បន្ទាយមានជ័យ ៖ គ្រួសារយោធិនពិការ នៅក្នុងមជ្ឈមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រ ស្ថិតនៅក្នុងឃុំស្វាយចេក ស្រុកស្វាយចេក ទទួលបានអណ្តូងទឹកចំនួន១០ និងប្រជាពលរដ្ឋនៅ ឃុំអូរប្រាសាទ ស្រុកមង្គលបូរី នៃខេត្តបន្ទាយមានជ័យ ទទួលបានចំនួន២ ពីលោកស្រី ពេជ ចន្ទមុន្នី ហ៊ុនម៉ាណែត កាលពីថ្ងៃទី៩ ខែមីនា២០១៩ ដែលជាអំណោយមូលនិធិមាតាបិតាសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតសម្រាប់ប្រើប្រាស់ក្នុងជីវភាពប្រចាំថ្ងៃ ជាពិសេសនៅរដូវទឹកអំណត់នេះ។
ជាក់ស្តែងនៅក្នុងឱកាសនោះ ប្រជាពលរដ្ឋនៅក្នុងស្រុកទាំង២ខាងលើនេះ ពិតជាមានក្តីរំភើប សប្បាយរីករាយ លាយឡំនឹងទឹកភ្នែក ដោយទទួលបានអណ្តូងទឹកស្អាត ជាលើកទី២ ពីលោកស្រី ពេជ ចន្ទមុន្នី ហ៊ុនម៉ាណែត សម្រាប់ជួយសម្រួលដល់ជីវភាពគ្រួសារ។
ក្នុងពិធីជួបសំណេះសំណាលសួរសុខទុក្ខ និងប្រគល់អណ្តូងទឹកស្អាត ដល់ប្រជាពលរដ្ឋ នៅក្នុងស្រុកខាងលើ លោកស្រី ពេជ ចន្ទមុន្នីបានអោយដឹងថា ដោយមើលឃើញតំបន់នេះមានការខ្វះខាតទឹកស្អាតប្រើប្រាស់ ពិសេសនៅរដូវប្រាំង សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត បានចាត់អោយក្រុមការងារ ធ្វើជូនលោកយាយ លោកតា និងគ្រួសារយោធិនពិការនៅទីនេះ បានប្រើប្រាស់តាមតម្រូវការ។
លោកស្រីអោយដឹងថា អ្វីដែលពិសេសនៅក្នុង ឃុំស្វាយចេក ស្រុកស្វាយចេកនេះ គឺភាគច្រើនជាអតីតយោធិន ដែលបានពលីជីវិត ការពារទឹកដីនៅតំបន់នេះ កាលពីសម័យសង្គ្រាម។ ហេតុដូច្នេះហើយ សម្តេចតេជោ និងសម្តេចកិត្តិព្រឹទ្ធបណ្ឌិត លោកទាំងពីរតែងតែគិតគូរពីសុខទុក្ខ និងជីវភាពរបស់បងប្អូនយោធិនពិការនៅទីនេះជានិច្ច ដោយមិនទុកនរណាម្នាក់ចោល។
លោកស្រី ពេជ ចន្ទមុន្នី បន្តថា ដើម្បីឆ្លើយតប នឹងតម្រូវការជាក់ស្តែង របស់គ្រួសារយោធិនពិការ និងប្រជាពលរដ្ឋនៅទីនេះ លោកស្រីបានចាត់អោយក្រុមការងារ ចុះមកធ្វើអណ្តូងថែមជូនជាលើកទី២តាមតម្រូវការ ដោយក្នុងនោះមានអណ្តូងលោកតា ហ៊ុន នាង លោកយាយ ឌី ប៉ុក ចំនួន៧អណ្តូង និងអណ្តូងលោកយាយ ប៊ុន ស៊ាងលី លោកតា លីន គ្រី ចំនួន៥អណ្តូង។
គ្រួសារយោធិនពិការ និងប្រជាពលរដ្ឋនៅក្នុងតំបន់ខាងលើ បានសំដែងនូវក្ដីសប្បាយត្រេកអរជាពន់ពេក និងសូមថ្លែងអំណរគុណយ៉ាងជ្រាវជ្រៅ ចំពោះម្ចាស់អណ្តូង ជាពិសេសសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ដែលជានិច្ចកាលលោកទាំងពីរ តែងគិតគូរពីទុក្ខលំបាក របស់ប្រជាពលរដ្ឋគ្រប់ពេលវេលា គ្រប់ទិសទី។
សូមជម្រាបថា ក្នុងឱកាសនោះដែរ លោកស្រីប្រធានមូលនិធិ ក៏បានដឹកនាំក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) មកពិនិត្យពិគ្រោះ និងផ្តល់ថ្នាំសង្កូវព្យាបាលជំងឺស្រាលៗ ជូនប្រជាពលរដ្ឋដោយឥតគិតថ្លៃផងដែរ។ រីឯអ្នកជំងឺ ដែលមានសភាពធ្ងន់ធ្ងរ ត្រូវបញ្ជូនមកភ្នំពេញ ដើម្បីព្យាបាល រាល់ការចំណាយទាំងអស់ គឺស្ថិតក្រោមការឧបត្ថម្ភទាំងស្រុងពីសម្តេចតេជោ និងសម្តេចកិត្តិព្រឹទ្ធបណ្ឌិតផ្ទាល់៕
Source: Kampuchea Thmey Daily
0 Comments