ចំនួនអ្នកស្លាប់ដោយសារការបាក់ទំនប់នៅប្រទេសប្រេស៊ីលបានកើនឡើងដល់៨៤នាក់កាលពីថ្ងៃអង្គារ ស្របពេលដែលក្រុមហ៊ុនរ៉ែ Vale បានប្រកាសថា ការរុះរើរចនាសម្ព័ន្ធស្រដៀងគ្នានឹងប៉ះពាល់ដល់ផលិតកម្ម។
អាជ្ញាធរប្រេស៊ីលកំពុងបង្កើនការស៊ើបអង្កេតរបស់ពួកគេលើក្រុមហ៊ុន Vale ខណៈវិស្វករចំនួន៥នាក់ដែលជាប់ពាក់ព័ន្ធនឹងអាជ្ញាប័ណ្ណប្រតិបត្តិការនិងការត្រួតពិនិត្យចុងក្រោយនៃទំនប់នេះត្រូវបានចាប់ខ្លួនតាមបញ្ជារបស់រដ្ឋអាជ្ញានៅក្នុងរដ្ឋ Minas Gerais ដែលជាកន្លែងគ្រោះមហន្តរាយនេះកើតឡើងកាលពីថ្ងៃសុក្រមុននៅអណ្តូងរ៉ែមួយរបស់ក្រុមហ៊ុន។
លោក Flavio Godinho អ្នកនាំពាក្យនាយកដ្ឋានការពារស៊ីវិលក្នុងរដ្ឋ Minas Gerais បាននិយាយថា ចំនួនអ្នកស្លាប់បានកើនឡើងពី៦៥នាក់ទៅ៨៤នាក់ខណៈចំនួនអ្នកបាត់ខ្លួនបានធ្លាក់ចុះពី២៩២នាក់មក២៧៦នាក់។
ការបាក់ទំនប់នៅអណ្តូងរ៉ែ Vale ក្បែរទីក្រុង Brumadinho បានកើតឡើងបីឆ្នាំបន្ទាប់ពីគ្រោះមហន្តរាយស្រដៀងគ្នានេះនៅតំបន់មួយទៀត។ ការបាក់ទំនប់កាលពីឆ្នាំ២០១៥នៅជិតតំបន់ Mariana បានសម្លាប់មនុស្សចំនួន១៩នាក់ហើយបង្កទៅជាអ្វីដែលត្រូវបានគេចាត់ទុកថាជាគ្រោះមហន្តរាយបរិស្ថានអាក្រក់បំផុតមិនធ្លាប់មានពីមុនមកនៅក្នុងប្រទេសប្រេស៊ីល។
ប្រព័ន្ធផ្សព្វផ្សាយរបស់ប្រទេសប្រេស៊ីលបានប៉ាន់ស្មានថា ក្រុមប្រឹក្សាភិបាលនិងនាយកប្រតិបត្តិកំពូលរបស់ក្រុមហ៊ុន Vale អាចនឹងត្រូវជំនួសតំណែង។ ភាគច្រើននៃអ្នកស្លាប់និងបាត់ខ្លួនគឺជាកម្មករនៅអណ្តូងរ៉ែ។
អាជ្ញាធរបានបញ្ជាឲ្យបង្កកទ្រព្យសម្បត្តិរបស់ក្រុមហ៊ុន Vale ចំនួន៣ពាន់លានដុល្លារដើម្បីបង់ប្រាក់ពិន័យ ប្រាក់សំណងនិងប្រាក់ខែបុគ្គលិកដល់ក្រុមគ្រួសាររបស់ពួកគេ។
ការស្វែងរកសាកសពបានបន្តកាលពីថ្ងៃអង្គារដោយក្រុមទាហានអ៊ីស្រាអែលបានចូលរួមជាមួយក្រុមប្រេស៊ីលដែលបានស្រាវជ្រាវអស់រយៈពេលជាច្រើនថ្ងៃមកហើយអំពីការរាលដាលនៃភក់ដែលត្រូវបានបញ្ចេញដោយទំនប់នេះ។
បុរសបានប្រើដៃដើម្បីកកាយដល់ទៅជម្រៅ១៥ម៉ែត្រដើម្បីរកសាកសពដែលជាប់ក្នុងភក់។ សាកសពទាំងនោះត្រូវបានគេច្រកក្នុងថង់ហើយត្រូវបានដឹកតាមអាកាសដោយឧទ្ធម្ភាគចក្រ។
គ្មានអ្នកនៅរស់ណាម្នាក់ត្រូវបានគេរកឃើញទេចាប់តាំងពីថ្ងៃសៅរ៍មក៕ AFP
Source: Kampuchea Thmey Daily
0 Comments