បន្ទាយមានជ័យ ៖ កងកម្លាំង និងអ្នកជួយ បានសង្គ្រោះភ្ញៀវជិត១.០០០នាក់ តែមានរបួសរបួសស្រាល៦នាក់ ក្នុងឧបទ្ទវហេតុទុស្សេខ្សែភ្លើង ឆេះជណ្ដើរយន្ត នៃអគារស្នាក់នៅដ៏ធំ កម្ពស់១៨ជាន់ក្នុងប្លុកកាស៊ីណូហ្គោលដិនក្រោន(Golden Crown Casino) របស់លោកឧកញ៉ាកុក អាន ក្បែរច្រកទ្វារអន្តរជាតិប៉ោយប៉ែត ខ្លងលឹក នាភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីវេលាម៉ោង៩និង៣០នាទី យប់ ថ្ងៃ៧ ខែមករា ឆ្នាំ២០១៩។
លោកវរសេនីយ៍ ធិន ស៊ិនដេត អធិការនគរបាលក្រុងប៉ោយប៉ែត បានឲ្យកម្ពុជាថ្មីដឹងនៅថ្ងៃទី៨មករាថា ករណីទុស្សេជណ្ដើរយន្តផ្នែកខាងក្រៅ នៃអគារខាងលើ មានកម្លាំងសមត្ថកិច្ចចម្រុះយ៉ាងច្រើន បានអន្តរាគមន៍ជួយពន្លត់ សង្គ្រោះ។
ក្នុងនោះដែរ លោកឧត្ដមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ក៏បានដឹកនាំកម្លាំងរាប់រយនាក់ និងរថយន្តពន្លត់អគ្គិភ័យពីស្នងការដ្ឋានក្រុងប៉ោយប៉ែត និងស្រុកនានា រួមនឹងរថយន្តពន្លត់អគ្គិសនី នៃក្រុមហ៊ុនកាស៊ីណូ ទាំងអស់១០គ្រឿង ពន្លត់ភ្លើងឆាបឆេះដ៏សន្ធោសន្ធៅនោះផងដែរ។
លោកបន្តថា ក្នុងនោះកម្លាំងសន្តិសុខកាស៊ីណូ កម្លាំងនគរបាល ធ្វើការក្នុងកាស៊ីណូ បុគ្គលិកសណ្ឋាគារ និងកម្លាំងចម្រុះ បានជួយសម្រួលសង្គ្រោះភ្ញៀវខ្មែរ ចិន និងជនបរទេសផ្សេងទៀត ដែលស្នាក់ក្នុងអគារខាងលើប្រមាណ១.០០០នាក់ មកតាមច្រកចេញ(Exit Way) បានដោយជោគជ័យ។
ប៉ុន្តែមានបុគ្គលិកខ្មែរ៥នាក់ និងភ្ញៀវជនជាតិចិន១នាក់ រងរបួសស្រាល ដោយសារពួកគេជាប់គាំងក្នុងជណ្ដើរយន្តដែលឆ្លងចរន្តអគ្គិសនី(ទុស្សេ)នោះ ហើយហប់ ថប់ដង្ហើមនឹងផ្សែងភ្លើងឈ្លក់ផង ពីការបាញ់ទឹកពន្លត់ផង។
ជនរងគ្រោះរបួសស្រាលទាំងនោះ បាននិងកំពុងសង្គ្រោះ ពិនិត្យព្យាបាលនៅមន្ទីរពេទ្យបង្អែកក្រុងប៉ោយប៉ែត។
លោក ធិន ស៊ិនដេត បន្តថា ក្នុងប្រតិបត្តិការសង្គ្រោះនោះ កម្លាំង និងរថយន្តពន្លត់អគ្គិភ័យគ្រប់គ្រងស្ថានការណ៍ពន្លត់បាននៅម៉ោង១១យប់ នាយប់ដដែលនោះ។ ចំណែកការខូចខាតសម្ភារៈវិញ គឺខូចខាតជណ្ដើរយន្តផ្នែកខាងក្រៅ និងសំណង់ នៃផ្នែកពាក់ព័ន្ធនោះ មានតម្លៃរាប់ម៉ឺនដុល្លារឯណោះ៕
Source: Kampuchea Thmey Daily
0 Comments