ្យអ្នកសារព័ត៌មានដឹងនៅព្រឹកថ្ងៃទី៦ ខែកញ្ញានេះ ថា រូបគាត់បានទៅចោលផ្ទះចំនួន២ខែមកហើយ ឲ្យអ្នកជិតខាងចាំមើលផ្ទះឲ្យ ដោយគាត់បាននាំប្រពន្ធ និងកូនទៅរស់នៅឯខេត្តព្រះសីហនុ ពេលនោះចោរបានគាស់ទ្វារផ្ទះរបស់គាត់នៅយប់ថ្ងៃទី៣ ខែកញ្ញានេះ ដោយអ្នកជិតខាងបានតេប្រាប់ ហើយគាត់ក៏ឡើងឡានឈ្នួលមកខេត្តរតនគិរីភ្លាម។
លោកបន្តថា ក្រោយពីហេតុការណ៍នេះភ្លាម គាត់បានមកដល់ផ្ទះ ដើរទៅអើតមើលក៏ឃើញសោទ្វារក្រោយផ្ទះបានបាក់ស្រយ៉សោទាំង២ចេញពីគ្នា បន្ទាប់មកនៅក្នុងបន្ទប់គាត់ដេក ក៏បានបាក់ស្រយ៉សោទ្វារដូចគ្នាផងដែរ ហើយបានចូលលួចយកទ្រព្យសម្បត្តិមួយចំនួនដូចជា ÷ ខោអាវ ៥ កំប្លេ និងចង្ក្រានហ្គាស១ ។
ចំណែកម៉ូតូ ស៊ីរ៉ូស ១គ្រឿង អត់ពន្ធ កញ្ចាស់ មិនត្រូវបានចោរលួចយកទៅនោះទេ ដោយម៉ូតូនេះធាក់មិនឆេះ ហើយអត់មានពន្ធថែមទៀតផង។
ម្ចាស់ផ្ទះបានសំណូមពរដល់អាជ្ញាធរ និងសមត្ថកិច្ចមូលដ្ឋានធ្វើយ៉ាងណាដើរល្បាតក្នុងមួយយប់២ទៅ៣ដង ពោល គឺភូមិឃុំមានសុវត្ថិភាព៕
Source: Kampuchea Thmey Daily
0 Comments