នៅខែសីហាខាងមុខនេះ សហព័ន្ធកីឡាតេក្វាន់ដូITF(International Taekwondo Federa tion)កម្ពុជានឹងចូលរួមប្រកួតជើងឯកពិភពលោកនៅប្រទេបេឡារុស។
លោកប៊ួន ហ៊ីងសុធីយ៉ា ដែលជាអគ្គលេខាធិការសហព័ន្ធកីឡាតេក្វាន់ដូITF បានឲ្យដឹងថា ការប្រកួតនឹងចាប់ផ្ដើមពីថ្ងៃទី១៩ដល់២៧ ខែសីហានៅទីក្រុងMINSK នៃប្រទេសបេឡារុស។ព្រឹត្តិការណ៍នេះអាចនឹងមានប្រទេសចូលរួមចំនួនពី៧០ទៅ៨០ចូលរួមព្រោះជាការប្រកួតកម្រិតពិភពលោក។
សម្រាប់កម្ពុជាបញ្ជូនវ័យយុវជនចំនួន៧រូប និងវ័យចំណាស់អាចចំនួន៤រូបទៅចូលរួមប្រកួត។ ចំពោះគ្រូបង្វឹក៤រូប ដែលអមដំណើរកីឡាករទៅចូលរួមប្រកួតនេះ មានគ្រូជនជាតិកូរ៉េខាងជើងRe Cho Nam លោកកៅ មករា លោកប៉ាល់ ជីវ័ន្ដ និង លោកប៊ូន ហ៊ីងសុធីយ៉ា។
សម្រាប់ក្រុមកម្ពុជាបានត្រៀមខ្លួនរួចហើយដើម្បីប្រកួតលើវិញ្ញាសាប្រយុទ្ធ មេគុនការបង្ហាញបច្ចេកទេសពិសេស វិញ្ញាសាប្រយុទ្ធជាក្រុម បច្ចកទេសពិសេសជាក្រុម និងការបង្ហាញពីបច្ចេកទេសការពារខ្លួន។ នេះជាការប្រកួតជើងឯកពិភពលោកលើកទី១៣ តែកម្ពុជាទើបតែទៅចូលរួមបាន២លើកប៉ុណ្ណោះ ដែលលើកទី១ធ្វើនៅប្រទេសកូរ៉េខាងជើង ហើយកាលនោះកម្ពុជាដណ្ដើមបានមេដាយសំរិទ្ធ ១ គ្រឿង។ សម្រាប់លើកទី២នេះ កម្ពុជានៅតែមានសង្ឃឹមក្នុងការដណ្ដើមបានមេដាយដដែល។
លោកអគ្គលេខាធិការប៊ូន ហ៊ីងសុធីយ៉ា បញ្ជាក់ថា លោកអាចនឹងចូលរួមប្រកួតដែរ ដោយប្រកួតក្នុងវ័យចាស់តែលោកត្រូវពិនិត្យមើលឆ្អឹងដៃរបស់លោកដែលបាក់កន្លងមកនោះតើលោកអាចប្រកួតបានឬទេ។ ប្រសិនបើប្រកួតបានលោកនឹងប្រកួតលើវិញ្ញាសាប្រយុទ្ធ និងមេគុន។
លោកអគ្គលេខាធិការបញ្ជាក់ថា មូលហេតុដែលលោកចង់ចូលរួមប្រកួតព្រោះលោកចង់ដឹងថាតើសមត្ថភាពនិង កម្លាំងរបស់លោកពេលនេះនិងកាលពីលោកនៅក្មេងវាប្រែប្រួលបែបណា៕
Source: Kampuchea Thmey Daily
0 Comments