ប៉ូលិសនៅក្នុងខេត្ដមួយចំនួននៅភាគខាងត្បូង បានបើកការសើុបអង្កេតនៅក្នុងកសិដ្ឋានចិញ្ចឹមជ្រូកស្របច្បាប់ ដោយសារតែមានការចោទប្រកាន់ថា មានការប្រើប្រាស់សារធាតុថ្នាំលើសចំណុះក្នុងការផ្ដល់ចំណី ដែលជាផលិតផលបន្ថែម បង្កឲ្យមានការគំរាមកំហែងដល់សុខភាពរបស់អ្នកអាស្រ័យសាច់ជ្រូកនោះ។
កាសែត Toui Tre វៀតណាមបានរាយការណ៍កាលពីថ្ងៃព្រហស្បតិ៍មកថា ស្នងការប៉ូលិសនៅខេត្ដ Tien Giang និងខេត្ដ Dong Nai បានបើកករណីស៊ើបអង្កេតនេះ បន្ទាប់ពីសំណាកជ្រូកជាច្រើនដែលបានមកពីកសិដ្ឋានចិញ្ចឹមជ្រូកនៅក្នុងខេត្ដទាំងនោះត្រូវបានរកឃើញពីកម្រិតសារធាតុ Salbutamol យ៉ាងខ្ពស់ប្រកបដោយគ្រោះថ្នាក់ឡើងដល់ទៅជាង៦០០ដង លើសពីកម្រិតដែលអនុញ្ញាតទៅទៀត។
ចំពោះខេត្ដទាំងពីរនេះគឺជាកន្លែងផ្ដល់នូវឧស្សាហកម្មកសិដ្ឋានចិញ្ចឹម និងផ្គត់ផ្គង់ជ្រូកយ៉ាងធំបំផុត។
នៅខេត្ដ Tien Giang មានសំណាក (samples) ៣០ក្នុងចំណោមសំណាកទាំង៥០ដែលកាលពីពេលថ្មីៗនេះ បានមកពីកសិដ្ឋានធំៗ១២កន្លែងត្រូវបានរកឃើញពីមូលហេតុ ដែលនេះបើយោងតាមរបាយការណ៍ព័ត៌មាន។
គឺមានតែម្ចាស់កសិដ្ឋានតែម្នាក់ទេ ដែលបានសារភាពពីការប្រើប្រាស់ថ្នាំដែលដាក់នៅក្នុងចំណីសត្វជ្រូកលើសកម្រិត ខណៈពេលដែលម្ចាស់កសិដ្ឋានដទៃទៀតបែរជាចោទទៅលើផលិតផលចំណីជ្រូកទៅវិញ។
តាមការឲ្យដឹងនោះថា កសិដ្ឋានទាំងឡាយមានជ្រូកស្ដុកដល់ទៅជិត៨០០ក្បាល ត្រូវជាប់សង្ស័យថា គេបានទិញជ្រូកដែលមានទម្ងន់ប្រមាណ៨០ទៅ១០០គីឡូក្រាម ហើយយកមកបំប៉នដោយដាក់ថ្នាំឲ្យសីុដើម្បីឲ្យកើនទម្ងន់រយៈពេលពី៧ទៅ២០ថ្ងៃ។
ពេលដែលជ្រូកឡើងទម្ងន់ដល់ទៅ១៣០គីឡូក្រាម ទើបគេយកវាលក់ចេញដើម្បីកាប់សាច់ទៅកាន់ក្រុងហូជីមិញជាពិសេស។ នេះជាការលើកឡើងដោយ Tuoi Tre។
ការសិក្សាស្រាវជ្រាវជាអន្ដរជាតិបានរកឃើញថា សារធាតុ Salbutamol លើសកម្រិតវាអាចបន្សល់សារធាតុនោះនៅក្នុងកោសិការបស់ជ្រូក ក្នុងនោះមានទាំងនៅក្នុងថ្លើម និងក្រលៀនរបស់សត្វផងដែរ ហើយពេលយកទៅចម្អិនបរិភោគសម្រាប់មនុស្សវិញ សារធាតុនោះក៏មិនរលាយបាត់បង់ទៅដែរ។
ពេលមនុស្សបរិភោគសាច់ជ្រូកនោះវាអាចបណ្ដាលឲ្យបេះដូងលោតយ៉ាងញាប់ វិលមុខធីងធោង ឈឺក្បាល ចេះតែបារម្ភមួម៉ៅ ច្របូកច្របល់ក្នុងចិត្ដ ហើយលើសសម្ពាមឈាមថែមទៀតផង។ ពិសេសករណីបែបយ៉ាងនេះកើតមានចំពោះអ្នកផងទាំងឡាយណាដែលមានជំងឺអាការៈបេះដូងធ្វើទុក្ខ និងជំងឺលើសសម្ពាធឈាម៕
Thanh Nien News
ប៉ូលិសវៀតណាមបើកការស៊ើបអង្កេតទៅលើកសិដ្ឋានចិញ្ចឹមជ្រូក ព្រោះតែបារម្ភការប្រើថ្នាំលើសចំណុះ
0 Comments