ភ្នំពេញ ៖ ដើម្បីចូលរួមចំណែកលើកកម្ពស់នូវសេវាថែទាំសុខភាព របស់ប្រជាជនក្រីក្រនៅតាមទីជនបទនានា ពីមួយថ្ងៃទៅមួយថ្ងៃ សមាគមគ្រូពេទ្យស្ម័គ្រចិត្តយុវជនសម្ដេចតេជោ បានពង្រីកសកម្មភាពបេសកកម្មចុះពិនិត្យព្យាបាល និងស្វែងរកដៃគូសហការទាំងនៅក្នុងប្រទេស និងក្រៅប្រទេសដើម្បីឲ្យការព្យាបាលអ្នកជំងឺកាន់តែមានវិសាលភាព និងប្រកបដោយប្រសិទ្ធភាពខ្ពស់។
ជាក់ស្ដែងនាល្ងាចថ្ងៃទី១៩ ខែធ្នូ ឆ្នាំ២០១៥ សមាគមគ្រូពេទ្យស្ម័គ្រចិត្តយុវជនសម្ដេចតេជោ បានចុះហត្ថលេខាលើអនុស្សរណៈយោគយល់ថ្មីមួយទៀតជាមួយអង្គការSaint John មកពីប្រទេសសិង្ហបុរី ក្រោមអធិបតីភាពលោកហ៊ុន ម៉ាណែត ប្រធានក្រុមប្រឹក្សាភិបាល សមាគមគ្រូពេទ្យស្ម័គ្រចិត្តយុវជនសម្តេចតេជោ និងលោកជំទាវ ពេជ ចន្ទមុនី ហ៊ុន ម៉ាណែត អនុប្រធានក្រុមប្រឹក្សាភិបាល ជាមួយលោកវេជ្ជបណ្ឌិត Chan Sze Hua ប្រធានផ្នែកបេសកកម្មមនុស្សធម៌ក្រៅប្រទេស និងមានការចូលរួមពីសំណាក់ ក្រុមការងារនៃស្ថាប័នទាំងពីរជាច្រើននាក់ផងដែរ។
លោកហ៊ុន ម៉ាណែត បានមានប្រសាសន៍ថា សកម្មភាពយើងមិនមែនជំនួសឲ្យក្រសួងសុខាភិបាលទេ តែជាផ្នែកមួយរួមចំណែកបំពេញបន្ថែម សម្រាប់បម្រើសេវាសុខភាពដល់ប្រជាជនក្រីក្រ ជាពិសេសប្រជាជនក្រីក្រនៅតាមទីជនបទនានាទូទាំងប្រទេស។ ការចុះហត្ថលេខាថ្ងៃនេះគឺជាចំណុចចាប់ផ្ដើមនៃកិច្ចសហប្រតិបត្តិការថ្មីមួយទៀត ដោយសារទឹកចិត្តរបស់សមាជិកនៃសមាគមទាំងពីរមានស្រដៀងគ្នា គឺការរួមចំណែកជួយការងារមនុស្សធម៌ ដូចនេះយើងសង្ឃឹមថាបេសកកម្មរបស់យើងនឹងរីកលូតលាស់ទៅមុខជាមួយគ្នា។
លោកវេជ្ជបណ្ឌិតChan Sze Hua និងសហការី បានគាំទ្រ និងជឿជាក់ថា ការចុះអនុស្សរណៈយោគយល់នាថ្ងៃនេះគឺជាឱកាសដ៏ប្រពៃដែលអាចឲ្យអង្គការរបស់លោក បានចូលរួមធ្វើការរួមគ្នាជាមួយសមាគមគ្រូពេទ្យស្ម័គ្រចិត្តយុវជនសម្តេចតេជោ ក្នុងការថែរក្សាសុខភាព ដល់ប្រជាជន ចាប់ពីថ្ងៃនេះនឹងទៅថ្ងៃអនាគត៕
សមាគមគ្រូពេទ្យស្ម័គ្រចិត្តយុវជនសម្តេចតេជោ និងអង្គការSaint John (Singapore)ចុះអនុស្សរណៈយោគយល់ដើម្បីពង្រីកការងារមនុស្សធម៌លើសេវាសុខភាព
0 Comments