ភ្នំពេញ ៖ ជនជាតិចិន ស្រវឹងស្រា បើករថយន្តលឿន ខ្វះការប្រុងប្រយ័ត្ន បានជ្រុលទៅបុករបាំងថ្មពុះចែកទ្រូងផ្លូវខូចអស់ចំនួន២ផ្ទាំង រថយន្តផ្ទុះកង់ និងដាច់កាលេខូចខាតយ៉ាងធ្ងន់ធ្ងរ តែសំណាងអ្នកជិះ និងអ្នកបើកបររបួសស្រាល នាំគ្នាគេចខ្លួនអស់ កាលពីវេលាម៉ោង១១និង៣០នាទីយប់ ថ្ងៃទី៨ ខែមករា ឆ្នាំ២០១៩ តាមបណ្ដោយផ្លូវសហព័ន្ធរុស្ស៊ី ទល់មុខប្រលានយន្តហោះអន្តរជាតិភ្នំពេញស្ថិតនៅភូមិក្បាលដំរី សង្កាត់កាកាបទី២ ខណ្ឌពោធិ៍សែនជ័យ។
រថយន្តបង្កម៉ាក តូយ៉ូតា ALPHARD ពណ៌ស ពាក់ស្លាកលេខភ្នំពេញ 2AX-2081 បើកបរដោយបុរសជនជាតិចិន មានគ្នា២នាក់ ទិសដៅពីកើតទៅលិច ក្នុងល្បឿនយ៉ាងលឿន។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្តបង្ក បើកបរក្នុងទិសដៅពីកើតទៅលិច ក្នុងល្បឿនលឿនដូចហោះ ដោយដឹងថាបុរសជនជាតិចិនមានគ្នា២នាក់ នៅក្នុងរថយន្តនោះ ហើយបានបុករបាំងពុះចែកទ្រូងផ្លូវបណ្ដាលឲ្យបែកខ្ទេចរងការខូចខាតអស់ចំនួន២ផ្ទាំង។ ចំណែកឯរថយន្តបង្កបណ្តាលឲ្យបែកកង់លាន់ដូចគ្រាប់បែកផ្ទុះ និងដាច់ កាលេមួយខាងឆ្វេង ផ្អើលដល់ប្រជាពលរដ្ឋ លាន់មាត់គ្រប់គ្នាផងដែរ សង្ស័យថា អ្នកបើកបរ និងអ្នករួមដំណើរ មិនដឹងយ៉ាងណានោះឡើយ បន្ទាប់មកស្រាប់តែជនជាតិចិនទាំង២នាក់នោះ ពុំមានរងរបួសធ្ងន់ធ្ងរឡើយ។
ប្រភពដដែលបានបន្តទៀតថា ខណៈពេលគ្រោះថ្នាក់ភ្លាមៗ តៃកុងរថយន្តបង្ក និងអ្នករួមដំណើរដែលជាជនជាតិចិនបានគេចខ្លួនបាត់ស្រមោលតែម្តង។
ក្រោយពេលកើតហេតុ កម្លាំងនគរបាលខណ្ឌ បានទាក់ទងទៅជំនាញចរាចរណ៍រាជធានីភ្នំពេញដើម្បីវាស់វែង និងស្ទូចរថយន្តបង្កយកទៅរក្សាទុក រង់ចាំការដោះស្រាយថ្ងៃក្រោយ៕
Source: Kampuchea Thmey Daily
0 Comments