កណ្តាល ៖ សមត្ថកិច្ចនគរបាលស្រុកពញាឮ បានចាប់ខ្លួនបុរសម្នាក់ពាក់ព័ន្ធករណីជួញដូរថ្នាំញៀនខុសច្បាប់ នៅកន្លែងកើតហេតុ នៅចំណុចផ្លូវបេតុងភូមិភ្នំបាត ឃុំភ្នំបាត ស្រុកពញាឮ ខេត្តកណ្តាល កាលពីម៉ោង១៥ថ្ងៃទី៨ ខែមីនា ឆ្នាំ២០១៩ ខណៈដែលជននេះកំពុងធ្វើសកម្មភាពលក់ថ្នាំញៀនជាមួយគូកនម្នាក់ទៀតរត់គេចខ្លួន។
ជនសង្ស័យខាងលើឈ្មោះ ពេជ្រ សួរ ហៅខ្មៅ ភេទប្រុស អាយុ២៧ឆ្នាំ ជនជាតិខ្មែរ គ្មានមុខរបរ ទីលំនៅភូមិសសី ឃុំកោះចិន ស្រុកពញាឮ ខេត្តកណ្តាល។
មន្ត្រីនគរបាលស្រុកពញាឮ បានឲ្យដឹងថា មុនពេលកើតហេតុកម្លាំងនគរបាលស្រុកបានមកសហការជាមួយកម្លាំងប៉ុស្តិ៍រដ្ឋបាលភ្នំបាត ចុះល្បាត និងស្រាវជ្រាវរកមុខសញ្ញាផ្សេងៗនៅក្នុងមូលដ្ឋាន។ លុះដល់ចំណុចកើតហេតុក៏ បានប្រទះឃើញជនសង្ស័យខាងលើ កំពុងតែធ្វើសកម្មភាពជួញដូរថ្នាំញៀន ទើបបង្ក្រាបតែម្តង ចាប់ឃាត់ខ្លួនបានម្នាក់ ឈ្មោះ ពេជ្រ សួរ ហៅខ្មៅ និងចាប់បានថ្នាំញៀនចំនួន២កញ្ចប់ធំជាវត្ថុតាង។
នៅចំពោះមុខសមត្ថកិច្ចជនសង្ស័យបានសារភាពថា ថ្នាំញៀនដែលខ្លួនយកមកលក់ឲ្យគេនៅពេលនេះ គឺបក្ខពួករបស់ខ្លួនម្នាក់ឈ្មោះ ឌីណា ភេទប្រុស ប្រើទូរស័ព្ទលេខ ០១៦ ២៣៨ ៧៨៦ រស់នៅក្នុងភូមិជាមួយគ្នា(ភូមិសសី ឃុំកោះចិន ស្រុកពញាឮ ខេត្តកណ្តាល) បានប្រើខ្លួនឲ្យយកថ្នាំញៀននេះចំនួន២កញ្ចប់មកលក់ ដោយតម្រូវឲ្យលក់តម្លៃ១០០ ០០០៛(ដប់ម៉ឺនរៀល) ក្នុង១កញ្ចប់
២កញ្ចប់តម្លៃ២០.០០០០រ (ម្ភៃម៉ឺនរៀល) ប៉ុន្តែខណៈកំពុងលក់ក៏ត្រូវសមត្ថកិច្ចមកចាប់ខ្លួនតែម្តង។
ចំណែកបក្ខរបស់គេម្នាក់ ឈ្មោះ ឌីណា នោះបានរត់គេចខ្លួនបាត់ហើយសមត្ថកិច្ចបានស្រាវជ្រាវសវតាជាតិរបស់ជនសង្ស័យដែលគេចខ្លួនដើម្បីតាមចាប់ខ្លួនយកមកប្រគល់ឲ្យតុលាការ តាមចម្លើយសារភាពបក្ខពួករបស់គេ៕
Source: Kampuchea Thmey Daily
0 Comments