យន្តហោះយោធាអាមេរិកមួយគ្រឿង បានដឹកអដ្ឋិធាតុទាហានអាមេរិកចេញពីប្រទេសកូរ៉េខាងជើងនៅថ្ងៃសុក្រ ដែលនេះជាទង្វើមួយត្រូវបានសរសើរដោយសេតវិមានថាជា “ជំហានវិជ្ជមាន” មួយសម្រាប់ការទប់ស្កាត់ភាពផុយស្រួយរវាងគូប្រជែងទាំងពីរ។
ការបញ្ជូនត្រឡប់មកវិញនៃអដ្ឋិធាតុទាំងនេះដែលធ្វើឡើងនៅខួប៦៥ឆ្នាំនៃការបញ្ចប់សង្គ្រាមកូរ៉េគឺសម្គាល់ជាការបំពេញតាមកិច្ចព្រមព្រៀងមួយដែលឈានដល់រវាងលោកប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន នៅឯកិច្ចប្រជុំកំពូលជាប្រវត្តិសាស្ត្ររបស់ពួកគេក្នុងប្រទេសសិង្ហបុរីកាលពីខែមុន។
លោក ត្រាំ បាននិយាយនៅក្នុងសេចក្តីថ្លែងការណ៍មួយថា “បន្ទាប់ពីរយៈពេលជាច្រើនឆ្នាំ នេះគឺជាពេលវេលាដ៏អស្ចារ្យមួយសម្រាប់ក្រុមគ្រួសារជាច្រើន។ សូមអរគុណលោកគីមជុងអ៊ុន”។
សេតវិមានបាននិយាយថា “សកម្មភាពថ្ងៃនេះគឺតំណាងឲ្យជំហានដំបូងដ៏សំខាន់មួយដើម្បីចាប់ផ្តើមធ្វើមាតុភូមិនិវត្តន៍អដ្ឋិធាតុពីកូរ៉េខាងជើងនិងបន្តប្រតិបត្តិការនៅកូរ៉េខាងជើងឡើងវិញដើម្បីស្វែងរកជនជាតិអាមេរិកចំនួន៥,៣០០នាក់ដែលមិនទាន់ត្រឡប់មកស្រុកកំណើតវិញ”។
ក្រោយពេលចាកចេញពីទីក្រុងកំពង់ផែ Wonsan នៃប្រទេសកូរ៉េខាងជើង យន្តហោះដឹកទំនិញ C-17 បានចុះចតនៅឯមូលដ្ឋានទ័ពអាកាសអាមេរិក Osan ក្នុងប្រទេសកូរ៉េខាងត្បូងដែលនៅទីនោះទាហានអាមេរិកបានឈរតម្រង់ជួរសម្រាប់ពិធីមួយ។
បញ្ជាការដ្ឋានសហប្រជាជាតិ (UNC) នៅប្រទេសកូរ៉េខាងត្បូងបាននិយាយថា អដ្ឋិធាតុចំនួន៥៥គឺស្ថិតនៅលើយន្តហោះនោះ។
លោកឧត្តមសេនីយ៍ Vincent Brooks មេបញ្ជាការ UNC និងកងកម្លាំងសហរដ្ឋអាមេរិកនៅកូរ៉េបាននិយាយក្នុងសេចក្តីថ្លែងការណ៍មួយថា “វាគឺជាបេសកកម្មជោគជ័យមួយបន្ទាប់ពីមានការសម្របសម្រួលយ៉ាងទូលំទូលាយ។ ឥឡូវនេះយើងកំពុងត្រៀមគោរពដល់ទាហានរបស់យើងមុនពេលពួកគេបន្តដំណើរទៅផ្ទះរបស់ពួកគេ”។
អដ្ឋិធាតុដែលត្រូវបញ្ជូនទៅកាន់ទីក្រុង Osan នៅថ្ងៃសុក្រគឺត្រូវបានគេរំពឹងថានឹងត្រូវបញ្ជូនទៅកោះហាវ៉ៃសម្រាប់ការកំណត់អត្តសញ្ញាណក្រោយមកនឹងមានការធ្វើមាតុភូមិនិវត្តន៍ជាផ្លូវការនៅថ្ងៃពុធក្រោយ។
យោងតាមមន្ទីរបញ្ចកោណបានឲ្យដឹងថា ជនជាតិអាមេរិកជាង៣៥,០០០នាក់ត្រូវបានសម្លាប់នៅឧបទ្វីបកូរ៉េក្នុងអំឡុងសង្គ្រាមដែលក្នុងនោះមានប្រហែល៧,៧០០នាក់នៅតែត្រូវបានគេចាត់ទុកថាបាត់ខ្លួនរួមទាំង៥,៣០០នាក់នៅប្រទេសកូរ៉េខាងជើងផងដែរ៕ AFP
Source: Kampuchea Thmey Daily
0 Comments