លោកឃ្លាំង ហួត ចូលរួមដឹកនាំយុវជន និងសមាជិកបក្សដង្ហែក្បួនឃោសនានៅថ្ងៃបញ្ចប់

ភ្នំពេញ ៖ បន្ទាប់ពីការធ្វើ យុទ្ធនាការ ឃោសនា យ៉ាងសកម្ម អស់រយៈពេល ២០ ថ្ងៃកន្លងមក នៅព្រឹកថ្ងៃទី២៧ខែកក្កដា ឆ្នាំ២០១៨ លោក ឃ្លាំង ហួត ប្រធាន គណៈកម្មការគណបក្សប្រជាជនខណ្ឌជ្រោយចង្វារ បានដឹកនាំក្រុមយុវជនខណ្ឌនិងសមាជិកបក្សខណ្ឌ ចូលរួមមីទ្ទិញជាមួយ គណបក្ស ប្រជាជនកម្ពុជាទូទាំងរាជធានីនៅកោះពេជ្រ។

បន្ទាប់ពីក្បួន ឃោសនាជួបជុំគ្នាធ្វើមីទ្ទិញនៅកោះពេជ្រចប់ ក៏បានចេញដំណើរគ្រប់ច្រកល្ហក រួច សមាជិក សមាជិកា គណបក្ស ប្រជាជនកម្ពុជា ទាំងអស់បែកគ្នាហូបបាយ។ លុះនៅវេលាម៉ោង២រសៀលសមាជិកបានមកជួបជុំគ្នាចំនួន៥០០០នាក់នៅជិតអូតែលសុខាជ្រោយចង្វារហើយបែងចែកជា២គោលដៅ ដើម្បីដង្ហែក្នុងមូលដ្ឋាន។

គោលដៅទី១មានសមាជិកជា៣០០០នាក់ដង្ហែនៅផ្លូវជាតិលេខ៦និងក្នុងមូលដ្ឋានជ្រោយចង្វារ គោលដៅទី២មានសមាជិកជាង១៥០០នាក់បានដង្ហែនៅទឹកដីសង្កាត់កោះដាច់។

បន្ទាប់ពីប្រារព្ធពិធីបិទ ការដង្ហែក្បួនឃោសនា ថ្ងៃចុងក្រោយនេះពេលយប់ក្រុមតន្ត្រីនឹងជួបជុំប្រគំនៅរង្វង់មូលនាងទេពមច្ឆា ក្នុងក្រុមហ៊ុនOCIC រហូតដល់យប់ម៉ោង១០យប់ ទើបចប់។ ក្នុងឱកាសប្រារព្ធ ពិធីបិទការដង្ហែក្បួន ឃោសនានេះផងដេរ លោក ឃ្លាំង ហួត បាន បង្ហាញនូវភាពរឹងមាំ របស់គណបក្ស និងជំហរយ៉ាងមុតមាំ របស់សមាជិក សមាជិកគណបក្ស ក្នុងការគាំទ្រ និង បោះឆ្នោតជូនគណបក្ស ប្រជាជនកម្ពុជា ដើម្បីគាំទ្រសម្តេចតេជោធ្វើជានាយករដ្ឋមន្ត្រី សម្រាប់អាណត្តិទី៦ ខាង មុខនេះ និងអាណត្តិបន្តបន្ទាប់ទៀត។

ក្នុងឱកាសថ្ងៃ បញ្ចប់យុទ្ធនាការឃោសនាបោះឆ្នោតជ្រើស តាំងតំណាងរាស្ត្រ នីតិកាលទី៦ នៃរដ្ឋសភា លោក បានសម្តែងការគោរព និងអំណរគុណ ដ៏ជ្រាលជ្រៅ បំផុតជូនជនរួមជាតិ នៅគ្រប់ទិសទី គ្រប់ស្រទាប់វណ្ណៈ គ្រប់មជ្ឈដ្ឋាននានា ក្នុងសង្គម ជាពិសេស ស្រទាប់ យុវជនយ៉ាងច្រើនកុះករបំផុត ដែលបានគាំទ្រកម្មវិធីនយោបាយ របស់គណបក្សប្រជាជនកម្ពុជា ក្នុងការកសាង និងការពារជាតិមាតុភូមិ រយៈពេលកន្លងមកនិងឆ្នាំ២០១៨-២០២៣ បន្តទៀតដោយ បានចូលរួមយ៉ាងសកម្មក្នុងយុទ្ធនាការឃោសនា របស់ គណបក្សប្រកបដោយវិចារណញ្ញាណដ៏ថ្លៃថ្លា និងភាពថ្លៃថ្នូរ រក្សាបានយ៉ាងខ្ជាប់ខ្ជួននូវភាពនឹងនរ អត់ធ្មត់ចំពោះ ពាក្យសម្តីភូតកុហក វាយប្រហារ មួលបង្កាច់ការពិតយ៉ាង អសុរោះបំផុត និងអំពើអុចអាល ញុះញង់បង្កហេតុពីបក្សផ្សេងនិងអតីតពួកប្រឆាំង។

នៅថ្ងៃបញ្ចប់នេះដែរ លោក ឃ្លាំង ហួត ក៏បានអំពាវនាវឲ្យសមាជិក សមាជិកាគណបក្សប្រជាជនកម្ពុជា ទាំងអស់ អញ្ជើញទៅបោះឆ្នោត ឲ្យបាន គ្រប់ៗគ្នា នៅថ្ងៃទី២៩ ខែកក្កដា ឆ្នាំ ២០១៨ នាពេលដ៏ខ្លីខាងមុខនេះ និងសូមបោះឆ្នោតជូន គណបក្សប្រជាជន កម្ពុជា ដែលមានលេខរៀងទី ២០ និងមានរូបសញ្ញាទេវតាបាចផ្កាជាសម្គាល់ ដើម្បីរក្សាសុខសន្តិភាព ស្ថិរភាព នយោបាយ បន្តការអភិវឌ្ឍប្រទេសឲ្យ កាន់តែមានការរីកចម្រើន បន្ថែមទៀត កាត់បន្ថយភាពក្រីក្រ បង្កើនការងារធ្វើ ជូនប្រជាពលរដ្ឋ និងទប់ស្កាត់នូវការវិលត្រឡប់មកវិញនៃរបបប្រល័យពូជសាសន៍ និងសូមកុំភ្លេចយកទៅជាមួយ នូវឯកសារដែលបញ្ជាក់អំពីអត្តសញ្ញាណ នៅពេលទៅបោះឆ្នោត៕