ភ្នំពេញ ៖ សង្កាត់ចំនួន២នៅខណ្ឌដង្កោ នឹងទទួលបានការស្ថាបនាផ្លូវ ឡើងវិញក្រោយជំនន់ទឹកភ្លៀងស្រកចុះអស់។ ក្នុងនោះមានសហគមន៍អន្លង់គង ក្នុងភូមិអន្លង់គងថ្មីសង្កាត់ព្រៃស ធ្វើផ្លូវ៣ខ្សែរួមនឹងការដាក់លូ និងសង្កាត់សាក់សំពៅ នឹងស្ថាបនាផ្លូវឡើងវិញចំនួន២ខ្សែដែលទទួលរងខូចខាតដោយសារទឹកហូរផ្តាច់ផ្លូវ។
នេះបើតាមការបញ្ជាក់របស់លោក ឃួង ស្រេង អភិបាលរាជធានីភ្នំពេញ នៅពេលដែលលោកណែនាំទៅមន្ទីរជំនាញ ខណៈដឹកនាំមន្ត្រី និងអាជ្ញាធរ ចុះសួរសុខទុក្ខប្រជាពលរដ្ឋនៅសហគមន៍អន្លង់គង ក្នុងភូមិអន្លង់គងថ្មី សង្កាត់ព្រៃស និងបន្តចុះទៅពិនិត្យនិងសួរសុខទុក្ខប្រជាពលរដ្ឋ ដែលទទួលរងការលិចលង់ដោយទឹកជំនន់នៅសង្កាត់សាក់ សំពៅ ខណ្ឌដង្កោ កាលពីព្រឹកថ្ងៃទី២៦ កក្កដានេះ។
ចំពោះការចុះត្រួតពិនិត្យ និងសួរសុខទុក្ខប្រជាពលរដ្ឋនៅសហគមន៍អន្លង់គង ក្នុងភូមិអន្លង់គងថ្មីសង្កាត់ព្រៃស លោក ឃួង ស្រេង បានសន្យាថា នឹងស្ថាបនាផ្លូវបេតុងចំនួន៣ខ្សែរួមនឹងការដាក់លូជូនប្រជាពលរដ្ឋ ខណៈដែលផ្លូវ៣ខ្សែនេះ កំពុងឈូសឆាយចាក់ថ្មហើយនោះ។
លោក ឃួង ស្រេង បានបញ្ជាក់ថា ក្នុងនាមជាអាជ្ញាធរដែនដី មានភារកិច្ចមួយទៀត នោះគឺចលនាប្រជាពលរដ្ឋអោយទៅបោះឆ្នោតនៅថ្ងៃទៅ២៩ ខែកក្កដា ខាងមុខនេះ ដូច្នេះបងប្អូនប្រជាពលរដ្ឋទាំងអស់ដែលរស់នៅក្នុងសហគមន៍នេះ សូមទៅបោះឆ្នោតទាំងអស់គ្នា ហើយក្រោយការបោះឆ្នោត បើទទួលបានលទ្ធផលល្អ រដ្ឋបាលរាជធានីភ្នំពេញ នឹងស្ថាបនាផ្លូវ៣ខ្សែនេះជាផ្លូវបេតុងជូនតែម្តង រួមនឹងការដាក់លូទំហំ៨តឹកអោយថែមទៀត។
លោកសៀង សុផាត អាយុ៥៨ឆ្នាំ លោកថាច សាឡន អាយុ៤៤ឆ្នាំ និងអ៊ុំ ស្រីឈ្មោះបាន កេង អាយុ៦៤ឆ្នាំ ដែលជាប្រជាពលរដ្ឋរស់នៅសហគមន៍អន្លង់គង ភូមិអន្លង់គងថ្មីសង្កាត់ព្រៃសមានប្រសាសន៍លើកឡើងស្រដៀងគ្នាថា ពួកគាត់ពិតជារីករាយណាស់ ដែលបានលោកអភិបាលរាជធានីភ្នំពេញ យកចិត្តទុកដាក់ចុះមកសួរសុខទុក្ខ និងបានកសាងផ្លូវ លូអោយពួកគាត់ថែមទៀតនេះ។ ពួកគាត់បញ្ជាក់ថា ពីមុនសហគមន៍របស់ពួកគាត់រស់នៅ បានទទួលរងការលិចលង់ ដោយជំនន់ទឹកភ្លៀងពិបាកក្នុងការរស់នៅ។ តែពេលនេះមិនត្រឹមតែអភិបាលរាជធានីភ្នំពេញធ្វើផ្លូវអោយប៉ុណ្ណោះទេ គឺនៅបានស្ថាបនាលូអោយបន្ថែមទៀត។
ប្រជាពលរដ្ឋបានសន្យាថា ពួកគាត់នឹងទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ទាំងអស់គ្នាដើម្បីជ្រើសរើសថ្នាក់ដឹកនាំប្រទេសជាតិ ហើយគណបក្សដែលពួកគាត់ត្រូវតែទៅបោះឆ្នោតជូននោះ គឺគណបក្សប្រជាជនកម្ពុជាដែលមានលេខរៀងទី២០ ដើម្បីអោយសម្តេចតេជោហ៊ុន សែន ធ្វើជានាយករដ្ឋមន្ត្រីបន្តទៀត។ មានសម្តេចតេជោហ៊ុន សែន គឺមានការអភិវឌ្ឍប្រទេសជាតិអោយរីកចម្រើន។
មន្ត្រីរដ្ឋបាលខណ្ឌដង្កោបានបញ្ជាក់ថា សហគមន៍អន្លង់គង មានផ្ទៃដីជិត១០ហិកតា មានប្រជាពលរដ្ឋរស់នៅជិត៣០០គ្រួសារ និងអ្នកមានឈ្មោះទៅបោះឆ្នោតប្រមាណ៧០០នាក់។
ក្រោយបញ្ចប់ការចុះសួរសុខទុក្ខប្រជាពលរដ្ឋនៅសហគមន៍អន្លង់គងហើយនោះ លោក ឃួង ស្រេង ក៏បានអញ្ជើញបន្តទៅសួរសុខទុក្ខប្រជាពលរដ្ឋ ដែលទទួលរងការលិចលង់ដោយទឹកជំនន់នៅសង្កាត់សាក់ សំពៅ ខណ្ឌដង្កោបន្តទៀត។
នៅក្នុងឱកាសនោះ លោកអភិបាលរាជធានីភ្នំពេញ ក៏បានធ្វើការណែនាំអោយមន្ទីរសាធារណការនិងដឹកជញ្ជូនរាជធានីភ្នំពេញធ្វើការស្ថាបនាផ្លូវចំនួន២ខ្សែឡើងវិញ ក្រោយពីផ្លូវទាំង២ខ្សែនេះទទួលរងខូចខាតដោយសារទឹកហូរផ្តាច់កាលពីប៉ុន្មានថ្ងៃមុននេះ៕
Source: Kampuchea Thmey Daily
0 Comments