អាជ្ញាធរ​ខណ្ឌដូនពេញ​ចាប់​ផ្តើម​ចេញ​ប្រតិបត្តិការ​ចុះ​បិទ​ទីតាំង​(Net២៤h)​ដែល​គ្មាន​ច្បាប់​និង​បង្កប់​ល្បែងស៊ីសង

ភ្នំពេញ ​៖ ​ទីតាំង​(Net២៤h)​មួយកន្លែង​ទៀត​ ត្រូវ​បាន​អាជ្ញាធរ​ខណ្ឌដូនពេញ​បន្ត​ចុះ​ផ្អាក​អាជីវកម្ម​ក្រោយពី​គណៈកម្មការ​ខណ្ឌ​ចាប់ផ្តើម​បន្ត​ចុះ​ត្រួត​ពិនិត្យ​ឃើញ​ថា មានការ​បង្កប់​នូវ​ល្បែងស៊ីសង​គ្រប់​ប្រភេទ​នោះ ​ជាពិសេស​ការចាក់​ភ្នាល់​បាល់​តែ​ម្តងនោះ​។

អាជ្ញាធរ​បាន​ឲ្យ​ដឹងថា​ទីតាំង​(Net២៤h)​មួយកន្លែង​ទៀត​ដែល​ត្រូវបាន​ចុះ​ត្រួតពិនិត្យ​នោះបាន​ធ្វើឡើង​នៅ​ព្រឹក​ថ្ងៃ​ព្រ​ហ​ស្បតិ៍ ១១​កើត ខែភទ្របទ ឆ្នាំរ​ច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី​២០ ខែកញ្ញា ឆ្នាំ​២០១៨ វេលា​ម៉ោង​០៩​និង​៣០​នាទី​ព្រឹក លោក សុខ ពេញ​វុ​ធ អភិបាល​នៃ​គណៈ​អភិបាល​ខណ្ឌដូនពេញ បាន​បញ្ជា​ឲ្យ លោក អ៊ឹម ភា ប្រធាន​ការិយាល័យ​វប្បធម៌​ខណ្ឌ សហការ​ជាមួយ​សង្កាត់​ជ័យជំនះ និង ប៉ុស្តិ៍​ជ័យជំនះ បាន​ចុះ​ត្រួតពិនិត្យ ទីតាំង​អ៊ីន​ធើ​ណេង​២៤​ម៉ោង​យីហោ​VVIP-NER ដែល​មាន​ទីតាំង​នៅផ្ទះ​លេខ​១០៩E0 ផ្លូវ​លេខ​១៩ សង្កាត់​ជ័យ​ជំ​នះ ខណ្ឌដូនពេញ ម្ចាស់​ទីតាំង​ឈ្មោះ ស៊ីន ស្រី​ម៉ុ​ច ភេទ​ស្រី អាយុ​២៧​ឆ្នាំ។



ក្នុង​ប្រតិបត្តិ​ការ​នោះ​ដែរ ​ក្រោយពី​ចុះ​ត្រួតពិនិត្យ​រួចមក​ឃើញថា​ ទីតាំង​មាន​កុំព្យូទ័រ​ចំនួន​១៥​ទូ ជា​ប្រភេទ​ទូ​ដែល​មាន​វេ​បសាយ​ល្បែងស៊ីសង​(AA2888) គណៈកម្មការ​បាន​បិទ​អាជីវកម្ម​ខាងលើ​បណ្តោះអាសន្ន រង់ចាំ​ម្ចាស់​ទីតាំង​អនុវត្ត​តាម​ការ​ណែនាំ​ទើប​ឲ្យ​បើក​ដំណើរការ​ឡើងវិញ។

