អង្គការ NASA កាលពីថ្ងៃអាទិត្យ បានបាញ់បង្ហោះយានអវកាសដំបូងរបស់ខ្លួនដើម្បីរុករកព្រះអាទិត្យសម្រាប់បេសកកម្មមួយដើម្បីការពារផែនដីដោយបង្ហាញពីអាថ៌កំបាំងនៃព្យុះពន្លឺព្រះអាទិត្យដ៏គ្រោះថ្នាក់។ វាគឺជាយានអវកាស Parker Solar Probe តម្លៃ១.៥ពាន់លានដុល្លារ។
ការបាញ់បង្ហោះយានទំហំប៉ុនរថយន្តនៅលើរ៉ុក្កែត Delta IV-Heavy ដ៏ធំមួយនេះគឺបានបំភ្លឺផ្ទៃមេឃនាពេលរាត្រីនៅឯជ្រោយ Canaveral ក្នុងរដ្ឋ Florida នៅម៉ោង៣និង៣១នាទីព្រឹក។
បេសកកម្មរបស់យានអវកាសគ្មានមនុស្សបើកមួយនេះគឺដើម្បីចូលកាន់តែជិតជាងវត្ថុផលិតឡើងដោយមនុស្សណាៗទាំងអស់ទៅកាន់កណ្តាលនៃប្រព័ន្ធព្រះអាទិត្យដោយចូលទៅក្នុងបរិកាសរបស់ព្រះអាទិត្យដែលគេស្គាល់ថា corona អំឡុងបេសកកម្មរយៈពេលប្រាំពីរឆ្នាំ។
យាននេះត្រូវបានការពារដោយប្រដាប់ការពារកំដៅដ៏ខ្លាំងក្លាដែលអាចទ្រាំទ្រនឹងកម្រិតកំដៅដែលមិនធ្លាប់មានពីមុនមកនិងវិទ្យុសកម្ម៥០០ដងដែលធ្លាប់មាននៅលើផែនដី។
នៅពេលវាទៅជិតព្រះអាទិត្យ យាននេះនឹងត្រូវធ្វើដំណើរប្រហែល៤៣០,០០០ម៉ាយល៍ក្នុងមួយម៉ោងឬ៦៩២,០០០គីឡូម៉ែត្រក្នុងមួយម៉ោង។
នោះនឹងធ្វើឲ្យវាក្លាយជាវត្ថុដែលមនុស្សបង្កើតឡើងមានល្បឿនលឿនបំផុតដែលលឿនល្មមអាចធ្វើដំណើរពីទីក្រុងញូវយ៉កទៅតូក្យូក្នុងរយៈពេលត្រឹមតែមួយនាទី។
NASA បានហៅយាននេះថាជាយានអវកាសដំបូងគេបង្អស់ដែល “ប៉ះព្រះអាទិត្យ”។
ជាការពិត វាគួរតែស្ថិតនៅក្នុងរយៈចម្ងាយប្រមាណ៦.១៦លានគីឡូម៉ែត្រនៃផ្ទៃរបស់ព្រះអាទិត្យដែលជិតល្មមដើម្បីសិក្សាពីបាតុភូតដ៏គួរឲ្យចង់ដឹងនៃខ្យល់ព្រះអាទិត្យនិងបរិយាកាសព្រះអាទិត្យដែលក្តៅជាងផ្ទៃរបស់វា៣០០ដង។
អ្នកវិទ្យាសាស្ត្រសង្ឃឹមថា ការចូលយ៉ាងជិតនេះនឹងផ្តល់ឲ្យពួកគេនូវការយល់ដឹងកាន់តែប្រសើរឡើងអំពីខ្យល់ព្រះអាទិត្យនិងព្យុះទំនាញផែនដីដែលអាចធ្វើឲ្យផែនដីមានភាពវឹកវរ។
លោក Justin Kasper អ្នកវិទ្យាសាស្ត្រនិងជាសាស្ត្រាចារ្យនៅសាកលវិទ្យាល័យ Michigan បាននិយាយថា “យាន Parker Solar Probe នឹងជួយយើងឲ្យធ្វើការល្អប្រសើរជាងមុនក្នុងការទស្សន៍ទាយនៅពេលដែលការរំខាននៅក្នុងខ្យល់ព្រះអាទិត្យអាចវាយប្រហារទៅលើផែនដី”៕
Source: Kampuchea Thmey Daily
0 Comments