ភ្នំពេញ ៖ កម្លាំងនគរបាលអន្តរាគមន៍ខណ្ឌពោធិ៍សែនជ័យ សហការជាមួយកម្លាំងនគរបាលប៉ុស្តិ៍ ល្បាត ពួនស្ទាក់ក្នុងតំបន់ភូមិសាស្ត្រស្មុគស្មាញ ឈានដល់ឃាត់ជនសង្ស័យចែកចាយថ្នាំញៀនចំនួន២នាក់ រួមទាំងថ្នាំញៀនចំនួន៩កញ្ចប់ កាលពីវេលាម៉ោង៩និង៥០នាទីយប់ ថ្ងៃទី៨ ខែមករា ឆ្នាំ២០១៩ តាមបណ្ដោយផ្លូវវេងស្រេង ទល់មុខក្លិប មីតណាយ ស្ថិតនៅភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ។
ជនសង្ស័យទី១.ឈ្មោះ គីង ជាក់ឡេង ភេទប្រុស អាយុ១៩ឆ្នាំ មុខរបរលក់ថ្នាំញៀន ស្នាក់នៅមិនពិតប្រាកដ មានស្រុកកំណើតនៅស្រុកកោះសូទិន ខេត្តកំពង់ចាម។ និងម្នាក់ទៀត ដោយមិនបានប្រាប់ឈ្មោះ ជាអ្នករត់ម៉ូតូកង់បី។
តាមប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកើតហេតុ កម្លាំងនគរបាលអន្តរាគមន៍ខណ្ឌពោធិ៍សែនជ័យ សហការជាមួយកម្លាំងនគរបាលប៉ុស្តិ៍ចោមចៅទី១ ដោយមានចំនួន១២នាក់ បានចេញល្បាតនៅក្នុងភូមិសាស្ត្រដែលស្មុគស្មាញ និងសំបូរទៅដោយបទល្មើស ជាពិសេស គឺថ្នាំញៀនជាដើម។
ប្រភពបន្ដថា នៅពេលសមត្ថកិច្ចល្បាតមកដល់ចំណុចមុខក្លិបមីតណាយ ដោយមើលទៅរញ៉េរញ៉ៃពេញផ្លូវ ហើយមានការសង្ស័យ បានធ្វើការឆែកឆេរលើយុវជនមួយចំនួន ហើយបានរកឃើញ ថ្នាំញៀន នៅលើជនសង្ស័យខាងលើ ដោយដាក់ក្នុងហោប៉ៅ និងកំប៉ុងតូច ហើយសមត្ថកិច្ចឃាត់ភ្លាមៗផងដែរ។
ជនសង្ស័យ បានសារភាពថា ខ្លួនពិតជាអ្នកចែកចាយថ្នាំញៀនពិតប្រាកដមែន ហើយទើបនឹងលក់ដាច់បាន២កញ្ចប់ប៉ុណ្ណោះ។
ក្រោយពេលកើតហេតុ ជនសង្ស័យទាំង២នាក់ ត្រូវសមត្ថកិច្ចអន្តរាគមន៍ខណ្ឌពោធិ៍សែនជ័យបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមនីតិវិធី៕
Source: Kampuchea Thmey Daily
0 Comments