ប្រជាកសិករខ្មែរពីបុរាណបានកត់សម្គាល់អំពីសកម្មភាពនានា របស់សត្វដែលរស់នៅក្នុងធម្មជាតិទុកជាការប្រៀបធៀបនឹងសកម្មភាពមនុស្សសម្រាប់ជាការដាស់តឿនក្រើនរំលឹកដល់កូនចៅបន្តគ្រប់ជំនាន់ឲ្យបានចងចាំ។ ជាក់ស្តែងដូចជានៅតាមទីកន្លែងដែលមានទឹកបើទីនោះមានត្រីគេសម្គាល់តាមរយៈមាត់ត្រី ឬសូរ ចិបចុបៗជាដើម។ ជាពិសេសគេស្រួលចំណាំបំផុតចំពោះ កន្លែងដែលមានត្រីកំភ្លាញដែលបានបញ្ចេញសំឡេងឲ្យគេដឹងផង និងមានពុកមាត់ ប៉ប្រះនឹងផ្ទៃទឹកផង។ ហេតុនេះហើយទើបគេមានការងាយស្រួលក្នុងការត្រងចាប់យកត្រីកំភ្លាញ។ យ៉ាងនេះហើយទើបពាក្យចាស់ពោលថា កំភ្លាញ ងាប់ពីព្រោះមាត់” នោះ។
ចំពោះហេតុផលដែលដូនតាបានកត់សម្គាល់នោះគឺត្រីកំភ្លាញងាប់ពីព្រោះមាត់។ ទន្ទឹមនេះផងដែរក៏មានពាក្យស្លោកជាទស្សនៈចាស់បុរាណបានបញ្ជាក់បន្តមកទៀតថា “ធម្មតា មច្ឆាងាប់ព្រោះមាត់,ខ្វែកបក្សីសត្វងាប់ព្រោះអាចម៍ មនុស្សសន្និវាសទោះរាស្ត្រ ស្តេចសម្រេចលើស្រីសព្វកិច្ចការ”។ ប៉ុន្តែយើងធ្វើការបង្ហាញតែពីរឿងមច្ឆាប៉ុណ្ណោះ ព្រោះនៅក្នុងទឹកដែលមានមច្ឆានោះគឺផ្ទៃទឹកនោះមិនដែលស្ងាត់នោះទេ។ គឺផ្ទៃទឹកនៅទីនោះតែងមានត្រីហែលត្រសងទៅមករកចំណីរបស់វា។ ទន្ទឹមនេះដែរត្រីទាំងឡាយបានហែលដោយការភេល ឬហើបមកលើផ្ទៃទឹកត្រៀបត្រាដើម្បីបញ្ចេញសំឡេងហៅថា ឡើងឲ្យទឹក ឬបានបញ្ចេញពពុះមកលើដោយមានស្នូរប៊ិកប៊ាក់ៗទៀតផង។ ឃើញយ៉ាងនេះអ្នកនេសាទគិតថា ទឹកនៅទីនោះប្រាកដជាមានត្រីហើយក៏បានលៃលករកមធ្យោបាយដើម្បីចាប់យកត្រីទៅធ្វើអាហារសម្រាប់បរិភោគ។ ដោយឡែកសម្រាប់ពួកត្រីកំភ្លាញវិញក៏គេមានការងាយស្រួលនេសាទជាងត្រីឯទៀតបំផុត ព្រោះវាហែលនៅ
ក្បែរផ្ទៃទឹកខាងលើ ដោយបានបង្ហាញខ្លួនយ៉ាងច្បាស់និងមានការបញ្ចេញសំឡេងឲ្យដឹងផង។
បើនិយាយអំពីន័យប្រៀបធៀបរបស់ដូនតាពីបុរាណនោះគឺ មាត់ត្រីកំភ្លាញនេះសំដៅទៅមនុស្សដែលគេហៅថា “មាត់គ្មានគម្រប” ព្រោះមាត់នេះបានបញ្ចេញសម្តីធ្វើឲ្យប៉ះពាល់ដល់សេចក្តីថ្លៃថ្នូររបស់អ្នកដទៃ ឬគេហៅថា ជាមនុស្សមាត់ដាច។ ដូចពាក្យចាស់ពោលថា “អណ្តាតជាអាទិ៍ កន្លងសុខផង ទុក្ខផង ព្រោះអណ្តាត”។ បានសេចក្តីថា មនុស្សដែលនិយាយមិនបានគិតពីហេតុផលជុំវិញខ្លួននេះហើយជាមាត់ត្រីកំភ្លាញដោយសារការបញ្ចេញសម្តីតាមតែខ្លួននឹកឃើញហៅថា ជាការស្រឹងទឹកមាត់ដោយឥតមានក្រែងរអែងអ្វីទាំងអស់ ឬគេហៅថា ជាសម្តីខ្ពស់យកមេឃទ្រាប់គូថអង្គុយ ទៀតផង។ ការនិយាយប៉ប៉ាច់ប៉ប៉ោចប៉ាតណា ប៉ាតណី តែពីសតែពាសផ្តេសផ្តាសនេះវាមិនខុសពីមាត់ត្រីកំភ្លាញនោះទេ។ បានសេចក្តីថា ត្រីកំភ្លាញត្រូវទទួលរងគ្រោះ ព្រោះតែមាត់ខ្លួនឯងពិតប្រាកដ។
ផ្តើមចេញពីមាត់ត្រីកំភ្លាញដែលពាក្យចាស់បានលើកមកធ្វើជាឧបមានវិធីទុកជាឧត្តមគតិឲ្យកូនចៅបានចងចាំគ្រប់ជំនាន់នេះ បើគេសង្កេត និងធ្វើការតាមដានទៅសម្តីមេគណបក្សប្រឆាំងឈ្មោះថា គណបក្សសង្គ្រោះជាតិនោះក៏មិនខុសពីមាត់ត្រីកំភ្លាញនោះដែរ។ តាមពិតមេបក្សរូបនេះកំពុងតែជួបនូវ យីអ៊ុនដាក់យ៉ាងខ្លាំងព្រោះគ្រប់តែការបញ្ចេញសម្តីរបស់គាត់ក៏មិនខុសពីការរុកសំបុកឪម៉ាល់នោះដែរ។ គេអាចសន្និដ្ឋានថា ប្រាកដជាត្រូវឪម៉ាល់ទិចជាមិនខានព្រោះសម្តីរបស់មេបក្សនេះម៉ាត់ណាក៏ទោស ម៉ាត់ណាក៏រឿងរ៉ាវអាក្រក់ឡងទៅវិញជារៀងរាល់លើក។ ជាពិសេសគេតែងនិយាយថា មេបក្សនេះលាងតែងគូថខ្លួនឯងមិនជ្រះផងគឺផ្ទៃក្នុងនៃគណបក្សកំពុងបែកវល់ខ្ទេចខ្ទាំហើយពួកអាម៉ីអាថោងកំពុងជាប់ទោសនិងខ្លះរត់ចោលស្រុកខ្ចាត់ខ្ចាយ តើមកពីមារយាទរបស់មេបក្សមែនឬ? ប្រាកដណាស់គឺមិនខុសពីពាក្យចាស់ពោលថា “កំភ្លាញងាប់ព្រោះមាត់”នោះឡើយ៕
លី ហាក់សេង
ទស្សនៈ ៖ មាត់ត្រីកំភ្លាញ
0 Comments