ស្ទឹងត្រែង ៖ ប្រធានគណៈកម្មការគ្រប់គ្រងគ្រោះមហន្តរាយថ្នាក់ខេត្ត រួមនឹងមន្ត្រីពាក់ព័ន្ធក្នុងខេត្ត នាល្ងាចថ្ងៃទី២៤ ខែកក្កដា ឆ្នាំ២០១៨ បានចុះប្រចាំការពិនិត្យផ្ទាល់នូវស្ថានភាពទឹកជំនន់ ហើយរហូតមកដល់ថ្ងៃទី២៦កក្កដានេះ ភូមិ១៧និងឃុំចំនួន៤ក្នុងស្រុកសៀមប៉ាងកំពុងជួបគ្រោះមហន្តរាយពីទឹកទន្លេសេកុង បន្ទាប់ពីទំនប់វារីអគ្គិសនី ខេត្តអត្តពឺប្រទេសឡាវ បានបាក់ធ្វើអោយពលរដ្ឋឡាវស្លាប់និងបាត់ខ្លួនរាប់រយអ្នក និង៦ពាន់នាក់គ្មានទីជម្រក។
លោកផាន់យុទ្ធ អភិបាលស្រុកសៀមប៉ាងមានប្រសាសន៍ថា គិតត្រឹមថ្ងៃទី២៦ ខែកក្កដា ឆ្នាំ២០១៨ នេះមានភូមិ១៧និងឃុំចំនួន៤ក្នុងស្រុកសៀមប៉ាង បានរងនូវផលប៉ះពាល់ដោយទឹកជំនន់ រួមមាន ឃុំសន្តិភាព ឃុំថ្មកែ ឃុំសេកុង ឃុំស្រែសំបូរ។
លោកអភិបាលស្រុកបន្តថា ក្នុងភូមិ១៧និងឃុំចំនួន៤ខាងលើនេះ មានប្រជាពលរដ្ឋរងផលប៉ះពាល់ចំនួនជាង៥ពាន់គ្រួសារ និងមួយចំនួនបានជម្លៀសមកកាន់ទីទួលសុវត្ថិភាព។
ទំនប់វារីអគ្គិសនីអត្តពឺប្រទេសឡាវដែលរងបាក់ស្រុតនោះ ត្រូវបានគេរាយការណ៍ថា មានភ្លៀង ធ្លាក់ជារៀងរាល់ថ្ងៃ ហើយបណ្ដាលអោយបាក់ធ្វើអោយលំនៅឋាន ភូមិករ និងដីស្រែកសិកម្ម ក៏ដូចប្រជាពលរដ្ឋឡាវស្លាប់និងបាត់ខ្លួន និងគ្មានទីជម្រក។
បន្ទាប់ទំនប់វារីអគ្គិសនីខេត្តអត្តពឺប្រទេសឡាវ បានបាក់កាលពីល្ងាចថ្ងៃ២៣ ខែកក្កដា កន្លងមកនេះរយៈពេល២ថ្ងៃនៅថ្ងៃទី២៦ ខែកក្កដានេះ ភូមិមួយចំនួន ឃុំចំនួន៤ ក្នុងស្រុកសៀមប៉ាងបានរងផលប៉ះពាល់ពីការជោរជន់ដោយទឹកទន្លេសេកុង។ បើទោះបីជាទឹកបានបន្តហក់ឡើង ១១ម៉ែត្រ៩០ហួសកម្រិតប្រកាសអាសន្នយ៉ាងនេះក្តី ក៏មិនទាន់មានសេចក្តីរាយការណ៍ណាមួយបង្ហាញថា មានមនុស្ស ឬសត្វពាហនៈ ទទួលរងគ្រោះថ្នាក់ពីការជន់លិចនេះនៅឡើយទេ។
ខណៈដែលកំពុងមានការជន់លិចនេះ អភិបាលខេត្តស្ទឹងត្រែងលោកម៉ុមសារឿនបានដឹកនាំកម្លាំងសមត្ថកិច្ចប្រចាំនៅស្រុកសៀមប៉ាងដើម្បីចុះជួយរំដោះប្រជាពលរដ្ឋចេញពីទឹកជំនន់ ទៅរកទីទួលសុវត្ថិភាព។
សេចក្តីរាយការណ៍អោយដឹងទៀតថា ភូមិចំនួន១៧និងឃុំចំនួន៤ ដែលនៅប្របនឹងដងទន្លេសេកុង បានរងការជន់លិច បង្កផលប៉ះពាល់ដល់ភូមិករ ផ្ទះសម្បែង និងដីបង្កបង្កើនផលមួយចំនួនធ្វើអោយរងផលប៉ះពាល់យ៉ាងធ្ងន់ធ្ងរផងដែរ។
មន្ទីរធនធានទឹក និងឧតុនិយមលោកប៉ាងប៉េងបានអោយដឹងថា នៅក្នុងស្រុកសៀមប៉ាងនាព្រឹកថ្ងៃទី២៦ ខែកក្កដានេះ ទឹកទន្លេសេកុងបានឡើងដល់កម្ពស់១១ម៉ែត្រ៩០ហួសកម្រិតប្រកាសអាសន្នហើយសូមបងប្អូនប្រជាពលរដ្ឋមេត្តាប្រុងប្រយ័ត្ន ដោយសារទឹកអាចនឹងឡើងបន្តទៀត។
លោកម៉ុមសារឿនអភិបាលខេត្តស្ទឹងត្រែងបានដឹកនាំកម្លាំងចុះផ្ទាល់ បានប្រកាសដល់អាជ្ញាធរស្រុកនិងសមត្ថកិច្ច កងកម្លាំងទាំង៣ប្រភេទ ត្រូវត្រៀមកម្លាំងសរុប មធ្យោបាយសរុប ដើម្បីត្រៀមជម្លៀសប្រជាពលរដ្ឋ ទៅរកទីទួលសុវត្ថិភាព ប្រសិនទឹកទន្លេនៅតែបន្តហក់ឡើង ធ្វើអោយប្រជាពលរដ្ឋរងការលិចលុង ដំណាំ ភូមិករ លំនៅឋានរបស់ប្រជាពលរដ្ឋ៕
Source: Kampuchea Thmey Daily
0 Comments