ភ្នំពេញ ៖ នគរបាលខណ្ឌពោធិ៍សែនជ័យ បានធ្វើការចាប់ខ្លួនក្រុមចោរលួចរថយន្តបានម្នាក់ ក្រោយពេល ដែលក្រុមចោរទាំងនោះ ធ្វើសកម្មភាពលួចយករថយន្តម៉ាកតូយ៉ូតាកូរ៉ូឡា១គ្រឿង បានសម្រេច ហើយព្យាយាមរត់គេចខ្លួន ប៉ុន្តែបានរយៈពេលប្រមាណ២ម៉ោងប៉ុណ្ណោះ ក្រោយពីទទួលបានពាក្យបណ្ដឹងភ្លាម កម្លាំងបានចេញប្រតិបត្តិការ ស្រាវជ្រាវរកឃើញក្រុមចោរទាំងនោះ និងឃាត់ខ្លួនបានបីនាក់។
បន្ទាប់មកបាននាំទៅធ្វើការសាកសួរ នៅផ្នែកព្រហ្មទណ្ឌអធិការដ្ឋាននគរបាលខណ្ឌពោធិ៍សែនជ័យ ប៉ុន្តែក្រោយការសាកសួរ ឃើញថាជនដៃដល់ក្នុងការលួចរថយន្តនោះ មានតែម្នាក់ទេចំណែក២នាក់ទៀតមានប្រុសម្នាក់ និងស្រីម្នាក់ ជាគូសង្សារនឹងគ្នានោះ មិនមានការពាក់ព័ន្ធអ្វីឡើយ ហើយពួកគេបានបាត់បង់កាបូបលុយ និងទូរស័ព្ទដៃម៉ាក អាហ្វូនស៊ីច។ ពួកគេក៏បានសំណូមពរឲ្យប៉ូលិសប្រគល់ឲ្យពួកគេវិញផងដែរ មិនត្រូវយករបស់គេបែបនេះឡើយ។
ហេតុការណ៍នេះបានកើតឡើងកាលពីវេលាម៉ោង២៣និង៣០នាទីយប់ថ្ងៃទី២០ ខែធ្នូ ឆ្នាំ២០១៥ នៅចំណុច ក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនសែនជ័យ។
ជនសង្ស័យ ដែលត្រូវចាប់ខ្លួននោះ ឈ្មោះធឿន វិបុល ភេទប្រុស អាយុ២៧ឆ្នាំ មុខរបរបើកបររថយន្តកុងតឺន័រឲ្យក្រុមហ៊ុនសុកន ត្រេនស្ពត ស្នាក់នៅក្នុងភូមិត្រពាំងថ្លឹង សង្កាត់ចោមចៅខណ្ឌពោធិ៍សែនជ័យ។ ចំណែករថយន្ត ដែលត្រូវជនសង្ស័យលួច នោះម៉ាកតូយ៉ូតាកូរ៉ូឡា ពណ៌ខ្មៅ ស៊េរីឆ្នាំ១៩៩៧ ពាក់ស្លាកលេខ ភ្នំពេញ2N-5202 ជាកម្មសិទ្ធិរបស់បុរសឈ្មោះកុង បញ្ញា អាយុ២៧ឆ្នាំ មុខរបរលក់ដូរ មានទីលំនៅក្នុងភូមិកើតហេតុខាងលើ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ម្ចាស់រថយន្តបានទុករថយន្ត របស់ខ្លួននៅមុខផ្ទះ ហើយបានចូលដេកនៅខាងក្នុងផ្ទះ លុះក្រោយមកពេលភ្ញាក់ពីដេកម្ដងស្រាប់តែបាត់ឡានមិនឃើញ ក៏បានទៅប្ដឹងនគរបាលឲ្យជួយស្រាវជ្រាវរក។ បន្ទាប់ពីទទួលបានបណ្ដឹងហើយ នគរបាលបានធ្វើការស្រាវជ្រាវភ្លាមៗ ហើយបានប្រទះឃើញរថយន្ត ដែលមានភិនភាគដូចខាងលើ នៅចំណុចមុខក្លិបរីលែក ដែលមានទីតាំងស្ថិត នៅតាមបណ្ដោយផ្លូវលេខ២០១១ ក្នុងភូមិតាងួន សង្កាត់កាកាប ខណ្ឌពោធិ៍សែនជ័យ។ ភ្លាមនោះនគរបាល ក៏បានឃាត់ខ្លួនជនសង្ស័យ៣នាក់ ដែលកំពុងផឹកស៊ីនៅក្នុងហាងនោះជាមួយគ្នា ប៉ុន្តែក្រោយពេលនាំទៅសាកសួរទើបដឹងថា ជនដៃដល់ជាអ្នកលួចរថយន្តនោះ គឺមានតែម្នាក់ទេ។ ចំណែក២នាក់ទៀតមាន ប្រុសម្នាក់និងស្រីម្នាក់ ដែលជាគូសង្សារនឹងគ្នានោះមិនមានជាប់ពាក់ព័ន្ធនោះឡើយ។ ពួកគេគ្រាន់តែអ្នកផឹកស៊ីជាមួយដោយមិន ដឹងអ្វីទេ។ ក្រោយមកប៉ូលិសបានដោះលែងអ្នកមិនមានការពាក់ព័ន្ធ ឲ្យទៅវិញ ប៉ុន្តែមិនបានប្រគល់ កាបូបលុយ និងទូរស័ព្ទដៃម៉ាកអាហ្វូនស៊ីច ឲ្យពួកគេវិញឡើយ ហើយពួកគេបានសំណូមពរឲ្យលោកអធិការ ដែលជាមេកើយរបស់នគរបាលទាំងនោះរករបស់ទាំងនោះមកឲ្យខ្លួនវិញផង៕
ចាប់ខ្លួនចោរលួចឡានបានភ្លាមៗ បន្ទាប់ពីលួចបានពីរម៉ោង
0 Comments