ការ​ប្រយុទ្ធ​សម្រាប់​ទីក្រុង​របស់​ប្រទេស​អា​ហ្វ​ហ្គា​នី​ស្ថាន​ បាន​រាលដាល​ថ្វីបើ​រដ្ឋាភិបាល​អះអាង​ជ័យជំនះ

ការ​ប្រយុទ្ធ​គ្នា​សម្រាប់​ទីក្រុង Ghazni ភាគ​ខាងកើត​ប្រទេស​អា​ហ្វ​ហ្គា​នី​ស្ថាន​បាន​ចូលដល់​ថ្ងៃទី​បី​ហើយ ​ខណៈ​ពួក​សកម្មប្រយុទ្ធ​តា​លី​បង់​និង​កងកម្លាំង​សន្តិសុខ​បាន​ចូលរួម​ក្នុងការ​ប៉ះទង្គិច​គ្នា​ទ្រង់ទ្រាយ​ធំ​កាលពី​ថ្ងៃអាទិត្យ​បើទោះបីជា​ក្រុង​កា​ប៊ុល​បាន​អះអាងថា ទីក្រុង​នេះ​ស្ថិតនៅក្រោម​ការគ្រប់គ្រង​របស់​រដ្ឋាភិបាល​ក៏ដោយ។

អ្នកយកព័ត៌មាន​រប​ស់ AFP បាន​និយាយថា ពួក​យុទ្ធ​ជនតា​លី​បង់​បាន​សម្រុកចូល​ទីក្រុង​នេះ​ដោយ​ដុត​ការិយាល័យ​រដ្ឋាភិបាល​និង​គ្រប់គ្រង​ប៉ុស្តិ៍​ប៉ូលិស​ជាច្រើន​ខណៈ​កង​យោធា​ដែល​ដាក់ពង្រាយ​ពី​ក្រុង​កា​ប៊ុល​បាន​ចូល​តំបន់​នោះ​យឺតៗ​ដើម្បី​ប្រឈម​នឹង​ក្រុម​បះបោរ​។​

យោងតាម​ប្រជាពលរដ្ឋ​និង​ក្រុមមន្ត្រី​បាន​ឲ្យ​ដឹងថា ប្រជាពលរដ្ឋ​បាន​លាក់ខ្លួន​នៅក្នុង​ផ្ទះ​របស់​ពួកគេ​ឬ​ប៉ុនប៉ង​រត់គេច​ពី​ការប្រយុទ្ធ​គ្នា​។​

លោក Amanullah Kamrani អនុប្រធាន​ក្រុមប្រឹក្សា​ខេត្ត Ghazni បាន​ប្រាប់ AFP ពី​ទីក្រុង​កា​ប៊ុល​ថា “​ស្ថានភាព​គឺមាន​ភាពវឹកវរ​។ នៅក្នុង​ទីក្រុង Ghazni, មានតែ​ទីស្នាក់ការ​ប៉ូលិស ការិយាល័យ​អភិបាល​និង​នាយកដ្ឋាន​ពីរ​បី​ប៉ុណ្ណោះ​ដែល​ស្ថិតក្រោម​ការគ្រប់គ្រងរ​បស់​កងកម្លាំង​អា​ហ្វ​ហ្គា​នី​ស្ថាន​រីឯ​កន្លែង​នៅ​សេសសល់​គឺ​ស្ថិតនៅក្រោម​ការគ្រប់គ្រង​របស់​ពួក​តា​លី​បង់​”​។​

សេវា​ទូរស័ព្ទ​ចល័ត​ក្នុង​ខេត្ត​នេះ​នៅតែ​ត្រូវបាន​កាត់ផ្តាច់​បន្ទាប់ពី​ពួក​សកម្មប្រយុទ្ធ​បាន​បំផ្លាញ​ប៉ម​ទូរគមនាគមន៍​មួយ​និង​បាន​តម្រង់​គោលដៅ​លើ​ការិយាល័យ​ប្រព័ន្ធ​ផ្សព្វផ្សាយ​ជាច្រើន​នៅ​ទីក្រុង Ghazni ដែលជា​ហេតុ​ធ្វើ​ឲ្យ​ព័ត៌មាន​ពិបាក​ក្នុងការ​ផ្ទៀងផ្ទាត់​។​

កង​យោធា​អា​ហ្វ​ហ្គា​នី​ស្ថាន​បាន​និយាយថា ប្រតិបត្តិការ​បោសសម្អាត​ដែល​សំដៅ​ទៅលើ​ពួក​យុទ្ធ​ជនតា​លី​បង់​កំពុង​បន្ត​ហើយ​អះអាងថា ពួកគេ​នៅតែ​គ្រប់គ្រង​ការិយាល័យ​រដ្ឋាភិបាល​សំខាន់ៗ​។​

លោក​ឧ​ត្ត​ម​សេនីយ៍ Sharif Yaftali ដែលជា​មន្ត្រី​យោធា​កំពូល​របស់​អា​ហ្វ​ហ្គា​នី​ស្ថាន​បាន​និយាយ​នៅក្នុង​សន្និសីទ​សារព័ត៌មាន​មួយ​កាលពី​ថ្ងៃអាទិត្យ​ថា “​ពួក​តា​លី​បង់​កំពុង​លាក់ខ្លួន​នៅតាម​ផ្ទះ​និង​ហាង​លក់ទំនិញ​របស់​ប្រជាជន​។ ដើម្បី​ចៀសវាង​គ្រោះថ្នាក់​ដល់​ជន​ស៊ីវិល កងកម្លាំង​របស់​យើង​កំពុងធ្វើដំណើរ​យ៉ាង​យឺតៗ​”​។​
គួរ​បញ្ជាក់ថា ទីក្រុង Ghazni បាន​ស្ថិតនៅក្រោម​គ្រោះថ្នាក់​កាន់តែខ្លាំង​ពី​ការវាយប្រហារ​របស់​ពួក​យុទ្ធ​ជនតា​លី​បង់អស់​រយៈពេល​ជាច្រើន​ខែ​មកហើយ​ដោយមាន​របា​យ​ការណ៍​បង្ហាញថា ក្រុម​បះបោរ​បាន​ជ្រៀតចូល​ទីក្រុង​នេះ​៕

​

Source: Kampuchea Thmey Daily