ការប្រកួតកីឡាវ៉ូវីណាមជើងឯកជាតិឆ្នាំ២០១៨ ដែលចាប់ផ្ដើមពីថ្ងៃទី២៦មកនោះបានបញ្ចប់ នៅព្រឹកថ្ងៃទី២៨ធ្នូ នាមជ្ឈមណ្ឌលកីឡាកងយោធពលខេមរភូមិន្ទ។
លោកប៊ូ ជុំសេរី អនុរដ្ឋលេខាធិការក្រសួងអប់រំយុវជន និង កីឡា និងលោកឧត្តមសេនីយ៍ឯកតែម ម៉ឺន អគ្គលេខាធិការរង គណៈកម្មាធិការជាតិអូឡាំពិកកម្ពុជា បានអញ្ជើញចូលរួមក្នុងពិធីបិទការប្រកួតនេះ។
ការប្រកួតឆ្នាំនេះ មាន១១សមាគម-ក្លិបទូទាំងប្រទេសចូលរួម ដែលមានកីឡាករចំនួន៥៩រូបនិងកីឡាការិនីចំនួន២៣រូប។ ការប្រកួតចែកចេញជា២ផ្នែកធំៗ ដែលមានចំនួន១៧វិញ្ញាសាគឺវិញ្ញាសាសំដែងមាន៨ដែលមានចំនួន៤៣ប្រកួតវិញ្ញាសាប្រយុទ្ធមាន៩ប្រភេទទម្ងន់ដែលមាន៤៣ប្រកួតដូចគ្នា ។
ឆ្លងការប្រកួតរយៈពេល៣ថ្ងៃនេះ ក្រសួងការពារជាតិដណ្តើមមេដាយច្រើនជាងគេគឺមានចំនួន៥គ្រឿងក្នុងនោះមេដាយមាស៤គ្រឿង និងមេដាយសំរិទ្ធ១គ្រឿង។ ក្រសួងមហាផ្ទៃឈរនៅចំណាត់ថ្នាក់លេខ២ដែលដណ្ដើមបានមេដាយសរុបចំនួន៦គ្រឿងគឺមេដាយមាស៣គ្រឿង ប្រាក់២គ្រឿង និងសំរិទ្ធ១គ្រឿង។ ខេត្តស្វាយរៀង បានធ្វើឲ្យគេភ្ញាក់ផ្អើលដោយសារតែពុំធ្លាប់ឮឈ្មោះសោះបែរជាដណ្ដើមបានចំណាត់ថ្នាក់លេខ៣ដោយដណ្ដើមបានមេដាយសរុបចំនួន ១០គ្រឿងក្នុងនោះមេដាយមាស៣គ្រឿង ប្រាក់១គ្រឿង និងសំរិទ្ធ៦គ្រឿង ។ សូមបញ្ជាក់ថា នេះជាការប្រកួត ដែលប្រើប្រាស់ថវិកាក្រសួងអប់រំយុវជន និង កីឡា៕
Source: Kampuchea Thmey Daily
0 Comments