មេបញ្ជាការជាន់ខ្ពស់អាមេរិកនៅតំបន់មជ្ឈិមបូព៌ា បាននិយាយកាលពីថ្ងៃព្រហស្បតិ៍ថា សម្ព័ន្ធមិត្តនៅក្នុងប្រទេសស៊ីរីចាំបាច់ត្រូវរក្សាការវាយលុកយ៉ាងប្រុងប្រយ័ត្នប្រឆាំងនឹងក្រុមរដ្ឋឥស្លាមដោយសារតែពួកគេនៅតែមិនទាន់បែកបាក់គ្នា ហើយកំពុងត្រៀមខ្លួនសម្រាប់ការបះបោរជាថ្មីបើទោះបីជាមានការលុបបំបាត់មូលដ្ឋានរបស់ពួកគេក៏ដោយ។
លោក Joseph Votel ប្រធានបញ្ជាការកណ្តាលអាមេរិកបានប្រាប់សភាថា “ការកាត់បន្ថយរដ្ឋ Caliphate គឺជាសមិទ្ធផលផ្នែកយោធាដ៏មហិមាមួយប៉ុន្តែការប្រយុទ្ធប្រឆាំងនឹងក្រុម ISIS និងភាពជ្រុលនិយមហិង្សាគឺនៅឆ្ងាយពីទីបញ្ចប់ណាស់ហើយបេសកកម្មរបស់យើងនៅតែដដែល”។
លោក Votel ដែលត្រូវបានគេរំពឹងថានឹងចូលនិវត្តន៍ក្នុងរយៈពេលប៉ុន្មានខែខាងមុខនេះបានប្រាប់គណកម្មាធិការសេវាប្រដាប់អាវុធសភាថា ដំណាក់កាលបន្ទាប់នៃការប្រយុទ្ធគឺនឹងត្រូវដោះស្រាយជាមួយមេដឹកនាំ ក្រុមយុទ្ធជននិងអ្នកសម្របសម្រួលដែលកំពុងលាក់ខ្លួនប៉ុន្តែនៅតែត្រូវបានជំរុញដោយមនោគមវិជ្ជាជ្រុលនិយម ។
លោកនិយាយថា “វានឹងមើលទៅដូចជាការបះបោរមួយ។ យើងនឹងឃើញការវាយប្រហារកម្រិតទាបៗ។ យើងនឹងមើលឃើញការធ្វើឃាត យើងនឹងឃើញការវាយប្រហារដោយគ្រាប់បែក យើងនឹងឃើញមានការវាយឆ្មក់ប្រភេទផ្សេងៗនៅពេលដែលពួកគេចាប់ផ្តើមចេញពីនេះ”។
លោក Votel បានពន្យល់អំពីការព្រមានរបស់គាត់ក្នុងរយៈពេលជិតបីខែបន្ទាប់ពីលោកប្រធានាធិបតី Donald Trump បានប្រកាសដកកងកម្លាំងអាមេរិកចេញពីប្រទេសស៊ីរីដោយអះអាងពីជ័យជម្នះលើក្រុម IS។
ដោយសារតែរងសម្ពាធពីសភានិងមន្ទីរបញ្ចកោណ ចាប់តាំងពីពេលនោះមក លោក Trump បានបន្ធូរបន្ថយចំណង់ចំណូលចិត្តរបស់លោកដើម្បីដកទ័ពយឺតៗថ្វីបើលោកបានទទូចកាលពីខែមុនថា ផែនការគឺត្រូវទុកកងកម្លាំងរក្សាសន្តិភាពចំនួន២០០នាក់នៅប្រទេសស៊ីរីក៏ដោយ។
លោក Votel ក៏បានព្រមានផងដែរថា ពួកយុទ្ធជន IS បរទេសរាប់រយនាក់និងក្រុមគ្រួសាររបស់-*ពួកគេដែលត្រូវបានចាប់ខ្លួននៅក្នុងប្រទេសស៊ីរីហើយឥឡូវនេះភាគច្រើនកំពុងស្ថិតនៅក្នុងដៃរបស់កងកម្លាំងប្រជាធិបតេយ្យស៊ីរីនោះគឺមានគ្រោះថ្នាក់ខ្លាំងណាស់ហើយបានអំពាវនាវឲ្យប្រទេសកំណើតរបស់ពួកគេត្រូវដោះស្រាយជាមួយពួកគេ៕ AFP
Source: Kampuchea Thmey Daily
0 Comments