សម្រាប់ការប្រកួតគូឯក នៅក្នុងកម្មវិធីប្រដាល់ល្ងាចថ្ងៃសៅរ៍ទី១១ ខែសីហា ឆ្នាំ២០១៨ លើសង្វៀនបាយ័នស្ទឹងមានជ័យ នោះ គឺស៊ូ វណ្ណះ អ្នកប្រដាល់ក្លិបនាគរាជមានជ័យ ត្រូវគេផ្តល់ឱកាសអោយជួប ជម្រះបញ្ជីជាមួយ ហួន សុខនីម អ្នកប្រដាល់ក្លិបមហិទ្ធរិទ្ធតាដំបងដែក ដោយប្រកួតក្នុងទម្ងន់៦៣,៥០០គីឡូក្រាម។
ពីរនាក់នេះ ធ្លាប់ជួបប្រកួតគ្នា៣ដងហើយ ដោយហួន សុខនីម វាយឈ្នះទាំង២លើក និងស្មើពិន្ទុគ្នាមួយលើក។ ដូច្នេះ ចាំមើលការជួបគ្នាលើកនេះ តើស៊ូ វណ្ណះ អាចយកឈ្នះលើហួន សុខនីមបានឬអត់នោះ ?។
ហួន សុខនីម មានស្នៀតទាត់និងកណ្តាប់ដៃខ្លាំង និងវាយល្អ ហើយមានចិត្តប្រដាល់ធំ និងមានទិចនិចប្រកួតច្រើន ដើម្បីយកឈ្នះលើគូប្រកួត។ ដោយសារតែយ៉ាងដូច្នេះហើយ ទើបឡើងប្រកួតឈ្នះច្រើនជាងចាញ់ ។ តួយ៉ាង ការប្រកួតលើកចុងក្រោយនេះ សុខនីមបានផ្តួលយ៉ុន ដារ័ត្ន អ្នកប្រដាល់ក្លិបតាឡីដំរីមានរិទ្ធអោយសន្លប់ក្នុងទឹកទី១ ។
ស៊ូ វណ្ណះ គេក៏មានចិត្តប្រដាល់ធំដែរ ហើយមានកម្លាំងស៊ុហ្វរឹងមាំថែមទៀត ។ វណ្ណះ វ៉ៃមិនចេះថយទេ គឺសម្រុកចូលជានិច្ច ប៉ុន្តែរាល់ការវាយចេញរបស់គេ ភាគច្រើនមិនសូវចំគោលដៅ គឺបានត្រឹមតែសម្រុកប៉ុណ្ណោះ ។ ការប្រកួតចុងក្រោយគេនេះ ស៊ូ វណ្ណះ វាយឈ្នះចេង គា អ្នកប្រដាល់ក្លិបពន្លឺវិបុលមានរិទ្ធ ដោយពិន្ទុ ។ ចាំមើល តើស៊ូ វណ្ណះ អាចសងសឹកយកឈ្នះហួន សុខនីម បានឬអត់ នៅក្នុងការជយបគ្នាលើកទី៤នេះ ? ។
ចំពោះការប្រកួតដណ្តើមពានអនុស្សាវរីយ៍ទូរទស្សន៍បាយ័នទម្ងន់៥៤គីឡូក្រាម តាមរូបមន្ត ម៉ារ៉ាតុងលើកនេះ មានអ្នកប្រដាល់ជើងថ្មី២រូប និងជើងចាស់២រូប ចូលរួមប្រជែងគ្នាដណ្តើមយក។
អ្នកប្រដាល់ជើងថ្មី២រូបនោះ គឺជី ឆៃលី មកពីសមាគមប្រដាល់ក្រសួងការពារជាតិ និង វ៉ន វ៉ុន ក្លិបអេភូថងកីឡា ហើយជើងចាស់២រូបនោះ គឺ សំណាង សម្បត្តិ ក្លិបកងចក្ររាជសីហ៍ និង ជុន សាវិធ ក្លិបកុសលកីឡា ។
ក្នុងចំណោមអ្នកប្រដាល់ទាំង៤នាក់នេះ ខ្លះធ្លាប់ជួបគ្នា ខ្លះមិនធ្លាប់ជួបគ្នានោះទេ កន្លងមក។បើតាមការកត់សម្គាល់ពីសមត្ថភាព របស់អ្នកប្រដាល់ទាំង៤នាក់នេះ គេបានសន្និដ្ឋាននិងវាយតម្លៃថា ជើងថ្មី វ៉ន វ៉ុន ទំនងជានឹងឈ្នះបានពានរង្វាន់អនុស្សាវរីយ៍បាយ័នទម្ងន់៥៤គីឡូក្រាមនេះ ។
ដូច្នេះចាំមើល សម្រាប់ការជួបប្រកួតគ្នា រវាងជី ឆៃលី , វ៉ន វ៉ុន , ជុន សាវុធ និង សំណាងសម្បត្តិ តើវ៉ន វ៉ុន គេអាចយកឈ្នះដូចការរំពឹងទុកបានឬអត់? ។
វ៉ន វ៉ុន គេធ្លាប់វាយឈ្នះជើងចាស់ជុន សាវុធ ដោយពិន្ទុ ។តែយ៉ាងណាវ៉ន វ៉ុន មិនប្រាកដថាវាយឈ្នះ ជី ឆៃលី ដែលជាដៃគូប្រកួតក្នុងវគ្គជម្រុះលើកដំបូងនោះទេ ។ ចំពោះជុន សាវុធ និងសំណាង សម្បត្តិ ដែលជួបគ្នាក្នុងវគ្គជម្រុះលើដំបូងដែរនោះ ក៏ពុំទាន់អាសន្និដ្ឋានមុនថា អ្នកណាឈ្នះ ឡើងទៅវគ្គផ្តាច់ព្រ័ត្រនោះដែរ ។
ជុន សាវុធ ថ្វីត្បិតតែជាជើងចាស់មានទិចនិចប្រកួតល្អក្តី ប៉ុន្តែគេអន់កម្លាំងស៊ុហ្វ ឯ សំណាង សម្បត្តិ គេស្រករក្រោយសាវុធមែន តែគេវាយខ្លាំងជាង ។ តែយ៉ាងណា មិនទាន់ប្រាកដថា នរណាឈ្ណះ នរណាចាញ់ នោះទេ ។
គួរបញ្ជាក់ថា ការប្រកួតដណ្តើមប្រាក់លាននេះ ប្រព្រឹត្តិទៅតាមរូបមន្តជាMarathon គឺចាញ់ហាលអាវ ឈ្នះត្រូវបន្តការប្រកួតទៀត ទាល់តែរកឃើញជើងឯកម្ចាស់ពានក្នុងពេលតែមួយ ។ការប្រកួតចែកចេញជាពីរដំណាក់កាល ដែលដំណាក់កាលទី១ប្រកួតជម្រុះ ដើម្បីជម្រុះចោលពីរនាក់ដែលចាញ់ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្តាច់ព្រ័ត្រដណ្តើមពានអនុស្សាវរីយ៍របស់ស្ថានីយ៍ទូរទស្សន៍បាយ័ន ។
សូមបញ្ជាក់ថា ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្តាច់ព្រ័ត្រ គឺវាយ៥ទឹកតែមួយទឹកវាយតែ២នាទីទេ៕
Source: Kampuchea Thmey Daily
0 Comments