នាយករដ្ឋមន្ត្រីចក្រភពអង់គ្លេសលោកស្រី Theresa May បានឈ្នះការគាំទ្ររបស់សភាកាលពីថ្ងៃអង្គារដើម្បីចរចាឡើងវិញនូវកិច្ចព្រមព្រៀង Brexit របស់លោកស្រីដែលនេះជាការប្រែក្រឡាស់គោលនយោបាយដ៏សំខាន់មួយដែលបង្កើតឲ្យមានភាពតានតឹងជាមួយនឹងសហភាពអឺរ៉ុបក្រោយពីបានបដិសេធនូវការផ្លាស់ប្តូរណាមួយ។
ការសម្រេចចិត្តដ៏គួរឲ្យកត់សម្គាល់របស់លោកស្រី May ក្នុងការបោះបង់ចោលកតិកាសញ្ញាដែលលោកស្រីបានឈានដល់ជាមួយមេដឹកនាំ EU ចំនួន២៧រូបនៅឯកិច្ចប្រជុំកំពូលមួយកាលពីខែមុនបានកើតឡើងខណៈដែលចក្រភពអង់គ្លេសកំពុងស្ថិតនៅលើផ្លូវនៃការចាកចេញពីប្លុកនេះបន្ទាប់ពីមានភាពវឹកវរនៃភាពចលាចលផ្នែកនយោបាយនិងសេដ្ឋកិច្ចរយៈពេល៤៦ឆ្នាំ។
ប្រាក់ផោនបានធ្លាក់ចុះយ៉ាងឆាប់រហ័សដោយសារការភ័យខ្លាចចំពោះសេណារីយ៉ូគ្មានកិច្ចព្រមព្រៀងស្របពេលដែលសមាជិកសភាបានបោះឆ្នោតតាមរយៈការធ្វើវិសោធនកម្មមួយដែលនិយាយថា ពួកគេនឹងគាំទ្រកិច្ចព្រមព្រៀងលែងលះនេះលុះត្រាណាតែលក្ខខណ្ឌរក្សាព្រំដែនអៀរឡង់ឲ្យបើកចំហត្រូវបានដកចេញ។
អ្នកនាំពាក្យរបស់មេដឹកនាំសហភាពអឺរ៉ុបលោក Donald Tusk បាននិយាយថា កិច្ចព្រមព្រៀងនេះមិនបើកចំហសម្រាប់ការចរចាឡើងវិញទេខណៈដែលប្រធានាធិបតីបារាំងលោក Emmanuel Macron បាននិយាយថា វាគឺជាកិច្ចព្រមព្រៀងដ៏ល្អបំផុតដែលអាចធ្វើទៅបាន។
សមាជិកសភាក៏បានបោះឆ្នោតគាំទ្រចំពោះវិធានការមិនជាប់កាតព្វកិច្ចផងដែរដែលបានបដិសេធចក្រភពអង់គ្លេសពីការចាកចេញពីសហភាពអឺរ៉ុបដោយគ្មានកិច្ចព្រមព្រៀងដកខ្លួន។
បច្ចុប្បន្ននេះ លោកស្រី May កំពុងប្រឈមនឹងបញ្ហាប្រឈមដ៏គួរឲ្យភ្ញាក់ផ្អើលមួយដែលបញ្ចុះបញ្ចូលទីក្រុងប្រ៊ូសសែលឲ្យបើកកិច្ចចរចាឡើងវិញដែលនឹងចំណាយរយៈពេល១៨ខែដើម្បីបញ្ចប់។
លោកស្រីបាននិយាយថា ការអនុម័តរបស់សភាក្នុងការធ្វើវិសោធនកម្មច្បាប់នេះបានផ្តល់ឲ្យលោកស្រីនូវ “អាណត្តិ” ដើម្បីស្វែងរកការផ្លាស់ប្តូរស្របច្បាប់ចំពោះកិច្ចព្រមព្រៀងដកខ្លួន៕ AFP
Source: Kampuchea Thmey Daily
0 Comments