ភ្នំពេញ ៖ តារាប្រុសរូបសង្ហាវីជេ អាឡាស្កូ ស្របពេលដែលអាជីពសិល្បៈកាន់តែមានសន្ទុះហក់ឡើងស្រឺតៗលើសកម្មភាពនៃការសម្ដែងភាពយន្ត និងការងារចូលរួមជួយសង្គម បន្ទាប់ពីទទួលបានការតែងតាំងធ្វើជាប្រធានសមាគមអតីតពលករមកពីកូរ៉េនោះ ឃើញថា ការគាំទ្រនិងប្រជាប្រិយភាពលោកបច្ចុប្បន្នកំពុងតែទទួលការចាប់អារម្មណ៍ខ្លាំងពីសំណាក់ទស្សនិកជនគ្រប់ស្រទាប់វ័យ។
ជាមួយគ្នានោះចំពោះការតែងតាំងវីជេ អាឡាស្កូ ធ្វើជាប្រធានសមាគមអតីតពលករមកពីកូរ៉េរបស់ក្រសួងនាពេលកន្លងមក ត្រូវបានទស្សនិកជនគ្រប់គ្នាដឹងហើយថា ដោយហេតុតែតារាប្រុសរូបនេះកន្លងមកធ្លាប់មានបទពិសោធន៍លើផ្នែកទំនាក់ទំនងល្អជាមួយបងប្អូនពលករខ្មែរ ដែលធ្វើនៅប្រទេសកូរ៉េគឺមានរយៈពេលជិត១០ឆ្នាំ។
ដោយឡែកខណៈដែលអាជីពសិល្បៈនិងកិច្ចការងារសង្គមកំពុងតែមានភាពរីកចម្រើននិងទទួលការគាំទ្រពីមហាជននោះដែរ តារាសម្តែងប្រុសវីជេ អាឡាស្កូ ពេលនេះក៏បានរំលឹកបើកកកាយចំពោះការដឹងគុណលើបុគ្គលសំខាន់ៗចំនួន៣រូបដែលកន្លងតែងតែជួយជ្រោមជ្រែង និងឲ្យតម្លៃលើសកម្មភាពទាំងវិស័យសិល្បៈ និងសកម្មភាពសង្គមជាដើម។
បើតាមការប្រាប់ឲ្យដឹងពីតារាប្រុសវីជេអាឡាស្កូបាននិយាយថា អ្វីដែលធ្វើឲ្យខ្ញុំមិនអាចបំភ្លេចបានហើយត្រូវតែចងចាំដឹងគុណចំពោះពួកគាត់នោះគឺថ្ងៃនេះសូមបង្ហាញនូវអត្តសញ្ញាណរបស់បុគ្គល និង ថ្នាក់ដឹកនាំសំខាន់៣រូបដែលពួកគាត់កន្លងមកតែងជួយបើកផ្លូវរហូតធ្វើឲ្យជីវិតខ្ញុំក្លាយជាមនុស្សរឹងមាំ និងអាចលេចមុខមាត់នៅលើសង្គមដូចសព្វថ្ងៃ។
វីជេ អាឡាស្កូ បញ្ជាក់ថា បុគ្គលទាំង៣រូបនេះរួមមាន៖១-លោក ហេង សួរ អ្នកនាំពាក្យនិងប្រធានប្រតិបត្តិរបស់ក្រសួងការងារនិងបណ្តុះបណ្តាលវិជ្ជាជីវៈ។ លោកធ្លាប់បានជួយតាំងពីខ្ញុំនៅជាពលករប្រទេសកូរ៉េពោលគឺលោក ហេង សួរ បានជួយតម្រង់ផ្លូវអំឡុងពេលខ្ញុំស្នាក់នៅធ្វើការងារឯប្រទេសកូរ៉េ។
តារារូបសង្ហាវីជេ អាឡាស្កូ បានបន្ថែមទៀតថា ចំពោះបុគ្គលទី២-គឺប្រធានសមាគមសិល្បករខ្មែរអ្នកនាង ចន ច័ន្ទលក្ខិណា ដែលគាត់តែងបានជួយគ្រប់កិច្ចការងារឬវត្តមានចូលរួមលើសកម្មភាពការងារសិល្បៈផ្សេងៗជាច្រើន។ ចំណែកបុគ្គលទី៣-គឺលោក ហ្វៃ សំអាង ជាផលិតករនិងអ្នកដឹកនាំកម្មវិធីទូរទស្សន៍។ បុគ្គលទាំង៣រូបនេះហើយដែលបានជួយលើកស្ទួយកិត្តិយសនិងការងាររហូតមកដល់ពេលបច្ចុប្បន្នចំពោះវីជេ អាឡាស្កូ៕
Source: Kampuchea Thmey Daily
0 Comments