រុស្ស៊ី​និយាយថា​ នឹង​លះបង់​មូលបត្រ​អាមេរិក​ក្នុង​គ្រា​មានការ​ដាក់ទណ្ឌកម្ម

រដ្ឋមន្ត្រីក្រសួង​ហិរញ្ញវត្ថុ​រុស្ស៊ី​លោក Anton Siluanov បាន​និយាយ​ក្នុង​ទូរទស្សន៍​ជាតិ​កាលពី​ថ្ងៃអាទិត្យ​ថា ប្រទេស​រុស្ស៊ី​នឹង​កាត់បន្ថយ​ការកាន់កាប់​របស់ខ្លួន​នូវ​មូល​ប​ត្រ​របស់​សហរដ្ឋអាមេរិក​ដើម្បី​ឆ្លើយតប​ទៅនឹង​ការដាក់ទណ្ឌកម្ម​ថ្មី​ប្រឆាំងនឹង​ក្រុង​មូ​ស្គូ ​ប៉ុន្តែ​មិនមាន​ផែនការ​បិទ​ក្រុមហ៊ុន​អាមេរិក​នៅក្នុង​ប្រទេស​រុស្ស៊ី​នោះទេ។

កាលពី​ថ្ងៃ​សុក្រ លោកនាយក​រដ្ឋមន្ត្រី Dmitry Medvedev បាន​និយាយថា ប្រទេស​រុស្ស៊ី​ចាត់ទុក​ទង្វើ​របស់​សហ​រដ្ឋ​អាមេរិក​ក្នុងការ​ទប់ស្កាត់​សកម្មភាព​ធនាគារ​រប​ស់​ខ្លួន​ថា​ជា “​ការប្រកាសសង្គ្រាម​សេដ្ឋកិច្ច​” ហើយនឹង​ចាត់វិធានការ​សងសឹក។

រដ្ឋាភិបាល​ក្រុង​វ៉ាស៊ីនតោន​បាន​និយាយ​កាលពី​ថ្ងៃ​ពុធ​ថា ខ្លួន​នឹងដាក់​ទណ្ឌកម្ម​ថ្មី​នៅ​ចុងខែ​សីហា​នេះ​បន្ទាប់ពី​ខ្លួន​បាន​កំណត់​ថា ក្រុង​មូ​ស្គូ​បាន​ប្រើប្រាស់​សារធាតុ​បំផ្លាញ​សរសៃប្រសាទ​ប្រឆាំងនឹង​អតីត​ភ្នាក់ងារ​រុស្ស៊ី​និង​កូនស្រី​របស់​គាត់​នៅក្នុង​ចក្រភព​អង់គ្លេស​ដែល​បានធ្វើ​ឲ្យ​រូបិយប័ណ្ណ Rouble របស់​រុស្ស៊ី​ធ្លាក់​ដល់​កម្រិត​ទាប​បំផុត​ក្នុង​រយៈពេល​ពីរ​ឆ្នាំ​មកនេះ។

ថ្លែង​នៅក្នុង​កម្មវិធី​ជជែក​តាម​ទូរទស្សន៍​ប្រចាំ​សប្តាហ៍ លោក Siluanov បាន​និយាយថា ការដាក់ទណ្ឌកម្ម​ថ្មី​របស់​សហរដ្ឋអាមេរិក​ដែលមាន​មួយចំនួន​អាច​រឹតបន្តឹង​លើ​ការទិញ​មូលប័ត្រ​របស់​រដ្ឋាភិបាល​រុស្ស៊ី​នោះ​គឺ “​មិនល្អ​ប៉ុន្តែ​មិន​ធ្ងន់ធ្ងរ​ទេ​”​។​

លោក Siluanov បាន​ថ្លែងថា “​យើង​បាន​បន្ទាប​កម្រិត​អប្បបរមា​ហើយនឹង​កាត់បន្ថយ​ការវិនិយោគ​របស់​យើង​បន្ថែមទៀត​ក្នុង​សេដ្ឋកិច្ច​អាមេរិក​និង​ក្នុង​មូល​ប​ត្រ​សហរដ្ឋអាមេរិក​”​។​

ទិន្នន័យ​បានបង្ហាញ​កាលពី​ខែ​មុន​ថា ប្រទេស​រុស្ស៊ី​បាន​លះបង់​ប័ណ្ណ​រតនាគារ​របស់ខ្លួន​នៅក្នុង​រយៈពេល​ប៉ុន្មាន​ខែ​ចុង​ក្រោយនេះ​ខណៈ​ទំនាក់ទំនង​រវាង​ក្រុង​មូ​ស្គូ​និង​វ៉ាស៊ីនតោន​ធ្លាក់ចុះ​។​

លោក Siluanov បាន​ឲ្យ​ដឹងថា ប្រទេស​រុស្ស៊ី​ក៏​នឹងមាន​ការទូទាត់​បន្ថែម​ទៀត​ជា​ប្រាក់ Rouble និង​រូបិយប័ណ្ណ​ផ្សេងទៀត​ផងដែរ​ដូចជា​ប្រាក់​អឺរ៉ូ​ជាដើម​ជាជាង​ប្រាក់​ដុល្លារ​។​

ខណៈដែល​សារភាពថា ការដាក់ទណ្ឌកម្ម​របស់​អាមេរិក​នឹង​បង្កើន​អតិផរណា​នៅក្នុង​ប្រទេស​រុស្ស៊ី​ដូចដែល​ពួកគេ​ប៉ះពាល់​ដល់​ប្រាក់ Rouble នោះ​, លោក Siluanov បាន​និយាយថា មិនមាន​ផែនការ​ហាមឃាត់​ការប្រើប្រាស់​ប្រាក់​ដុល្លារ​ក្នុងប្រទេស​រុស្ស៊ី​នោះទេ៕
​

​

Source: Kampuchea Thmey Daily