ភ្នំពេញ ៖ ដូចដែលអ្វីបានសន្យាតារាសម្រែងស្រីស្រស់ស្អាតកញ្ញា ពេជ្រ ចរណៃ កាលពីថ្ងៃទី២៣ខែកក្កដា ឆ្នាំ២០១៨កន្លងទៅ បាននាំយកសម្ភារៈ និងថវិកាសប្បុរសជនទាំងក្នុងនិងក្រៅស្រុកទៅចែកជូនដល់លោកតាវ័យចំណាស់ទុរគត និងលោកយាយលោកតាចំនួន២គ្រួសារទៀតដែលកំពុងជួបប្រះទះនៅជីវភាពខ្វះខាតនិងលំបាកខ្លាំង។
ជាការកត់សម្គាល់នេះពុំមែនជាលើកទី១ទេ សម្រាប់តារាស្រីតារាសម្ដែងកញ្ញា ពេជ្រ ចរណៃ ក្នុងការចុះចែករំលែកក្តីស្រឡាញ់តាមរយៈសកម្មភាពមនុស្សធម៌ ដូចជាការ៖ ការចែកអង្ករ និងគ្រឿងបរិភោគដល់ចាស់ជរា ព្រមទាំងសៀវភៅប៊ិចដល់ក្មេងៗនៅតាមសហគមន៍ជាដើម។
បើតាមការរៀបរាប់ឲ្យដឹងពីសំណាក់ស្រីស្រស់ ពេជ្រ ចរណៃ បានលើកឡើងថា ចំពោះលោកតាវ័យជិត៩០ឆ្នាំដែលខ្ញុំបានចុះមកជួប ដោយផ្ទាល់គ្រាដំបូង(មកថតសម្ដែង)គឺគាត់មានសភាពលំបាកនិងគួរឲ្យអាណិតខ្លាំងណាស់។ ដូចនេះហើយទើបបានជាខ្ញុំថតពីសកម្មភាពនិងកន្លែងស្នាក់នៅរបស់លោកតាមកធ្វើការអំពាវនាវដល់សប្បុរសជនទាំងក្នុងនិងក្រៅស្រុកដើម្បីជួយដល់លោកតា។
កញ្ញា ពេជ្រ ចរណៃ បានបន្តថា ជាក់ស្តែងដូចជាពេលនេះនាងខ្ញុំក៏បានជួយលោកតាដូចបំណងដោយមានការចូលរួមឧបត្ថម្ភពីបងប្អូនសប្បុរសជនមួយចំនួន។ មិនតែប៉ុណ្ណោះអ្វីដែលធ្វើឲ្យខ្ញុំសប្បាយចិត្តគឺបានសាងសង់ផ្ទះឲ្យលោកតាដើម្បីបានរស់នៅមានភាពកក់ក្តៅជាងមុន ខណៈមុននេះលោកតាគឺរស់នៅតាមសំយាបផ្ទះបងប្អូនអ្នកស្រុក និងថែមទាំងមានសភាពធ្លុះធ្លាយផងដែរ។
សូមបញ្ជាក់ថា ទីតាំងដែលតារាស្រីកញ្ញា ពេជ្រ ចរណៃ ចុះទៅជួយឧបត្ថម្ភដល់លោកតាខាងលើគឺស្ថិតនៅភូមិប្រាសាទ ឃុំឈ្វាំង ស្រុកពញាឮ ខេត្តកណ្តាល។ ចំណែកឯសម្ភារៈ ដែលកញ្ញា ពេជ្រ ចរណៃ យកទៅចែកជូនដល់ពួកគាត់រួមមាន ៖ អង្ករ ទឹកត្រី ទឹកស៊ីអៀវ មី ត្រីខ ទឹកដោះគោ មុង ភួយ កន្ទេល ចាន ឆ្នាំង រួមទាំងថវិកាមួយចំនួន៕
Source: Kampuchea Thmey Daily
0 Comments