ព្រះសីហនុ ៖ បុរសម្នាក់បានបាក់.ក និងបែកថ្លើមស្លាប់ភ្លាមៗយ៉ាងអាណោចអាធ័មដេកលើចិញ្ចើមថ្នល់ក្នុងហេតុការណ៍គ្រោះថ្នាក់ចរាចរណ៍ បង្កឡើងដោយសាររថយន្តបើកបុកម៉ូតូក្នុងទិសដៅស្របគ្នា។
ករណីគ្រោះថ្នាក់ចរាចរណ៍នេះ បានកើតមានឡើងនៅម៉ោង០០និង២៥នាទីយប់ថ្ងៃទី៣១ ខែកក្កដា ឆ្នាំ២០១៨ លើផ្លូវជាតិលេខ៤នៅចន្លោះគីឡូម៉ែត្រលេខ១៦៩+១៧០ ស្ថិតនៅក្នុងភូមិតាពៅ ឃុំតានៃស្រុកព្រៃនប់ ខេត្តព្រះសីហនុ។
សមត្ថកិច្ចបានឲ្យដឹងថា រថយន្តបន្ទាប់ពីបើកបុកម៉ូតូបង្កឲ្យស្លាប់មនុស្សម្នាក់ហើយនោះ រថយន្តបានជ្រុលទៅបុករបងផ្ទះប្រជាពលរដ្ឋបណ្តាលឲ្យរថយន្តបែកក្បាលខាងមុខ ព្រមទាំងកំពិតទ្វារផ្នែកខាងក្រោយយ៉ាងធ្ងន់ធ្ងរផងដែរ។
សមត្ថកិច្ចបានប្រាប់ថា រថយន្ត បង្កម៉ាកHILANDER ពណ៌ ទឹកប្រាក់ ពាក់ស្លាកលេខ ព្រះសីហនុ2A-8605 បើកបរដោយឈ្មោះ សុខ ខៃ ភេទប្រុស អាយុ៤៤ឆ្នាំ មុខរបរ រត់តាក់ស៊ី មានទីលំនៅក្រុម២១ សង្កាត់លេខ៤ ក្រុង/ខេត្តព្រះសីហនុ។ សមត្ថកិច្ចបានឲ្យដឹងទៀតថា រថយន្តបើកក្នុងទិសដៅពីភ្នំពេញទៅព្រះសីហនុ មកដល់ចំណុចខាងលើ បានប៉ះនិងបុកជាមួយម៉ូតូមួយគ្រឿង ម៉ាកវេវ ពណ៌ខៀវ គ្មានស្លាកលេខ បណ្តាលឲ្យអ្នកបើកបរម៉ូតូឈ្មោះហុង មៅ ភេទប្រុស អាយុ៣៤ឆ្នាំ មុខរបរកម្មករ មានទីលំនៅ ភូមិត្រពាំងគា ឃុំជើងគោ ស្រុកព្រៃនប់ខេត្តព្រះសីហនុក្នុងទិសដៅស្រប (ស្លាប់)។
ក្រោយកើតហេតុអ្នកបើកបរ មិនបានរត់ទៅណាទេ បន្ទាប់មកក៏ត្រូវសមត្ថកិច្ចឃាត់ខ្លួនដើម្បីសួរនាំតាមបន្តតាមនីតិវិធីច្បាប់។ ដោយឡែក សាកសពសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។ សមត្ថកិច្ចបានវាយតម្លៃថា រថយន្តបានខូចខាតប្រហែល ៤០% ចំណែកម៉ូតូខូចខាត ៦០% ។ បច្ចុប្បន្នវត្ថុតាង រថយន្តនិងម៉ូតូបានយកទៅរក្សាទុកនៅអធិការដ្ឋានស្រុកព្រៃនប់ដើម្បីដោះស្រាយបន្ត៕
Source: Kampuchea Thmey Daily
0 Comments