ខ្សែការពារឆ្វេងរបស់ក្លិបភ្នំពេញក្រោន គឺកីឡាករ សឿត បារាំង បានសម្រាកព្យាបាលរងរបួសជង្គង់មួយរយៈពេលខ្លី ហើយរបួសនេះធ្វើឲ្យរូបគេមិនអាចជួយក្រុមរបស់ខ្លួនទាំងក្នុងយុទ្ធនាការប្រកួតពានរង្វាន់សម្តេចតេជោ ហ៊ុន សែន និងពានរង្វាន់លីគកំពូលកម្ពុជា Metfone Cambodian League 2018។
យោងតាមការបញ្ជាក់របស់សាមីខ្លួនបានលើកឡើងជុំវិញបញ្ហារបួសរបស់ខ្លួនថា «ខ្ញុំបានប៉ះទង្គិចគ្នាជាមួយកីឡាកររបស់ក្រុមវិសាខា ពេលប្រកួតលីគកំពូលកម្ពុជា កាលពាក់កណ្ដាលខែកក្កដា ដោយចំជង្គង់។ ខ្ញុំគិតថាមិនយូរទេខ្ញុំនឹងវិលត្រលប់មកវិញ ព្រោះខ្ញុំនឹងសម្រាកព្យាបាលខ្លួនឲ្យបានល្អ ហើយមួយទៀតនោះគឺខ្ញុំនឹងជំនះភាពឈឺចាប់ទាំងនេះ»។
បញ្ហារបួសជង្គង់នេះ បង្ខំចិត្តឲ្យលោក Sean Sainsbury គ្រូបង្វឹករបស់ក្រុមភ្នំពេញក្រោន បានសម្រេចចិត្តដោះដូរកីឡាករ សឿត បារាំង ចេញតាំងពីនាទីទី១៥ ក្នុងការប្រកួតជាមួយវិសាខា នៅគ្រានោះ ជំនួសវិញដោយកីឡាករ គីម ឆាយ៉ា ដើម្បីប្រកួតតតាំងជាមួយក្រុមថ្មីកំពុងតែកើនទម្រង់លេងវិសាខា។ លទ្ធផលកាលនោះភ្នំពេញក្រោន បានប្រកួតចាញ់វិសាខា ៣ទល់១។
កីឡាកររូបនេះបន្តថា «ខ្ញុំបានជួបពេទ្យកាលពីថ្ងៃសុក្រ សប្ដាហ៍មុនគាត់ប្រាប់ថា របួសខ្ញុំគ្រាន់បើជាងមុន ហើយអាចឲ្យខ្ញុំចូលទីលានហ្វឹកហាត់វិញបានហើយ តែមិនទាន់ពេញ១០០% ព្រោះត្រូវតាមដានមើលថា នៅបន្តឈឺទៀត ឬ គ្រាន់បើហើយ។ តាមខ្ញុំសង្កេតខ្លួនឯង វាហាក់ប្រសើរជាងមុនច្រើន តែអត់ទាន់ប្រាកដទេ ចាំមើលចូលទីលានសិន។ សង្ឃឹមថា អាចជាសះស្បើយឆាប់ៗ នឹងបានត្រលប់ទៅជួយក្រុមឡើងវិញ»។
របួសនេះមិនអាចឲ្យកីឡាករវ័យ១៨ឆ្នាំរូបនេះ ជួយក្រុមភ្នំពេញក្រោន ក្នុងប្រកួតវគ្គ១៦ក្រុមចុងក្រោយជើងទី២ នៃពានរង្វាន់សម្តេចតេជោ ហ៊ុន សែន ជើងទី២ ពេលប៉ះជាមួយក្រុមអគ្គីសនីកម្ពុជា និងវគ្គ៨ក្រុមចុងក្រោយជាមួយក្រុមអង្គរថាយហ្គឺរ បាននោះទេ។ កីឡាកររូបនេះក៏បានអវត្តមានជាច្រើនប្រកួតក្នុងពានរង្វាន់លីគកំពូលកម្ពុជាផងដែរ។
កីឡាករ សឿត បារាំង គឺចេញពីយុវជនថ្នាលរបស់ក្លិបភ្នំពេញក្រោន ចន្លោះឆ្នាំ២០១១ មកម្ល៉េះហើយរូបគេត្រូវបានគ្រូបង្វឹកកោះហៅឲ្យចូលរួមក្នុងក្រុមឈុតធំនៅឆ្នាំ២០១៦ មកទល់បច្ចុប្បន្ន។ ក្រៅពីប្រកបអាជីពនៅក្នុងក្លិប បារាំង ធ្លាប់ជាប់ឈ្មោះក្នុងក្រុមជម្រើសជាតិកម្ពុជា ផងដែរគឺនៅឆ្នាំ២០១៦ ជាប់ឈ្មោះជួយក្រុម U19កម្ពុជាហើយចាប់ពីឆ្នាំ២០១៧ រូបគេជាប់ឈ្មោះក្នុងក្រុម U22 កម្ពុជា និងក្រុមជម្រើសជាតិកម្ពុជា ឈុតធំផងដែរ៕
Source: Kampuchea Thmey Daily
0 Comments