ភ្នំពេញ ៖ លោក ឃី ឆៃ ចៅក្រមជំនុំជម្រះនៃសាលាដំបូងរាជធានីភ្នំពេញនៅព្រឹកថ្ងៃទី១៣ ខែសីហាឆ្នាំ២០១៨ បានបើកសវនាការកាត់ទោសលើបុរសជាតិជាតិរុស្សី២នាក់ ពាក់ព័ន្ធបទល្មើស លួចមានស្ថានទម្ងន់ទោស តាមមាត្រា៣៥៣.៣៥៧ នៃក្រមព្រហ្មទណ្ឌ និងបទប្រើប្រាស់ដោយខុសច្បាប់នូវសារធាតុញៀន តាមមាត្រា៤៥នៃច្បាប់ស្តីពីការត្រួតពិនិត្យគ្រឿងញៀនកម្ពុជា។
នៅក្នុងពេលសវនាការជនត្រូវចោទឈ្មោះ ZAMETNYA ALEXANDER អាយុ៣១ឆ្នាំបានឆ្លើយបដិសេធថា ខ្លួនមិនបានលួចលុយក្នុងទូATM នោះទេ ដោយសារតែខ្លួនខ្វះលុយធ្វើដំណើរទៅស្រុកវិញខ្លួនក៏បានជួបបុរសម្នាក់បាននិយាយថាបើចង់បានលុយឲ្យខ្លួនចូលទៅបើកទូATMនោះ ហើយថតមកឲ្យគេមក គេនឹងឲ្យលុយ ចំពោះរឿងប្រើប្រាស់គ្រឿងញៀនខ្លួនមិនបានប្រើនោះទេ។
ចំណែកជនត្រូវចោទឈ្មោះ TELENKOV IVAN អាយុ៣០ឆ្នាំ ក៏បានឆ្លើយបដិសេធដែរថាខ្លួនមិនបានចូលទៅគាស់ទូបATMនោះទេ ហើយរឿងប្រើប្រាស់គ្រឿងញៀនខ្លួនមិនបានប្រើទេ។
ពេលបញ្ចប់សវនាការ សួរដេញដោលលោក កុល បុន តំណាងអយ្យការបានធ្វើសេចក្តីសន្និដ្ឋាននៅតែតម្កល់បទចោទទៅលើជនត្រូវចោទទាំង២នៅដដែល និងស្នើសុំឲ្យតុលាការផ្តន្ទាទោសអ្នកទាំង២ទៅតាមផ្លូវច្បាប់។ បន្ទាប់មកចៅក្រមបានសម្រេចលើកពេលទៅប្រកាសសាលក្រមនៅព្រឹកថ្ងៃទី២៧ខែសីហាឆ្នាំ២០១៨ខាងមុខនេះ ។
សូមបញ្ជាក់ថា ជនត្រូវចោទទាំង២នាក់ត្រូវបាននគរបាលខណ្ឌដូនពេញ ចាប់ឃាត់ខ្លួនកាលពីវេលាម៉ោង៣ទៀបភ្លឺថ្ងៃទី០២ ខែធ្នូ ឆ្នាំ២០១៧ បន្ទាប់ពីធ្វើសកម្មភាពគាស់ទម្លុះទូATM របស់ធនាគារ ABA នៅចំណុចមុខផ្ទះលេខ៣១ ផ្លូវលេខ២៤០ ភូមិទី១១ សង្កាត់ជ័យជំនះ ខណ្ឌដូនពេញ រាជធានីភ្នំពេញ។
វត្ថុតាងដែលចាប់យករួមមាន ខ្សែអេឡិចត្រូនិកប្រើឌុយ USB មួយ កូនកាំបិតចុងស្រួចមួយ លិខិតឆ្លងដែនមួយលេខ 724584016,ម៉ូតូ១គ្រឿង ម៉ាកអ៊ែរប្លែក ពណ៌ទឹកមាស ពាក់ស្លាកលេខ ព្រៃវែង1I-4505 សក់ពាក់ចំនួន១ដុំ និងទូរស័ព្ទដៃចំនួន៣គ្រឿង ម៉ាកអាយហ្វូន7 Plus ១គ្រឿង ពណ៌ខ្មៅ ម៉ាកNOKIA ចំនួន២គ្រឿង។
វត្ថុតាងទាំងនេះ អ្វីដែលមិនពាក់ព័ន្ធនឹងបទល្មើស ដូចជាទូរស័ព្ទ លិខិតឆ្លងដែន កាបូបប្រាក់ ម៉ូតូ តុលាការនឹងប្រគល់អោយជនជាប់ជាប់វិញ៕
Source: Kampuchea Thmey Daily
0 Comments