ភ្នំពេញ ៖ ស្ត្រីម្នាក់ ដោយសារតែខឹងនឹងប្តីរបស់ខ្លួនជាជនបរទេសមិនមិនគិតគូរប្រពន្ធ កូនហើយមានស្រីថ្មីថែមទៀតនោះ ក៏សម្រេចបីកូនរបស់ខ្លួនដែលមានអាយុ២ខែប៉ុណ្ណោះ មកប៉ុនប៉ងលោតសម្លាប់ខ្លួននៅលើស្ពានជ្រោយចង្វារ តែសំណាងល្អបានកម្លាំងសមត្ថកិច្ចឃើញជួយអន្តរាគមន៍ទាន់ពេល និងបង្កឲ្យមានការភ្ញាក់ផ្អើលឡើងកាលវេលាម៉ោង១២និង៤០នាទីរំលង អធ្រាត្រ ឈានចូលថ្ងៃចន្ទ ទី០៤ ខែមិថុនា ឆ្នាំ២០១៨នេះ ត្រង់ចំណុចលើស្ពានជ្រោយចង្វារថ្មីស្ថិតក្នុងសង្កាត់ស្រះចក ខណ្ឌដូនពេញ។
ស្ត្រី ដែលបីកូនតូចអាយុ២ខែប៉ុនប៉ងសម្លាប់ខ្លួននេះ មានឈ្មោះ ខេង ណាវី ភេទស្រី អាយុ២៧ឆ្នាំ មុខរបរនៅផ្ទះ ស្នាក់នៅផ្ទះជួល ម្ដុំរោងកុនលុច្ស ស្ថិតក្នុងខណ្ឌដូនពេញ មានស្រុកកំណើត នៅក្រុងសួង ខេត្តត្បូងឃ្មុំ ជាកូនកំព្រាឪពុកម្តាយ។
ស្ត្រីរូបនោះបានបន្តថា ប្តីរបស់គាត់ជនជាតិបរទេស តែគាត់មិនបានបង្ហើបប្រាប់ថា ជាជនជាតិអី ឬក៏មានអីនោះទេ គ្រាន់តែគាត់រៀបរាប់ទាំងទឹកភ្នែកហូររហាមថា មូលហេតុ ដែលគាត់ឈានសម្រេចចិត្តបីកូនតូច២ខែមកលោតទឹកសម្លាប់ខ្លួនបែបនេះ ដោយសារគាត់ពិបាកចិត្តខ្លាំងពេកមិនអាចធ្វើអ្វី ក្រៅពីបញ្ចប់ជីវិតនោះទេ ព្រោះប្ដីដែលរួមរស់ជាមួយគ្នាអស់រយៈកាលជាង៨ឆ្នាំមកហើយនោះ តែដោយសារមួយរយៈនេះប្ដីគាត់ដើរលេង មិនសូវចូលផ្ទះនោះទេ និងមានស្រីនៅខាងក្រៅថែមទៀតនោះ។ គាត់វិញ(ជនរងគ្រោះ)លុយក៏គ្មានចាយ បាយក៏គ្មានហូប គ្រប់គ្រាន់ក៏គិតបែបនេះតែម្តង។
ប្រភពព័ត៌មានបានបន្តទៀតថា ក្នុងខណៈ ដែលកម្លាំងសមត្ថកិច្ចបានរារាំងពីការប៉ុនប៉ងសម្លាប់ខ្លួនរបស់ស្ត្រីរូបនោះទាំងម្តាយ និងកូនបានហើយនោះ កម្លាំងក៏បានលួងលោមនាងឲ្យឡើងជិះម៉ូតូនាំទៅកាន់ស្នាក់ការប៉ុស្តិ៍ស្រះចកណែនាំឲ្យគាត់ឈប់មានបំណងប៉ងសម្លាប់ខ្លួនដូច្នេះតទៅទៀតហើយក៏ឲ្យវិលត្រឡប់ទៅផ្ទះវិញផងដែរ៕
Source: Kampuchea Thmey Daily
0 Comments