ភ្នំពេញ ៖ ក្រសួងវប្បធម៌ និងវិចិត្រសិល្បៈ បានរៀបចំធ្វើការអភិរក្ស និងចុះបញ្ជីសាកសពជនរងគ្រោះ ដែលបានស្លាប់ក្នុងរបបប្រល័យពូជសាសន៍ប៉ុលពត នៅតាមទីកន្លែងវាលពិឃាដ ទូទាំង ប្រទេស ដើម្បីទុកជាភស្តុតាង និងឯកសារសម្រាប់មនុស្សជំនាន់ក្រោយកុំឲ្យបំភ្លេចនូវសោក នាដកម្ម ដ៏ឃោរឃៅ និងព្រៃផ្សៃក្នុងអំឡុង៣ឆ្នាំ ៨ខែ និង២០ថ្ងៃកន្លងមក ហើយការអភិរក្សនេះ គឺដើម្បីរក្សាទុកជាភស្តុតាងជូនជនរងគ្រោះទាំងអស់ និងទុកជូនដល់ប្រជាជនមួយចំនួនតូច ដែលមានមតិផ្ទុយ មិនទទួលស្គាល់ថ្ងៃ៧ មករា ១៩៧៩ និងមិនដឹងគុណថ្ងៃ៧មករា ១៩៧៩នោះ។
លោក វឿន វុទី្ធ ប្រធាននាយកដ្ឋានបុរាណវិទ្យា និងបុរេប្រវតិ្តវិទ្យា នៃក្រសួងវប្បធម៌ និងវិចិត្រសិល្បៈ បានលើកឡើងនៅលើគេហទំព័រហ្វេសប៊ុករបស់លោកឲ្យដឹងថា រាជរដ្ឋាភិបាល ក៏ដូចជា ក្រសួងវប្បធម៌ និងវិចិត្រសិល្បៈ កំពុងយកចិត្តទុកដាក់ថែរក្សាទីតាំងប្រវតិ្តសាស្ត្រជនរងគ្រោះ ដែលបានបាត់បង់ជីវិត ក្នុងរបបប្រល័យពូជសាសន៍ ប៉ុល ពត ដើម្បីធ្វើការអភិរក្សទុកជា ភស្ដុតាងឲ្យបានដឹង សម្រាប់អ្នកជំនាន់ក្រោយៗទៀត។
លោកបានបន្ដថា ការអភិរក្សនេះ គឺដើម្បីរក្សាទុកជាភស្តុតាងជូនជនរងគ្រោះទាំងអស់ និងទុកជូនដល់ប្រជាជនមួយចំនួនតូច ដែលមានមតិផ្ទុយ មិនទទួលស្គាល់ថ្ងៃ៧ មករា ១៩៧៩ និងមិនដឹងគុណថ្ងៃ៧ មករា ១៩៧៩ សម្រាប់ជាភស្តុតាងបង្ហាញនូវការវិភាគលើសាកសព លលាដ៏ក្បាលសាកសពជនរងគ្រោះ ដែលមានស្នាមវៃ មានស្នាមកាប់ មានស្នាមអារក មានស្នាមអារស្លឹកត្រចៀក ចងស្លាបសេក និងក្រណាត់រំមុខជាដើម។
លោកបានបន្ដទៀតថា រហូតមកដល់ពេលនេះ នាយកដ្ឋានបុរាណ វិទ្យា និងបុរេប្រវត្តិវិទ្យា នៃក្រសួងវប្បធម៌ និងវិចិត្រសិល្បៈ បានបញ្ចប់ គម្រោងអភិរក្សអដ្ឋិធាតុ ជនរងគ្រោះដែលបានស្លាប់ក្នុងរបបកម្ពុជាប្រជាធិបតេយ្យនៅក្នុងមជ្ឈមណ្ឌលប្រល័យពូជសាសន៍ជើងឯក ក្នុងរាជធានីភ្នំពេញប្រកបដោយជោគជ័យ។
លោកក៏បានថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចអគ្គមហាសេនាបតី តេជោ ហ៊ុន សែន ដែលបានចេញជាគោលការណ៍ បង្កើតក្រុមការងារអភិរក្សមួយក្នុងគោល បំណងថែរក្សា អដ្ឋិធាតុ របស់ជនរងគ្រោះ ដែលបានស្លាប់ក្នុងរបបកម្ពុជាប្រជាធិបតេយ្យ ឲ្យនៅគង់វង្ស ក៏ដូចជា រក្សានូវភស្តុតាងប្រវត្តិសាស្ត្រមួយនេះ សម្រាប់ជាមេរៀនដល់មនុស្ស ជំនាន់ក្រោយអំពី ប្រវត្តិដ៏ ឈឺចាប់ និងរន្ធត់នៅក្នុងរបបកម្ពុជាប្រជាធិបតេយ្យ ដើម្បីកុំឲ្យរបប ដ៏យង់ឃ្នងមួយនេះ កើតឡើងសាជាថ្មី នៅលើទឹកដីកម្ពុជាបន្ដទៀត។
លោកបានបន្ថែមថា គម្រោងអភិរក្សមួយនេះមានលក្ខណៈវិទ្យាសាស្ត្រ ដែលត្រូវបានអនុវត្តន៍ដោយបុរាណវិទូខ្មែរ និងយករូបមន្តបច្ចេកទេសពីបរទេស ដើម្បី ថែរក្សា អដ្ឋិធាតុទាំងនោះ ឲ្យមានអាយុកាលយូរ អង្វែង និងមានតម្លៃសម្រាប់ជា ប្រវត្តិសាស្ត្រ កម្ពុជាតទៅអនាគត។
សូមបញ្ជាក់ថា គិតត្រឹមដើមឆ្នាំ២០១៩នេះ នាយកដ្ឋានបុរាណវិទ្យា និងបុរេប្រវត្តិវិទ្យា នៃក្រសួងវប្បធម៌ និងវិចិត្រសិល្បៈបានផ្ទៀងផ្ទាត់ អភិរក្ស និងចុះបញ្ជីសាកសព ជនរងគ្រោះ (ការធ្វើកោសល្យវិច្ច័យ) បានជាង១០ម៉ឺនអដិ្ឋធាតុ និងផ្នូរសាកសពរួម នៅតាមទីតាំងវាល ពិឃាដ នៅទូទាំងប្រទេស គឺមានជិត២០០ផ្នូរសាកសពរួម៕
Source: Kampuchea Thmey Daily
0 Comments