ភ្នំពេញ ៖ បុរសម្នាក់ បានយកកូនកាំបិតចិតបន្លែអារកខ្លួនឯងរងរបួសធ្ងន់ធ្ងរ ត្រូវបានគេបញ្ជូនទៅមន្ទីរពេទ្យកាល់ម៉ែត បន្ទាប់ពីប្រើប្រាស់ថ្នាំញៀនលើសកម្រិត។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង៣និង០០នាទីរសៀលថ្ងៃទី៦ខែកញ្ញា ឆ្នាំ២០១៨ ស្ថិតតាមបណ្តោយផ្លូវជាតិលេខ៥ ចំណុចមុខហាងស៊ុបចង្កាក់Volcanoក្នុងភូមិមិត្តភាពសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
ជនរងគ្រោះខាងលើឈ្មោះកែវ ស ភេទប្រុស អាយុ២៣ឆ្នាំ មុខរបរកម្មករសំណង់ មានប្រពន្ធឈ្មោះតន់ ស៊ីណេត អាយុ៣០ឆ្នាំ មុខរបរកម្មករសំណង់មានកូនប្រុសស្រី៣នាក់ និងមានផ្ទៃពោះកូនម្នាក់អាយុ៥ខែ អ្នកទាំងអស់គ្នាស្នាក់នៅក្នុងការដ្ឋានសំណង់មួយកន្លែងក្នុងឃុំព្រែកតាទែន ស្រុកពញាឮ ខេត្តកណ្តាល។
ប្រភពព័ត៌មានពីប្រពន្ធជនរងគ្រោះឲ្យដឹងថា នៅមុនពេលកើតហេតុពួកគេទាំងពីរនាក់ប្តីប្រពន្ធបានយកកូនប្រុសស្រី២នាក់តូចៗមកផ្ញើឲ្យម្តាយមើលថែឲ្យនៅក្នុងភូមិបឹងឈូក សង្កាត់គីឡូម៉ែត្រលេខ៦ ព្រោះគ្មានអ្នកមើលថែកូន ដើម្បីត្រឡប់ទៅធ្វើការវិញ ខណៈជិះរ៉ឺម៉កទាំងអស់គ្នាមកផ្លូវបត់ចូលផ្ទះម្តាយក៏ចុះពីលើរ៉ឺម៉កទាំងអស់គ្នាភ្លាមនោះ បុរសជាប្តីបានរត់ទៅចូលឡានតែបានប្រពន្ធចាប់ឃាត់ពេល។
ប្រភពដដែលបន្តថា បន្ទាប់ពីឃាត់ប្តីរួចហើយ ពួកគេទាំងអស់គ្នាមិនបានដើរចូលផ្ទះម្តាយទេដោយបុរសជាប្តីពរកូនស្រីដើរតាមបណ្តោយផ្លូវជាតិលេខ៥ពីជើងទៅត្បូង ហើយនាងជាប្រពន្ធដឹកដៃកូនប្រុសដើរតាមអង្វរហៅឲ្យចូលទៅផ្ទះម្តាយតែប្តីមិនស្តាប់ក៏ដើររហូតដល់ចំណុចកើតហេតុបុរសជាប្តីឃើញកូនកាំបិតចិតបន្លែនៅទល់មុខហាស៊ុបចង្កាក់Volcanoបានដាក់កូនស្រីចុះហក់ទៅទាញកាំបិតចិតបន្លែអារ.កខ្លួនឯង ហូរឈាមស្រោចខ្លួនរងរបួសធ្ងន់ បង្កការភ្ញាក់ផ្អើលដល់សមត្ថកិច្ចយករ៉ឺម៉កម៉ូតូកង់បីដឹកយកទៅសង្គ្រោះនៅមន្ទីរពេទ្យបង្អែកសម្តេចឪគីឡូម៉ែត្រលេខ៦ ដោយសាររបួសធ្ងន់ធ្ងរពេកបានដឹកបន្តទៅសង្គ្រោះបន្ទាន់នៅមន្ទីរពេទ្យកាលម៉ែត្រ៕
Source: Kampuchea Thmey Daily
0 Comments