ភ្នំពេញ ៖ យោងតាមដីកាបង្គាប់ឲ្យចាប់ខ្លួនរបស់ចៅក្រមស៊ើបសួរ នៃសាលាដំបូងខេត្តកណ្តាលលេខ៥២០ ចុះថ្ងៃទី១៦ ខែតុលា ឆ្នាំ២០១៨ បានសម្រេចឲ្យចាប់ខ្លួនស្ត្រី ឈ្មោះ សុខ សារឿន អាយុ៤៩ឆ្នាំ មុខរបរអាជីវករ មានទីលំនៅផ្ទះលេខ២៤.២៦ ផ្លូវលេខ១១០ ភូមិថ្មី២ សង្កាត់តាខ្មៅ ក្រុងតាខ្មៅ ខេត្តកណ្ដាល ដោយចោទប្រកាន់ពីបទរំលោភលើទំនុកចិត្ត។
នៅក្នុងដីកាបង្គាប់ឲ្យចាប់ខ្លួនស្ត្រី ឈ្មោះ សុខ សារឿន ប្តី ឈ្មោះ ឌៀម ម៉ន់ នេះ គឺយោងតាមសំណុំរឿងព្រហ្មទណ្ឌលេខ៥១១ អ ក ចុះថ្ងៃទី៨ ខែឧសភា ឆ្នាំ២០១៨ របស់តំណាងអយ្យកាអមសាលាដំបូង ខេត្តកណ្ដាល។ បានឃើញដីកាសន្និដ្ឋានបញ្ជូនរឿងឲ្យស៊ើបសួរលេខ ៦៣៦ ដ ក ស ស ចុះថ្ងៃទី១៨ ខែកក្កដា ឆ្នាំ២០១៨ ក្រោយពីបានពិនិត្យលើសំណុំរឿងចប់សព្វគ្រប់ យល់ឃើញថាឈ្មោះ សុខ សារឿន ភេទស្រី អាយុ៤៩ឆ្នាំ សញ្ជាតិខ្មែរ មុខរបរអាជីវករ មានស្រុកកំណើតនៅភូមិតាខ្មៅ ឃុំតាខ្មៅ ស្រុកកណ្តាលស្ទឹង ខេត្តកណ្តាល និងលំនៅដ្ឋាន បច្ចុប្បន្ន ផ្ទះលេខ២៤.២៦ ផ្លូវលេខ១១០ ភូមិថ្មី២ សង្កាត់តាខ្មៅ ក្រុងតាខ្មៅ ខេត្តកណ្តាល។ ឪពុក ឈ្មោះ ហ៊ិន រត្ន័(ស្លាប់) ម្តាយឈ្មោះ ហ៊ិន រិន(ស្លាប់) ប្តីឈ្មោះ ឌៀម ម៉ន់ មានកូន៥នាក់។
ទោសពីមុនគ្មាន ជាប់ចោទពីបទ រំលោភលើទំនុកចិត្ត ប្រព្រឹត្តនៅភូមិទួលសាលា ភូមិវាល ឃុំស្អាងភ្នំ ស្រុកស្អាង ខេត្តកណ្តាល តាមបញ្ញត្តិមាត្រា៣៩១ និង មាត្រា៣៩២ នៃក្រមព្រហ្មទណ្ឌ។
ឈ្មោះ សុខ សារឿន ភេទស្រី អាយុ៤៩ឆ្នាំ សញ្ជាតិខ្មែរ មុខរបរអាជីវករ បានប្រព្រឹត្តបទរំលោភលើទំនុកចិត្ត ប្រព្រឹត្តនៅភូមិទួលសាលា និង ភូមិវាល ឃុំស្អាងភ្នំ ស្រុកស្អាង ខេត្តកណ្តាល កាលពីថ្ងៃទី២៧ ខែកញ្ញា ឆ្នាំ២០១៧ ហើយមិនបានចូលខ្លួនតាមដីកាបង្គាប់ឲ្យចូលខ្លួន និងដីកាបង្គាប់ឲ្យនាំខ្លួនរបស់ចៅក្រមស៊ើបសួរ នៃសាលាដំបូងខេត្តកណ្ដាលឡើយ។
អំពើប្រព្រឹត្តរបស់ជនត្រូវចោទ ឈ្មោះ សុខ សារឿន ជាបទមជ្ឈិម ហើយជនត្រូវចោទមានភាពរឹងទទឹង និង ដើម្បីឲ្យការស៊ើបអង្កេតមានលក្ខណៈច្បាស់លាស់ គួរចាប់ខ្លួនជនត្រូវចោទបញ្ជូនទៅតុលាការចាត់ការតាមច្បាប់។
ហេតុដូច្នេះសម្រេច
១.បង្គាប់ឲ្យចាប់ខ្លួនជនត្រូវចោទ ឈ្មោះ សុខ សារឿន ភេទស្រី អាយុ៤៩ឆ្នាំ សញ្ជាតិខ្មែរ មានអត្តសញ្ញាណខាងលើ។
២.បង្គាប់ទៅភ្នាក់ងារមានសមត្ថកិច្ចឲ្យចាប់ខ្លួនឈ្មោះខាងលើនេះ និងបញ្ជាដល់ប្រធានពន្ធនាគារ ឬមណ្ឌល ឃុំខ្លួនឲ្យទទួល និង ឃុំខ្លួនបុគ្គលនោះ ហើយអនុវត្តបន្តនីតិវិធី។
ក្នុងនោះដែរ បើសមត្ថកិច្ចនៅតាមបណ្តាខេត្តរាជធានី និងប្រជាពលរដ្ឋ បានប្រទះឃើញស្ត្រីខាងលើសូមទូរស័ព្ទមកលេខ០១២ ៣០ ៨១ ៥៦ និងមានជូនសគុណ៕
Source: Kampuchea Thmey Daily
0 Comments