គ្រូបង្វឹកចំនួន២៩នាក់មកពីក្លិបនិងសមាគមនានាក្នុងប្រទេសកម្ពុជា កំពុងតែសិក្សាគ្រូបង្វឹកកម្រិត ”B” (AFC “B” Certificate Coaching Course) ដំណាក់កាលទី១ នៅមជ្ឈមណ្ឌលនិងសាលាបាល់ទាត់ជាតិបាទី ក្រោយការរៀបចំឡើងពីសំណាក់សហព័ន្ធកីឡាបាល់ទាត់កម្ពុជា (FFC) សហការជាមួយសហព័ន្ធកីឡាបាល់ទាត់អាស៊ី។
វគ្គសិក្សាគ្រូបង្វឹកកម្រិតទ្វីបអាស៊ីនេះបែងចែកជា២ដំណាក់កាលគឺដំណាក់កាលទី១ពីថ្ងៃទី១ ចាប់ពីថ្ងៃទី២ ដល់ថ្ងៃទី១២ ខែកញ្ញា ឆ្នាំ២០១៨ ខណៈដំណាក់កាលទី២ចាប់ពីថ្ងៃទី២៨ ខែកញ្ញា ដល់ថ្ងៃទី៧ខែតុលា ឆ្នាំ២០១៨។ ជាគោលការណ៍វគ្គ AFC B Licence នេះបានដរាបណាបេក្ខជនត្រូវតែបានឆ្លងកាត់វគ្គសិក្សាគ្រូបង្វឹកកម្រិត AFC C Licence ឬ ជាអ្នកប្រកបអាជីពក្នុងពិភពបាល់ទាត់អាចជាកីឡាករបាល់ទាត់ ឬ គ្រូបង្វឹក គ្រូជំនួយដែលបម្រើការងារបាល់ទាត់នៅស្ថាប័ន ឬ ក្លិបបាល់ទាត់ពាក់ព័ន្ធ ជាមុនសិន។ ចំពោះអ្នកបញ្ចប់វគ្គនេះនឹងមានសមត្ថភាពគ្រប់គ្រាន់ក្នុងការបន្តទៅសិក្សាវគ្គAFC A Licence ទៀតបាន។
អ្នករៀបចំវគ្គសិក្សានេះបានប្រាប់ទៅកាន់សិក្ខកាមដែលឆ្លងកាត់វគ្គនេះទាំងអស់ថា យកចំណេះដឹងដែលសិក្សាទាំងអស់នេះទៅប្រើប្រាស់ឲ្យចំគោលដៅ ជាពិសេសគឺបង្ហាត់បង្ហាញដល់ក្រុមពាក់ព័ន្ធ ឬផ្ដល់ជាគំនិតដល់កីឡាករក្មេងៗជំនាន់ក្រោយ សម្រាប់អភិវឌ្ឍន៍បាល់ទាត់ជាតិឲ្យកាន់តែរីកចម្រើនឡើង។ ការសិក្សាទាំង២លើកនេះបានផ្តោតលើទ្រឹស្ដីនិងការអនុវត្តន៍លើទីលានផងដែរ។
ចំណែកសិក្ខាកាមដែលចូលវគ្គសិក្សានេះមានដូចជា ជូ សារឿន និង ខេន សុខុម មកពីព្រះខ័នរាជស្វាយរៀង, ឃុន សុភ័ត មកពី Prak Football Academy កៅ សាវ៉ា និង កែវ មិនា មកពីកោះកុង, សុក វាសនា មកពីអាស៊ីអឺរ៉ុប, ឈុន គីរីវិត្ថារ៉ូ មកពីវិសាខា, ហួត គឹមហុង របស់ក្រុមភ្នំពេញក្រោន, លី ធារ៉ា របស់ខេត្តសៀមរាប, ទាំ ម៉ាត់ មកពីស្រុកកំពង់ត្រាច, យិន បញ្ញា ខេត្តកណ្តាល,រ៉េត វិបុល របស់វេស្ទើនភ្នំពេញ,សុខ សំអាត និងគឹម សុផាណាល់ របស់ស្ទឹងត្រែង, ស៊ីវ សុខា មកពីខេត្តសៀមរាប, អ៊ុក សុធី របស់ភ្នំពេញក្រោន Akeeb Ayoyinka របស់វេស្ទើនភ្នំពេញ, គឹម ទី មកពីអគ្គស្នងការដ្ឋាននគរបាលជាតិ, សេង សារ៉ីម,ខេង សុបញ្ញា,សោម ចាន់ណា របស់អង្គការផ្ទាយសមុទ្រ, លឹម នួន របស់ណាហ្គាវើល, Biotioba Jean មកពី KMH Academy, ឡេង ចន្ទី មកពីពន្លឺថ្មី, លី វ៉ាវី របស់ក្រុមបឹងកេត, សាន ណារិទ្ធិ មកពិស្ណុកា, ទៀង ទីនី និងវី លីកា មកពីវិសាខា និង សាយ ពិសិដ្ឋ របស់ក្រុមអគ្គស្នងការដ្ឋាន នគរបាលជាតិ៕
Source: Kampuchea Thmey Daily
0 Comments