ជនភៀសខ្លួនជាកីឡាករបាល់ទាត់ដែលត្រូវបានឃុំខ្លួននៅក្នុងប្រទេសថៃនិងគំរាមធ្វើបត្យាប័នទៅកាន់ប្រទេសបារ៉ែន បាននិយាយថា គាត់មានអារម្មណ៍យ៉ាងច្បាស់ថា គ្មាននរណាម្នាក់អាចតាមគាត់បានទេ បន្ទាប់ពីបានក្លាយជាពលរដ្ឋអូស្ត្រាលីនៅថ្ងៃអង្គារ.
លោក Hakeem al-Araibi ដែលត្រូវបានផ្តល់ឋានៈជាជនភៀសខ្លួននិងស្នាក់នៅក្នុងប្រទេសអូស្ត្រាលីកាលពីឆ្នាំ២០១៧បន្ទាប់ពីបានរត់គេចពីប្រទេសបារ៉ែនគឺបានក្លាយជាជនជាតិអូស្ត្រាលីក្នុងពិធីមួយនៅទីក្រុងមែលប៊ន។
បុរសអាយុ២៥ឆ្នាំរូបនេះបានទទួលកេរ្តិ៍ឈ្មោះល្បីល្បាញជាអន្តរជាតិនៅពេលដែលគាត់ត្រូវបានគេចាប់ខ្លួន ខណៈពេលដែលស្ថិតក្នុងដំណើរក្រេបទឹកឃ្មុំនៅក្នុងប្រទេសថៃកាលពីឆ្នាំមុន។ គាត់ត្រូវបានតាមចាប់ដោយប្រទេសបារ៉ែនសម្រាប់បទល្មើសទាក់ទងនឹងការបះបោរ Arab Spring ឆ្នាំ២០១១។
ស្របពេលមានការថ្កោលទោសនៅទូទាំងពិភពលោក គាត់ត្រូវបានអនុញ្ញាតឲ្យវិលត្រលប់ទៅទីក្រុងមែលប៊នវិញដែលជាកន្លែងគាត់លេងបាល់ទាត់ពាក់កណ្តាលអាជីព។
លោក al-Araibi បានថតរូបជាមួយលោកនាយករដ្ឋមន្ត្រី Scott Morrison និងរដ្ឋមន្ត្រីការបរទេសលោកស្រី Marise Payne បន្ទាប់ពីពិធីមួយនៅទីលាន Federation Square ក្នុងទីក្រុងមែលប៊ន។
លោក al-Araibi បានបង្ហោះ Twitter ថា “វាគឺជាអារម្មណ៍ដ៏អស្ចារ្យក្នុងការទទួលបានការគោរពគ្រប់យ៉ាងនៅក្នុងពិធីចូលសញ្ជាតិរបស់ខ្ញុំ។ ខ្ញុំមានមោទនភាពដែលឃើញលោកស្រី Marise Payne និងអ្នកតំណាងរដ្ឋាភិបាលដទៃទៀតចូលរួមក្នុងពិធីរបស់ខ្ញុំ។ វាធ្វើឲ្យខ្ញុំមានអារម្មណ៍ថាមានសុវត្ថិភាព”។
លោកស្រី Payne បានប្រាប់ពិធីនេះថា ការផ្តល់ការគាំទ្រដ៏ច្រើនសន្ធឹកសន្ធាប់ដល់កីឡាករបាល់ទាត់រូបនេះបានដើរតួនាទីយ៉ាងសំខាន់ក្នុងការធានាឲ្យគាត់វិលត្រលប់មកប្រទេសអូស្ត្រាលីវិញ៕ AFP
Source: Kampuchea Thmey Daily
0 Comments