អ្នកសារព័ត៌មានហ្វីលីពីនឈ្មោះ Maria Ressa ដែលជាអ្នករិះគន់លោកប្រធានាធិបតី Rodrigo Duterte ដ៏ល្បីល្បាញគឺត្រូវបានគេចាប់ខ្លួនជាថ្មីកាលពីថ្ងៃសុក្រនៅក្នុងអ្វីដែលក្រុមតស៊ូមតិសេរីភាពសារព័ត៌មានហៅថាជាការសងសឹកចំពោះគេហទំព័រព័ត៌មានរបស់លោកស្រីដែលចុះផ្សាយអំពីរឿងរ៉ាវរបស់រដ្ឋាភិបាល។
លោកស្រី Ressa និងគេហទំព័រ Rappler របស់លោកស្រីគឺត្រូវរងគ្រោះដោយការចោទប្រកាន់ជាបន្តបន្ទាប់ពីបទព្រហ្មទណ្ឌក្នុងរយៈពេលប៉ុន្មានខែថ្មីៗនេះដែលជាហេតុបង្កឲ្យមានការភ្ញាក់ផ្អើលតាមរយៈប្រព័ន្ធផ្សព្វផ្សាយហ្វីលីពីនហើយនាំឲ្យមានការចោទប្រកាន់ថា លោកស្រីនិងក្រុមរបស់លោកស្រីត្រូវបានគេកំណត់គោលដៅសម្រាប់ការងាររបស់ពួកគេ។
ការចោទប្រកាន់ចុងក្រោយបង្អស់នេះបានចោទប្រកាន់ថា លោកស្រីនិងមិត្តរួមការងារនៅគេហទំព័រ Rappler បានបំពានលើច្បាប់ស្តីពីភាពជាម្ចាស់បរទេសលើប្រព័ន្ធផ្សព្វផ្សាយ។ លោកស្រីត្រូវបានគេនាំខ្លួនទៅមន្ទីរឃុំឃាំងបន្ទាប់ពីមកដល់អាកាសយានដ្ឋានក្រុងម៉ានីលក្រោយពេលវិលត្រលប់មកពីការធ្វើដំណើរនៅក្រៅប្រទេសវិញ។លោកស្រី Ressa បានប្រាប់អ្នកកាសែតថា “សារព័ត៌មាននៅក្នុងប្រទេសនេះកំពុងរងការវាយប្រហារ។ យើងនឹងមិនទទួលយកការគំរាមឲ្យចុះចាញ់ទេ។ នីតិរដ្ឋត្រូវបានប្រែក្លាយទៅជាអាវុធ”។
គេហទំព័រ Rappler បានរាយការណ៍យ៉ាងទូលំទូលាយនិងមិនច្បាស់លាស់អំពីការបង្ក្រាបគ្រឿងញៀនដ៏សាហាវរបស់លោក Duterte ដែលបានសម្លាប់មនុស្សអស់រាប់ពាន់នាក់ហើយត្រូវបានក្រុមសិទ្ធិមនុស្សនិយាយថាអាចជាឧក្រិដ្ឋកម្មប្រឆាំងមនុស្សជាតិ។
លោក Duterte ក៏បានរិះគន់ផងដែរទៅលើបណ្តាញសារព័ត៌មានសំខាន់ផ្សេងៗទៀតដូចជាកាសែត Philippine Daily Inquirer និងស្ថានីយ៍ទូរទស្សន៍ ABS-CBN ជាដើម។
លោកបានគំរាមថានឹងតាមចាប់ម្ចាស់របស់ពួកគេដោយសារតែការមិនបង់ពន្ធឬរារាំងការស្នើសុំសិទ្ធិថ្មីរបស់បណ្តាញ។លោកស្រី Ressa អាយុ៥៥ឆ្នាំនិងអតីតសហការីគេហទំព័រ Rappler ចំនួន៦នាក់ផ្សេងទៀតត្រូវបានចោទប្រកាន់ថាបានអនុញ្ញាតឲ្យជនបរទេសគ្រប់គ្រងវេបសាយនេះតាមរយៈការលក់មូលបាត្របំណុលឆ្នាំ២០១៥។
ក្រោមរដ្ឋធម្មនុញ្ញ ការវិនិយោគលើប្រព័ន្ធផ្សព្វផ្សាយត្រូវបានបម្រុងទុកសម្រាប់ជនជាតិហ្វីលីពីនឬអង្គភាពនានាដែលគ្រប់គ្រងដោយជនជាតិហ្វីលីពីន។គួរបញ្ជាក់ថា អាជ្ញាធរហ្វីលីពីនបានចាប់ខ្លួនលោកស្រី Ressa ជាលើកដំបូងនៅក្នុងខែកុម្ភៈពីបទបរិហារកេរ្តិ៍លើប្រព័ន្ធអ៊ីនធឺណិត៕ AFP
Source: Kampuchea Thmey Daily
0 Comments