ក្រុមចម្រុះដឹកនាំដោយប្រទេសអារ៉ាប៊ីសាអ៊ូឌីតដែលគាំទ្ររដ្ឋាភិបាលយេមែនបានទទួលស្គាល់កាលពីថ្ងៃព្រហស្បតិ៍ថា អាចនឹងមាន “ការខូចខាតបន្ទាប់បន្សុំ” ពីការវាយប្រហារកាលពីថ្ងៃទី២៣ខែសីហាដែលអង្គការសហប្រជាជាតិនិយាយថា បានសម្លាប់កុមារចំនួន២៦នាក់នៅភាគខាងត្បូងកំពង់ផែ Hodeida។
ក្រុមចម្រុះនេះបានទទួលការរិះគន់យ៉ាងធ្ងន់ធ្ងរពីសំណាក់ UN ចំពោះការស្លាប់ជនស៊ីវិលយ៉ាងច្រើនពីយុទ្ធនាការទម្លាក់គ្រាប់បែករយៈពេលជាងបីឆ្នាំរបស់ខ្លួននៅប្រទេសយេមែន។
មេបញ្ជាការក្រុមចម្រុះបានសារភាពកំហុសមួយចំនួនប៉ុន្តែបានចោទប្រកាន់ពួកឧទ្ទាមថា ជាទូទៅពួកគេបានប្រើប្រាស់ជនស៊ីវិលធ្វើជាខែលមនុស្ស។
បើទោះបីជាមានការអំពាវនាវម្តងហើយម្តងទៀតពី UN និងអង្គការសិទ្ធិមនុស្សក៏ដោយ ពុំមានសកម្មភាពវិន័យជាសាធារណៈឬការផ្លាស់ប្តូរបទបញ្ញត្តិនៃការចូលរួមរបស់ក្រុមចម្រុះនេះទេ។
ប្រមុខប្រតិបត្តិការមនុស្សធម៌របស់ UN លោក Mark Lowcock បាននិយាយនៅថ្ងៃបន្ទាប់ថា នៅក្នុងការវាយប្រហារកាលពីថ្ងៃទី២៣ខែសីហា យន្តហោះចម្បាំងរបស់ក្រុមចម្រុះបានសម្លាប់កុមារចំនួន២៦នាក់និងស្ត្រី៤នាក់នៅតំបន់ Al-Durayhimi ។
ក្រុមចម្រុះនេះបាននិយាយកាលពីថ្ងៃព្រហស្បតិ៍ថា បញ្ជាការដ្ឋានកងកម្លាំងរួមរបស់ខ្លួនឥឡូវនេះបានបញ្ចប់ការត្រួតពិនិត្យឡើងវិញបន្ទាប់ពីការវាយប្រហារនោះ។
អ្នកនាំពាក្យរបស់ក្រុមចម្រុះលោកវរសេនីយ៍ឯក Turki al-Maliki បាននិយាយនៅក្នុងសេចក្តីថ្លែងការណ៍មួយដែលផ្សាយដោយភ្នាក់ងារសារព័ត៌មានផ្លូវការរបស់អារ៉ាប៊ីសាអ៊ូឌីតថា “យោងតាមលទ្ធផលនៃការវាយតម្លៃដ៏ទូលំទូលាយបានបង្ហាញថា អាចមានការខូចខាតបន្ទាប់បន្សុំនិងការស្លាប់ជនស៊ីវិល”។
ការវាយប្រហារជាបន្តបន្ទាប់របស់ក្រុមចម្រុះដែលបានសម្លាប់ជនស៊ីវិលភាគច្រើនជាកុមារកាលពីខែមុនបានបង្កឲ្យមានសម្ពាធចំពោះសកម្មភាពសូម្បីតែពីសំណាក់អ្នកផ្គត់ផ្គង់អាវុធធំៗរបស់បណ្តារដ្ឋនានានៅរដ្ឋឈូងសមុទ្រអារ៉ាប់ក៏ដោយ។
ក្រុមចម្រុះនេះបានសម្តែងការសោកស្តាយកាលពីថ្ងៃសៅរ៍បន្ទាប់ពីការស៊ើបអង្កេតរបស់ខ្លួនទៅលើការវាយប្រហារនៅថ្ងៃទី៩ខែសីហាបានរកឃើញថា កំហុសត្រូវបានបង្កឡើងដែលជាហេតុនាំឲ្យមនុស្សចំនួន៥១នាក់ស្លាប់ដោយក្នុងនោះមានទាំងកុមារ៤០នាក់ផងដែរនៅភាគខាងជើងគ្រប់គ្រងដោយក្រុមឧទ្ទាម៕ AFP
Source: Kampuchea Thmey Daily
0 Comments