ប្រធាន​ការិយាល័យ​បោះឆ្នោត​ ត្រូវ​បាន​សម្លាប់​ក្នុង​ការ​បោះឆ្នោត​ប្រធានាធិបតី​ជុំ​ទី​ពីរ​ដ៏​តានតឹង​របស់​ប្រទេស​ម៉ាលី

ប្រធាន​ការិយាល័យ​បោះឆ្នោត​ម្នាក់ ​ត្រូវ​បាន​សម្លាប់​ដោយ​ក្រុម​ជី​ហាដ​និយម​នៅ​ភាគ​ខាងជើង​ប្រទេស​ម៉ាលី​ ខណៈ​មានការ​ព្រួយបារម្ភ​ថា បញ្ហា​សន្តិសុខ​ បាន​បង្អាក់​ការបោះឆ្នោត​ប្រធានាធិបតី​ជុំ​ទី​ពីរ​កាលពី​ថ្ងៃអាទិត្យ។

សន្តិសុខ​ត្រូវបាន​រឹតបន្តឹង​យ៉ាងខ្លាំង​មុន​ការបោះឆ្នោត​ជុំ​ទី​ពីរ​រវាង​ប្រធានាធិបតី​លោក Ibrahim Boubacar Keita និង​អតីតរដ្ឋមន្ត្រី​ហិរញ្ញវត្ថុ​លោក Soumaila Cisse​។​

ប៉ុន្តែ​យោងតាម​ក្រុម​អ្នកសង្កេតការណ៍​ក្នុងស្រុក POCIM បាន​ឲ្យ​ដឹងថា ការិយាល័យ​បោះឆ្នោត​ជាង​១០០​ត្រូវ​បិទទ្វារ​នៅក្នុង​តំបន់​ភាគ​កណ្តាល​និង​ភាគ​ខាងជើង​។​

មន្ត្រី​មូលដ្ឋាន​ម្នាក់​បាន​ប្រាប់ AFP ថា “​ពួក​ជី​ហាដ​បានមក​ការិយាល័យ​បោះឆ្នោត​ក្នុង​ទីប្រជុំជន Arkodia នៃ​តំបន់ Timbuktu កាលពី​ថ្ងៃអាទិត្យ​នៅ​ម៉ោង​១៣​និង​៣០​នាទី​”​។​

ប្រភព​ដដែល​បាន​និយាយថា “​ពួកគេ​បានស្នើ​ឲ្យ​មនុស្ស​គ្រប់គ្នា​លើកដៃ​ឡើង​។ ប្រធានការិយាល័យ​បោះឆ្នោត​បាន​ព្យាយាម​រត់គេចខ្លួន​ហើយ​ពួក​ជី​ហាដ​ក៏បាន​បាញ់សម្លាប់​គាត់​តែម្តង​”​។​

ការរាប់​សន្លឹកឆ្នោត​នៅតាម​បណ្តា​ការិយាល័យ​បោះឆ្នោត​មួយចំនួន​ក្នុងចំណោម​២៣,០០០​កន្លែង​ទូទាំងប្រទេស​កំពុងតែបន្ត​បន្ទាប់ពី​ការបោះឆ្នោត​បានបញ្ចប់​នៅ​ម៉ោង​៦​ល្ងាច​។​

ការបោះឆ្នោត​ជុំ​ទី​១​នៅ​ថ្ងៃទី​២៩​ខែកក្កដា​ត្រូវបាន​រំខាន​ដោយ​អំពើ​ហឹ​ង្សា​និង​ការគំរាមកំហែង​ពី​ក្រុម​ប្រដាប់អាវុធ​ដែល​បាន​នាំ​ឲ្យ​មណ្ឌលបោះឆ្នោត​ជាច្រើន​ត្រូវ​បិទទ្វា​ប៉ុន្តែ​មិនមាន​ការរាយការណ៍​ពី​ការស្លាប់​និង​របួស​ទេ។​

អាជ្ញាធរ​នៅក្នុង​ប្រទេស​អាហ្វ្រិក​ខាងលិច​ដ៏​ធំ​មួយ​នេះ​បាន​និយាយ​កាលពី​ថ្ងៃ​សៅរ៍​ថា ពួកគេ​បាន​បង្អាក់​ផែនការ​មួយ​នៃ​ការវាយប្រហារ​គោលដៅ​នៅក្នុង​រដ្ឋធានី Bamako មុន​ថ្ងៃ​បោះឆ្នោត​មួយថ្ងៃ​។​

ការបោះឆ្នោត​កាលពី​ថ្ងៃអាទិត្យ​នៅក្នុង​ប្រទេស​ម៉ាលី​គឺជា​ការចាប់ផ្តើម​ឡើងវិញ​នៃ​ការប្រឈមមុខ​ដាក់គ្នា​កាលពី​ឆ្នាំ​២០១៣​រវាង​លោក Keita អាយុ​៧៣​ឆ្នាំ​និង​លោក Cisse អាយុ​៦៨​ឆ្នាំ​ចំពេល​មាន​រលក​នៃ​ការបង្ហូរ​ឈាម​ដោយ​ពួក​ជី​ហាដ​និង​អំពើហិង្សា​ជនជាតិភាគតិច​។​
យុទ្ធនា​ការឃោសនា​នៅ​ឆ្នាំនេះ​គឺ​បាន​ជួបប្រទះ​ការរិះគន់​យ៉ាងខ្លាំង​ទៅលើ​ការបរាជ័យ​របស់លោក Keita ក្នុង​ការបញ្ឈប់​អំពើហិង្សា​ក៏ដូចជា​ការចោទប្រកាន់​ជាច្រើន​អំពី​ការលួចបន្លំ​សន្លឹកឆ្នោត​ផងដែរ។​

ប្រទេស​ម៉ាលី​គឺជា​ប្រទេស​ជាប់​សមុទ្រ​ដែលមាន​ជនជាតិភាគតិច​យ៉ាងហោចណាស់​២០​ក្រុម​ ដែល​មនុស្ស​ភាគច្រើន​រស់​នៅ​រកចំណូលបាន​តិចជាង​២​ដុល្លារ​ក្នុង​មួយថ្ងៃ​។ ប្រទេស​នេះ​បាន​ប្រយុទ្ធ​ប្រឆាំងនឹង​ការវាយប្រហារ​ដោយ​ក្រុម​ជី​ហាដ​និង​អំពើ​ហិង្សា​ក្នុង​សហគមន៍​អស់​រយៈពេល​ជាច្រើន​ឆ្នាំ​មកហើយ​៕

​

Source: Kampuchea Thmey Daily