រតនគិរី ៖ ទឹកជំនន់ជន់លិច ដែលរងការប៉ះពាល់ចំនួន៤ស្រុកកន្លងទៅនេះ មកដល់ថ្ងៃទី២៥ ខែកក្កដា ឆ្នាំ២០១៨ មានកម្ពស់ទឹកទន្លេស្រែពកនៅសល់០៦,៩៨.ម៉ែត្រ ទឹកទន្លេសេសាន្ត កម្ពស់ទឹក០៩,៤១.ម៉ែត្រ និងទឹកទន្លេសេសាន្តផ្នែកខាងលើបានស្រកចុះវិញហើយ។
លោកចាន់ ប៊ុនធឿន ប្រធានមន្ទីរធនធានទឹកនឹងឧតុនិយមខេត្ត បានឲ្យដឹងថា ផ្នែកខាងលើភូមិ ភិ ឃុំសេសាន្ត ស្រុកអូរយ៉ាដាវ បានស្រកចុះ ០២,៥.ម៉ែត្រ មិនទាន់មានផលប៉ះពាល់ទេ ស្រុកអណ្តូងមាស ស្រកចុះ ០២.ម៉ែត្រ មិនទាន់មានផលប៉ះពាល់ទេ ស្រុកតាវែង ទឹកស្រកចុះ ០,៣០.ម៉ែត្រ បន្តិចហើយ មានផលប៉ះពាល់ ចំនួនពីឃុំ គឺឃុំតាវែងលើ និងឃុំតាវែងក្រោមភូមិតាវែងលើចំនួន៧ភូមិស្មើនឹង១.០៦២គ្រួសារ ប្រជាពលរដ្ឋសរុប ៣.៩៦៦នាក់ ផលប៉ះពាល់២១១គ្រួសារ ភូមិតាវែងក្រោមចំនួន៥ភូមិ ស្មើនឹង២៧៦គ្រួសារ និង១.០១៧នាក់ ដោយឡែកនៅស្រុកវើនសៃទឹកនៅបន្តឡើង០៩,៥៧ ម៉ែត្រ មិនទាន់មានផលប៉ះពាល់នៅឡើយទេ។
លោកចាន់ ប៊ុនធឿន បានបន្ថែមទៀតថា ការបាក់ទំនប់ទឹកវារីអគ្គិសនី សេពាន សេណាំណយ ខេត្តអត្តពឺ នៃប្រទេសឡាវនោះ គឺមិនប៉ះពាល់ដល់ទន្លេសេសាន្ត និងទន្លេស្រែពកខេត្តរតនគិរីនោះឡើយ គ្រាន់តែដីជាប់គ្នាតែប៉ុណ្ណោះ ពោលគឺមិនជាប់ទន្លេនោះទេ ហើយដែលផលប៉ះពាល់ធ្ងន់ធ្ងរនោះ គឺទន្លេសេកុងនៃខេត្តស្ទឹងត្រែងតែម្តង។
លោកថា អាជ្ញាធរស្រុកបានជម្លៀសប្រជាពលរដ្ឋចំនួន ៥ភូមិ ឲ្យទៅទីទួលសុវត្ថិភាពគឺភូមិប៉ាងកិត ១៨គ្រួសារ ភូមិសញ ៣គ្រួសារ ភូមិតាវែងលើ ៨គ្រួសារ ភូមិតាបូក ១៩គ្រួសារ និងភូមិកិគួង ១គ្រួសារ នៃស្រុកតាវែង។
ប្រធានមន្ទីរធនធានទឹកនិងឧតុនិយមខេត្ត បានផ្តល់ប្រេងសាំង ចាក់កាណូតចំនួន៥០០លីត្រសម្រាប់ជម្លៀសប្រជាពលរដ្ឋ ចេញពីកន្លែងជំនន់ទឹកលិចផ្ទះរបស់ប្រជាពលរដ្ឋនៅស្រុកតាវែង៕
Source: Kampuchea Thmey Daily
0 Comments