កណ្តាល ៖ បុរសម្នាក់ដែលគេសង្ស័យជាមុខសញ្ញាចោរកាច់កម៉ូតូ ត្រូវបានប្រជាពលរដ្ឋវាយរបួសជាទម្ងន់ ពេលកម្លាំងសមត្ថកិច្ចជួយសង្គ្រោះចាត់បញ្ជូនមកកាន់មន្ទីរពេទ្យ ក៏ដាច់ខ្យល់ស្លាប់។
អំពើចោរកម្មកាច់កម៉ូតូនេះ កើតឡើងនៅថ្ងៃទី២៥ ខែកក្កដា ឆ្នាំ.២០១៨ វេលាម៉ោង១៧.០០នាទី នៅចំណុចទំនប់៩០ ភូមិតោតម៉ា ឃុំកណ្តោក ស្រុកកណ្តាលស្ទឹង ខេត្តកណ្ដាល។
នគរបាលស្រុក កណ្តាលស្ទឹងបានអោយដឹងថា ជនរងគ្រោះម្ចាស់ម៉ូតូឈ្មោះសា ឆវន្ត័ ភេទប្រុសអាយុ៣៥ឆ្នាំ រស់នៅភូមិតោតម៉ា ឃុំកណ្តោក ស្រុកកណ្ដាលស្ទឹង មុខរបរ កម្មកររោងចក្រ។
ជនសង្ស័យមានគ្នា២នាក់គឺរត់រួចម្នាក់ ឯម្នាក់ទៀតត្រូវប្រជាពលរដ្ឋវាយស្លាប់.ឈ្មោះហួយ លឿង ភេទប្រុស អាយុ៣៤ឆ្នាំ រស់នៅភូមិដើមមៀន សង្កាត់តាខ្មៅ ក្រុងតាខ្មៅ មុខរបរមិនពិតប្រាកដ។
មូលហេតុ៖ ប្រជាពលរដ្ឋ ជួយស្ទាក់វាយ ចាប់បាន ០១នាក់ រងរបួសធ្ងន់ធ្ងរ ហើយត្រូវបានសមត្ថកិច្ច ចាត់វិធានការ ជួយសង្គ្រោះ ស្លាប់ លើ រថយន្តសង្គ្រោះ ពេលដឹកនាំយកមកមន្ទីរពេទ្យជ័យជំនះ។
នគរបាលបញ្ជាក់ថាសម្ភារៈ បាត់បង់ ម៉ូតូ០១គ្រឿងម៉ាកហុងដា C.១២៥ ពណ៌ខ្មៅ ស៊េរីឆ្នាំ២០១៧ លេខតួលេខម៉ាស៊ីន ៩៧៩៥៣៩៩ ពាក់ស្លាកលេខ កណ្តាល 1W-4977របស់ជនរងគ្រោះត្រូវជនសង្ស័យដែលគេចខ្លួនជិះយកទៅបាត់។ វត្ថុតាងចាប់យក ម៉ូតូ១គ្រឿងម៉ាកហុងដា C.១២៥ ពណ៌ខ្មៅ ពាក់ស្លាកលេខ ភ្នំពេញ 1GL-0132របស់ជនសង្ស័យ។
សាក្សីនៅជុំវិញកន្លែងកើតហេតុនិយាយថា នៅថ្ងៃកើតហេតុវេលាម៉ោង១៦.២០នាទី ជនរងគ្រោះ បានជិះម៉ូតូទៅមើលមង នៅកន្លែងកើតហេតុ ហើយជនរងគ្រោះទុកម៉ូតូ នៅលើទំនប់លេខ៩០ចាក់សោ បិទសន្ទះសោ និងដកខ្សៀបូស៊ី រួចជនរងគ្រោះ ចុះទៅមើលមង ចម្ងាយប្រហែល១០០ម៉ែត្រ ពេលមើលមងរួច ដើរត្រឡប់មក រកម៉ូតូវិញស្រាប់តែឃើញ ចោរ ២នាក់កំពុងកាច់ក ម៉ូតូរបស់ខ្លួនក៏ ស្រែកថា៖ចោរៗ ជួយផង ពេលនោះមានប្រជាពលរដ្ឋ បង់សំណាញ់ ដាក់មងនៅខាងមុខ ស្ទាក់ពីមុខ ជនសង្ស័យ ក៏បើកម៉ូតូត្រឡប់ថយមកក្រោយវិញ មកដល់ទល់មុខជនរងគ្រោះ ជនសង្ស័យ ក៏បើក ម៉ូតូបុកជនរងគ្រោះ តែជនរងគ្រោះ យកមែកសង្កែ វ៉ៃលើជនសង្ស័យបណ្តាលឲ្យ ដួលម៉ូតូរួចជនសង្ស័យ បានវាយប្រតាយប្រតប់គ្នា ជាមួយជនរងគ្រោះ(ម្ចាស់ម៉ូតូ) ពេលនោះប្រជាពលរដ្ឋជាច្រើននាក់មកព្រួតជួយជនរងគ្រោះ វាយម្នាក់មួយដៃ មួយជើងបណ្តាលឲ្យ ជនសង្ស័យ ម្នាក់ស្លាប់បាត់បង់ជីវិត នៅពេលដឹក តាមរថយន្ត សង្គ្រោះ ចេញពី កន្លែងកើតហេតុ ហើយកម្លាំងប៉ុស្តិ៍រាយការណ៍ មកផ្នែកជំនាញចុះមកជួយអន្តរាគមន៍ ពិនិត្យនិង រាយការណ៍មកជំនាញខេត្ត។
ករណី នេះសមត្ថកិច្ចកំពុងបន្តតាមរកចាប់បក្ខពួក ដែលនៅសល់កំពុងរត់គេចខ្លួន ដើម្បីយកមកផ្តន្ទាទោសតាមច្បាប់៕
Source: Kampuchea Thmey Daily
0 Comments