អ្នកប្រដាល់ជើងខ្លាំងកម្ពុជាទាំង២រូប គឺ វង្ស ណយ អ្នកប្រដាល់ក្លិបអាណាចក្រគុនខ្មែរ និងសុខ សាវិន អ្នកប្រដាល់ក្លិបអេលីតគុនខ្មែរ បានវាយឈ្នះថៃដូចគ្នា នៅក្នុងការជួបប្រកួតគ្នា លើសង្វៀនបាយ័នបឹងស្នោ កាលពីរសៀលថ្ងៃអាទិត្យទី០៣ មិថុនា ២០១៨។
វង្ស ណយ គេបានផ្ដួលអ្នកប្រដាល់ថៃSaengpetch Arjarn. Smilar អោយបោះបង់ការប្រកួតក្នុងទឹកទី៣ បន្ទាប់ពីគេបានទាត់ជើងឆ្វេងរបស់ថៃនោះ អោយខូចឈឺដួលក្រោកលែងរួច ។ ពួកគេទាំងពីរ ជួបប្រកួតគ្នាក្នុងប្រភេទទម្ងន់៧០គីឡូក្រាម
យ៉ាងណា វង្ស ណយលើកនេះ គេបានត្រៀមខ្លួនយ៉ាងល្អ សម្រាប់ការឡើងប្រកួតជាមួយSaengpetchនេះ ទើបគេយកឈ្នះដោយងាយស្រួលបែបនេះ ។
ចំពោះ សុខ សាវិន អ្នកប្រដាល់ក្លិបអេលីតគុនខ្មែរវិញ គេបានយកឈ្នះអ្នកប្រដាល់ថៃ Deth Jitmuengnon ត្រឹមតែពិន្ទុប៉ុណ្ណោះ ក្រោយពីវាយគ្នា៥ទឹកពេញនោះ។ ពួកគេទាំងពីរ ប្រកួតគ្នាក្នុងទម្ងន់៦០ គ.ក្រ។
Deth Jitmuengnon ដែលជាគូរបស់សុខ សាវិននេះ ធ្លាប់មកប្រកួតនៅកម្ពុជាប៉ុន្មានលើកហើយកន្លងមក ដោយធ្លាប់យកឈ្នះអ្នកប្រដាល់កម្ពុជាយើងថែមទៀត ប៉ុន្តែលើកនេះបានចាញ់ក្រោមជង្គង់និងកែងរបស់សាវិន។
សាវិនគេបានវាយកែងអោយបែកថ្ងាសលើចិញ្ចើមខាងស្តាំនិងអុកជង្គង់ចូលពោះទឹក របស់ Deth Jitmuengnon នៅក្នុងទឹកទី៥ ដែលធ្វើអោយអោយអ្នកប្រដាល់ថៃនោះ ថមថយកម្លាំងនិងចាញ់ប្រៀបឈ្នះរបស់គេ។
ដោយឡែក សម្រាប់ការប្រកួតគូពិសេសខ្មែរនិងខ្មែរវិញ ម៉ន វណ្ណី អ្នកប្រដាល់ក្លិបការិយាល័យទី៥ កងទ័ពជើងគោក បានវាយចាញ់គង់ វិរៈ អ្នកប្រដាល់ក្លិបយុវវាលស្បូវខណ្ឌច្បារអំពៅដោយពិន្ទុ បន្ទាប់ពីប្រកួតគ្នាប្រាំទឹកពេញនោះ។ ពួកគេប្រកួតក្នុងទម្ងន់៥៤គីឡូក្រាម។
ចំណែក លន់ សៀកឡេង អ្នកប្រដាល់ក្លិបរស្មីភូមិគាបខេត្តបន្ទាយមានជ័យ ប្រកួតស្មើពិន្ទុ ជាមួយសំណាង សម្បត្តិ អ្នកប្រដាល់ក្លិបកងចក្ររាជសីហ៍មានរិទ្ធ ហើយរិទ្ធ ផៃឡុក ដែលជាអ្នកប្រដាល់ជើងថ្មីក្លិបអាណាចក្រគុនខ្មែរ បានផ្តួលហង់ រដ្ឋា អ្នកប្រដាល់ជើងថ្មីដូចគ្នា នៃក្លិបពន្លឺវិបុលមានរិទ្ធ អោយសន្លប់ក្នុងទឹកទី២៕
នៅសង្វៀនស្ទឹងមានជ័យ ៖ ឈឿន ឆៃដែន និង វី ស្រីខួចចាញ់ថៃដូចគ្នា
ឈឿន ឆៃដែន អ្នកប្រដាល់ក្លិបនិរោធមានជ័យ និង កីឡាការិនី វី ស្រីខួច អ្នកប្រដាល់ក្លិបនាគមានជ័យ ប្រកួតចាញ់ថៃដូចគ្នា នៅក្នុងការជួបប្រកួតគ្នាលើសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យ ទី០៣មិថុនា២០១៨។
ឈឿន ឆៃដែន បានវាយចាញ់អ្នកប្រដាល់ថៃចំណូលថ្មីRithiara Klamu engpetch នៅក្នុងទឹកទី៣ ដោយអាជ្ញាកណ្តាលបញ្ឈប់លែងអោយប្រកួត បន្ទាប់ពីគេត្រូវអ្នកប្រដាល់ថៃទាត់អោយខូចជើងខាងឆ្វេងនោះ។ពួកគេទាំងពីរជួបប្រកួតគ្នាក្នុងប្រភេទទម្ងន់៦០គីឡូក្រាម។
ឆៃដែន ត្រូវអាជ្ញាកណ្តាលរាប់៨ ចំនួន៣លើក ដោយរាប់ក្នុងទឹកទី១ពីរលើក និងក្នុងទឹកទី២ មួយលើក ដោយសារតែត្រូវRithiara ទាត់ជើងរបស់គេដួលលើរេញនោះ។ មកដល់ដើមទឹកទី៣ ឆៃដែន ក៏ត្រូវថៃទាត់ចំជើងឈឺដដែល អោយដួលម្តងទៀត ហើយអាជ្ញាកណ្តាល ក៏បញ្ឈប់លែងឲ្យប្រកួតបន្តតែម្តង ព្រោះដួលរាប់៣លើកទៅហើយនោះ។
សម្រាប់ការប្រកួតគូអន្តរជាតិនារីវិញ វី ស្រីខួច កីឡាការិនីប្រដាល់ក្លិបនាគរាជមានជ័យ បានវាយចាញ់កីឡាការិនីថៃ Phlayfar Sor.Nithya ដោយពិន្ទុ បន្ទាប់ពីវាយគ្នា៥ទឹកពេញនោះ។
កីឡាការិនីថៃ Phlayfar មានទម្ងន់ជើង និងកណ្តាប់ដៃធ្ងន់ជាងវី ស្រីខួច ហើយកម្លាំងស៊ុហ្វរបស់គេ ក៏ខ្លាំងជាងដែរ ដែលក្នុងមួយទឹកយ៉ាងហោចណាស់ ក៏ធ្វើអោយស្រីខួចដួលលើរេញពីរលើកដែរ។ចំពោះ ស៊ូ វណ្ណះ អ្នកប្រដាល់ក្លិបនាគរាជមានជ័យ បានប្រកួតស្មើពិន្ទុជាមួយ សុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២។ ពួកគេទាំងពីរ ប្រកួតគ្នាក្នុងទម្ងន់៦៣,៥០០ គីឡូក្រាម៕
Source: Kampuchea Thmey Daily
0 Comments