អាជ្ញាធរ​បញ្ជាក់​ទៀត​ថា ​ប្រតិបត្តិ​ការចុះ​ពិ​និ​ត្យ​ទីតាំង​ហាង​Net២៤h​ទី​លើក​ទី​១​នោះ​គឺ​ដោយ​ទទួលបាន​សេចក្តី​រាយការណ៍ និង សំណូមពរ​ពី​បងប្អូន​ប្រជាពលរដ្ឋ​ដែល​រស់​នៅ​ក្នុង​សង្កាត់​ផ្សារកណ្តាល​ទី​១ លោក សុខ ពេញ​វុ​ធ អភិបាល នៃ​គណៈ​អភិបាលខណ្ឌ​ដូនពេញ បាន​បញ្ជា​ឲ្យ​មន្ត្រី​ជំនាញ​ពាក់ព័ន្ធ​ចុះ​ត្រួតពិនិត្យ​ទីតាំង​ប្រកប​អាជីវកម្ម​ហ្គេម​បាញ់​ត្រី មួយ​កន្លែង ស្ថិតនៅ​ផ្ទះ​លេខ​៩៣ ផ្លូវ​លេខ​១៥ សង្កាត់​ផ្សារ​កណ្តាល​១ ជាប់​សណ្ឋាគារ​អង្គរ​នៅ​ថ្ងៃទី​២០ ខែកញ្ញា ឆ្នាំ​២០១៨ វេលា​ម៉ោង​១២​និង​០០​នាទី​ក្នុង​លោក សុខ ពេញ​វុ​ធ អភិបាល នៃ​គណៈ​អភិបាលខណ្ឌ​ដូនពេញ និង​ជា​ប្រធាន​គណៈ​បញ្ជាការ​ឯកភាព​រដ្ឋបាល​ខណ្ឌដូនពេញ បាន​បញ្ជា​ឲ្យ​មន្ត្រី​ជំនាញ​ពាក់ព័ន្ធ​ចុះ​ត្រួតពិនិត្យ​ទីតាំង​ខាងលើ ជា​លទ្ធផល ក្រោយពី​បាន​ចុះ​ត្រួតពិនិត្យ​រួចមក​ឃើញថា​ ពុំ​មាន​ទូហ្គេម​បាញ់​ត្រី​នោះ​ទេ គឺ​មានតែ​ប្រភេទ​ទូរ​កុំព្យូទ័រ (NET-24H 5555) ប៉ុន្តែ​ទីតាំង​ខាងលើ​ពុំមាន​លិខិត​អនុញ្ញាត​ត្រឹមត្រូវ​ពី​អាជ្ញាធរ​ពាក់ព័ន្ធ​ឡើយ ហើយ​គណៈកម្មការ​ក៏បាន​សម្រេច​បិទ​អាជីវកម្ម​នេះ​ទាំងស្រុង ដោយ​មិន​អនុញ្ញាត​ឲ្យ​ប្រកប​អាជីវកម្ម​អ៊ី​ន​ធើ​ណេ​ត​ទៀត​ឡើយ។



ជាមួយគ្នា​នោះ​ដែរ ​រដ្ឋបាល​ខណ្ឌ​ក៏​សូម​ធ្វើការ​អំពាវនាវ​ដល់​ប​ង​ប្អូ​ន​ប្រជាពលរដ្ឋ​ទាំងអស់ សូម​ចូលរួម​សហការ រាយការណ៍​ជូន​អាជ្ញាធរ​មូលដ្ឋាន សមត្ថកិច្ច​ពាក់ព័ន្ធ ក្នុងករណី​បានឃើញ ឬ​សង្ស័យ​ថា ​មាន​ករណី​បើក​ទីតាំង​ល្បែងស៊ីសង​ខុសច្បាប់ ករណី​ជួញដូរ ចែកចាយ និង​ប្រើប្រាស់​គ្រឿងញៀន​ជាដើម​នោះ​អាជ្ញាធរ​មាន​សមត្ថកិច្ច​នឹង​ចុះទៅ​បង្ក្រាប​ឲ្យ​ទាន់​ពេល​វេលា​តែម្តង​។



ចំណែក​ទីតាំង​ហ្គេម​ដែល​បើក​លួចលាក់​វិញ​ក៏​ត្រូវ​បាន​កម្លាំង​អាជ្ញាធរ​ខណ្ឌដូនពេញ​ចុះបង្ក្រាប​បន្តបន្ទាប់​បានជា​ច្រើន​ទូ​មក​ហើយ​ជាក់ស្តែង​នៅ​ថ្ងៃ​សៅរ៍ ១៣​កើត ខែភទ្របទ ឆ្នាំ​ច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី​២២ ខែកញ្ញា ឆ្នាំ​២០១៨ វេលា​ម៉ោង​១២​និង​០០​នាទី​រសៀល លោក សុខ ពេញ​វុ​ធ អភិបាល​នៃ​គណៈ​អភិបាល​ខណ្ឌដូនពេញ បាន​បញ្ជា​ឲ្យ លោក ជឹម សុធី នាយករង​រដ្ឋបាល​ខ​ណ្ឌ​ដូនពេញ ដឹកនាំ​កម្លាំង​គណៈ​បញ្ជាការ​ឯកភាព​ខណ្ឌដូនពេញ ចុះ​បង្ក្រាប​ទីតាំង​ល្បែង​បាញ់​ត្រី​ខុសច្បាប់​ចំនួន​០១​ទីតាំង ផ្ទះ​លេខ​៦៩E0 ផ្លូវ​លេខ​៥៤ សង្កាត់​ផ្សារ​ថ្មី​១ ខណ្ឌដូនពេញ ក្រោយ​ចុះ​ត្រួតពិនិត្យ​ជាក់ស្តែង​រួចមក​ឃើញថា មាន​ទូ​ហ្គេម​បាញ់​ត្រី​ចំនួន​០២​ទូ បន្ទាប់ពី​ធ្វើ​កំណត់ហេតុ​ដកហូត​រួចមក គណៈ​បញ្ជាការ​ឯកភាព​ខណ្ឌ​បាន​ដកហូត​នូវ​ទូ​ហ្គេម​បាញ់​ត្រី​ខុសច្បាប់​ចំនួន​០២​ទូ យក​មក​រក្សាទុក​នៅ សាលាខណ្ឌ​ដូនពេញ ដើម្បី​មាន​វិធានការ​បន្ត​ទៀត​៕

Source: Kampuchea Thmey Daily