ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអង្គារថា ចំនួនអ្នកចេញទៅបោះឆ្នោតនៅក្នុងការបោះឆ្នោតរបស់ប្រទេសកូរ៉េខាងជើងបានឈានដល់៩៩,៩៩ភាគរយនៅឆ្នាំនេះពោលគឺកើនឡើងពី៩៩,៩៧ភាគរយពីការបោះឆ្នោតលើកចុងក្រោយបំផុត។
ខណៈដែលតួលេខនៃការចូលរួមនេះមិនដែលមានប្រទេសប្រជាធិបតេយ្យលោកខាងលិចណាអាចសម្រេចបាននោះ, ប្រជាជនកូរ៉េខាងជើងរាប់លាននាក់បានធ្វើដំណើរទៅបោះឆ្នោតនៅទូទាំងប្រទេសជារៀងរាល់៥ឆ្នាំម្តងដើម្បីជ្រើសរើសអង្គនីតិបញ្ញត្តិដែលគេស្គាល់ថា សភាប្រជាជនកំពូល (SPA)។
ប៉ុន្តែដោយសារតែមានឈ្មោះតែមួយគត់ដែលត្រូវបានគេអនុម័តនៅលើសន្លឹកឆ្នោតនីមួយៗនៅក្នុងប្រទេសដាច់ស្រយាលដែលត្រូវបានគ្រប់គ្រងដោយគណបក្សកម្មកររបស់លោកគីមជុងអ៊ុននោះ លទ្ធផលគឺគ្មានអ្វីត្រូវសង្ស័យឡើយ។
ទីភ្នាក់ងារព័ត៌មាន KCNA ផ្លូវការរបស់កូរ៉េខាងជើងបានរាយការណ៍ថា អ្នកចូលរួមបោះឆ្នោតក្នុងឆ្នាំនេះគឺស្ថិតក្រោម១០០ភាគរយខណៈអ្នកដែលស្ថិតនៅក្រៅប្រទេសឬធ្វើការក្នុងមហាសមុទ្រមិនអាចចូលរួមបាន។
KCNA បានរាយការណ៍ដោយលើកឡើងពីរបាយការណ៍មួយដែលចេញដោយគណៈកម្មាធិការបោះឆ្នោតកណ្តាលថា “អ្នកបោះឆ្នោតទាំងអស់បានចូលរួមក្នុងការបោះឆ្នោតនេះដើម្បីពង្រឹងអំណាចប្រជាជនរបស់យើងឲ្យរឹងមាំដូចថ្ម”។
KCNA បានបន្ថែមថា “១០០ភាគរយនៃពួកគេបានបោះសន្លឹកឆ្នោតរបស់ពួកគេដល់បេក្ខជនសម្រាប់តំណាងរាស្ដ្រនៅក្នុង SPA ដែលបានចុះបញ្ជីនៅក្នុងមណ្ឌលបោះឆ្នោតដែលពាក់ព័ន្ធ”។
ទោះបីជាយ៉ាងណាក៏ដោយ បញ្ជីលម្អិតនៃបេក្ខជនចំនួន៦៨៧នាក់មិនត្រូវរកបានភ្លាមៗទេ។
ប៉ុន្តែបើយោងតាមទីភ្នាក់ងារសារព័ត៌មាន Yonhap របស់កូរ៉េខាងត្បូងដែលលើកឡើងប្រភពពីប្រព័ន្ធផ្សព្វផ្សាយរបស់រដ្ឋាភិបាលក្រុងព្យុងយ៉ាងបានឲ្យដឹងថា ប្អូនស្រីរបស់មេដឹកនាំគីមជុងអ៊ុននិងជំនួយការជិតស្និទ្ធឈ្មោះ Kim Yo Jong គឺស្ថិតក្នុងចំណោមអ្នកដែលបានជាប់ឆ្នោតថ្មីៗ៕ AFP
Source: Kampuchea Thmey Daily
0 Comments