សាន ផានិត និងឧកញ៉ាម្នាក់ ធ្វើឲ្យលោក អ៊ឹម ជីវ៉ា ស្រក់ទឹកភ្នែកដោយមិនដឹងខ្លួន

ភ្នំពេញ ៖ តារាចម្រៀងរៀមច្បងសិល្បៈម្ចាស់បទ ទូរស័ព្ទប្រាប់ផង លោក សាន ផានិត និងលោកឧកញ៉ាចិត្តធម៌ម្នាក់ទៀត បានធ្វើឲ្យតារាសម្តែងប្រុសលោក អ៊ឹម ជីវ៉ា ស្រក់ទឹកភ្នែកដោយមិនដឹងខ្លួនព្រោះតែទង្វើដ៏ល្អ និងទឹកចិត្តសប្បុរសធម៌របស់បុគ្គលទាំងពីររូបនេះ ក្នុងការចូលរួមជួយសម្រួលជីវភាពគ្រាជួបការលំបាក។

លោក អ៊ឹម ជីវ៉ា បានរៀបរាប់បង្ហាញពីអារម្មណ៍រំភើបនិងក្តុកក្តួលចេញពីចិត្តថា ថ្ងៃនេះចង់និយាយចេញពីចិត្តម្តងតារាចម្រៀងបងប្រុស សាន ផានិត និងលោកឧកញ៉ាLi Yang ធ្វើអោយខ្ញុំស្រក់ទឹកភ្នែកដោយមិនដឹងខ្លួន។ ខ្ញុំបាទពិតជាសូមថ្លែងអំណររគុណបំផុតចំពោះទឹកចិត្តសប្បុរសធម៌របស់លោកឧកញ៉ា Li Yang CEO Atsolutions Real Estate ក្រុមហ៊ុនអចលនទ្រព្យកម្ពុជា និងបងប្រុស សាន ផានិត ។

តារាប្រុសលោក អ៊ឹម ជីវ៉ា បានបញ្ជាក់ថា អរគុណលោកទាំងពីរដែលបានជួយឧបត្ថម្ភដល់ខ្ញុំបាទចំនួន៥០០ដុល្លារដើម្បីអោយខ្ញុំបាទបានទៅធ្វើសប្បុរសធម៌ខ្លះនិងយកមកជួសជុលរថយន្តខ្លះពេលគ្រោះថ្នាក់ចរាចរណ៍នៅខេត្តកោះកុង ទឹកចិត្តដ៏ល្អប្រពៃរបស់លោកឧកញ៉ានិងបងប្រុសខ្ញុំនឹងចងចាំទុកមួយជីវិត ដែលបានជួយប្អូនពេលប្អូនជួបទុក្ខ។ ខ្ញុំសូមបញ្ជាក់ថា មកដល់ម៉ោងនេះរថយន្តរបស់ខ្ញុំបាទមិនទាន់ដោះស្រាយចប់ឡើយគឺនៅអធិការដ្ឋានស្រុកស្រែអំបិលដដែល។

តារាប្រុសរូបនេះបានបន្តថា បើសិនជាដោះស្រាយចប់ទើបខ្ញុំបាទបានយករថយន្តនោះទៅលក់ឬ ជួសជុលទើបមានអីជិះ តែពេលនេះចង់ទៅណាមកណាគឺ ត្រូវជិះម៉ូតូឌុបឬផាអេបត្រង់ចំណុចនេះគឺមិនមែនត្អូញត្អែរយករថយន្តគ្រោះថ្នាក់មកធ្វើអាជីវកម្មចង់បានអំណោយនោះទេ ហើយក៏មិនបានទៅអំពាវនាវដើរសុំគេដែរ គឺចង់ប្រាប់អោយដឹងថាលុយញើសឈាមដែលខំរកវាលំបាកប៉ុណ្ណានៅពេលដែលជួបគ្រោះថ្នាក់ ហើយក៏គ្មានអ្នកណាមកលំបាកជាមួយយើងដែរ គឺអ្នកខ្លះមិនបានជួយខ្ញុំទេគឺបានតែដើរនិយាយដើមយើងសំអុយកេរ្តិ៍ឈ្មោះខ្ញុំដោយមិនដឹងខ្លួន បើមិនបានជួយខ្ញុំ កុំនិយាយអាក្រក់ពីខ្ញុំ ហើយមនុស្សដែលគេជួយយើងពិតប្រាកដគេមិនដែលនិយាយផង ។

លើសពីនេះតារាសម្តែងលោក អ៊ឹម ជីវ៉ា បានបន្ថែមថាកន្លងមកខ្ញុំពិតជាអរគុណបងប្អូនលោកឧកញ៉ាឯកឧត្តម សិល្បករ និងមិត្តFacebook តែងតែបារម្ភផ្ញើសារមកសួរនាំ ដោយមានបងប្អូនពួកគាត់ផ្តល់កម្លាំងទឹកចិត្តដល់ខ្ញុំទាំងពេលវេលា ស្មារតីផ្លូវចិត្តនិងថវិកា បងប្អូនណាដែលជួយខ្ញុំពេលមានទុក្ខលំបាកខ្ញុំនឹងចងចាំពួកគាត់អស់មួយជីវិតរហូតដល់ថ្ងៃខ្ញុំស្លាប់។ សូមសំណូមពរដល់ព្រះរាជអាជ្ញាខេត្តកោះកុងមេត្តាជួយដោះស្រាយអោយបានលឿនផងព្រោះនឹងអាលឆាប់ចប់បានយករថយន្តនេះទៅជួសជុលឬលក់បានថវិកាបន្តិចបន្តួចរកទិញរបស់ជិះវិញ៕